శ్రీసిటీలో ఘోర ప్రమాదం… బాయిలర్‌ పేలి మంటలు, ఐదుగురు కార్మికులు మృతి..!

తిరుపతి జిల్లా శ్రీసిటీలోని టిల్ హెల్త్ కేర్ పరిశ్రమలో శుక్రవారం రాత్రి ఘోర ప్రమాదం జరిగింది. బాయిలర్ పేలడంతో ఐదుగురు కార్మికులు మృతి చెందగా… పలువురు గాయపడ్డారు.

తిరుపతి జిల్లాలోని ప్రముఖ పారిశ్రామిక ప్రాంతమైన శ్రీసిటీలో తీవ్ర విషాదం చోటుచేసుకుంది. శుక్రవారం రాత్రి తర్వాత ఇక్కడ ఉన్న ఓ ప్రైవేట్ ఫార్మా పరిశ్రమలో ఉన్నట్టుండి భారీ పేలుడు సంభవించింది. ఈ దుర్ఘటనలో ఐదుగురు కార్మికులు ప్రాణాలు కోల్పోయారు.

శ్రీసిటీలో ఘోర ప్రమాదం… బాయిలర్‌ పేలి మంటలు, ఇద్దరు కార్మికులు మృతి..!

అసలేం జరిగింది?

శ్రీసిటీలోని 'టిల్ హెల్త్ కేర్' పరిశ్రమలో శుక్రవారం రాత్రి కార్మికులు ఎప్పటిలాగే తమ నైట్ షిఫ్ట్ విధుల్లో ఉన్నారు. అయితే అర్థరాత్రి సమయంలో ఉన్నపళంగా ప్లాంట్‌లోని బాయిలర్/రియాక్టర్ విభాగంలో భారీ శబ్దంతో పేలుడు సంభవించింది. పేలుడు దాటికి ప్లాంట్ ఆవరణ తీవ్రంగా దెబ్బతింది. ఆ సమయంలో అక్కడ పనిచేస్తున్న కార్మికులు ప్రమాదంలో చిక్కుకుపోయారు.

ప్రమాదం జరిగిన వెంటనే సమాచారం అందుకున్న పోలీసులు, అగ్నిమాపక సిబ్బంది, అత్యవసర రెస్క్యూ టీమ్‌లు ఘటనా స్థలానికి చేరుకున్నాయి. ప్రమాద తీవ్రత ఎక్కువగా ఉండటంతో సహాయక చర్యలను వేగవంతం చేశారు. మంటలను అదుపులోకి తెచ్చి, శిథిలాల కింద చిక్కుకున్న వారిని బయటకు తీశారు. తీవ్రంగా గాయపడిన నలుగురు కార్మికులను సమీపంలోని ఆసుపత్రికి తరలించి మెరుగైన వైద్య చికిత్స అందిస్తున్నారు.

ఘటనపై విచారణకు ఆదేశం

ఈ ప్రమాదంలో మరణించిన వారి వివరాలు, గాయపడిన వారి ప్రస్తుత ఆరోగ్య పరిస్థితిపై అధికారులు సమాచారం సేకరిస్తున్నారు. అసలు బాయిలర్‌లో సాంకేతిక లోపం వల్ల ప్రమాదం జరిగిందా లేక నిర్వహణ లోపాలు ఉన్నాయా అనే కోణంలో పోలీసులు కేసు నమోదు చేసుకుని దర్యాప్తు ప్రారంభించారు. పరిశ్రమల శాఖ అధికారులు, సేఫ్టీ ఇన్‌స్పెక్టర్లు సైతం ఘటనా స్థలాన్ని పరిశీలించి పూర్తి వివరాలను సేకరిస్తున్నారు. ఈ ఘటనతో శ్రీసిటీలోని ఇతర పారిశ్రామిక యూనిట్లలో తీవ్ర కలకలం రేగింది.