ఆంధ్రప్రదేశ్‌లో 120 సబ్‌రిజిస్ట్రార్ కార్యాలయాల్లో ఏసీబీ సోదాలు

ఆంధ్రప్రదేశ్‌లో సబ్‌రిజిస్ట్రార్ కార్యాలయాల్లో ఏసీబీ అధికారులు తనిఖీలు చేశారు. ఏకకాలంలో ఈ తనిఖీలు చేపట్టింది ఏసీబీ.

రాష్ట్రంలో ఏకకాలంలో 120 సబ్ రిజిస్ట్రార్ కార్యాలయాల్లో ఏసీబీ అధికారులు సోదాలు చేశారు. అవినీతి జరుగుతుందన్న సమాచారం ఒకేసారి 120 సబ్ రిజిస్ట్రార్ కార్యాలయాల్లో మెరుపుదాడులు చేశారు. వివిధ పనుల కోసం వస్తున్న జనాల దగ్గర డబ్బులు లాగుతున్నట్టుగా ఆరోపణలు రావడంతో ఏసీబీ తనిఖీలు మెుదలుపెట్టింది. కొన్ని ప్రాంతాల్లో ఇంకా సోదాలు కొనసాగుతూనే ఉన్నాయి.

ప్రతీకాత్మక చిత్రం

నరసరావుపేట, ఒంగోలు, ఆళ్లగడ్డ, విశాఖతోపాటుగా మెుత్తం 120 సబ్‌రిజిస్ట్రార్ ఆఫీసుల్లో తనిఖీలు చేశారు అధికారులు. స్థలాల రిజిస్ట్రేషన్‌కు సంబంధించిన పత్రాలు పరిశీలించారు. కీలక డాక్యుమెంట్ల గురించి ఆరా తీశారు. అంతేకాదు కార్యాలయంలో అనధికారికంగా ఉన్నవారి గుర్తించి ప్రశ్నించారు.

విశాఖపట్నంలోని మధురవాడ, భోగాపురం, టర్నర్ చౌల్ట్రీ, పెడగంట్యాడ సబ్ రిజిస్ట్రార్ కార్యాలయాల్లో ఏసీబీ సోదాలు చేసింది. ఈ ప్రాంతాల్లో అవినీతి జరుగుతున్నట్టుగా ఎక్కువగా ఫిర్యాదులు వచ్చాయి. మరోవైపు నంద్యాల జిల్లా ఆళ్లగడ్డ సబ్ రిజిస్ట్రార్ ఆఫీసులో ఏసీబీ అధికారులు దాడి చేశారు. పట్టణంలోని సబ్ రిజిస్ట్రార్ కార్యాలయంలో ఏసీబీ డీఎస్పీ సోమన్న ఆధ్వర్యంలో సోదాలు చేశారు.

ఆళ్లగడ్డ సబ్ రిజిస్ట్రార్ కార్యాలయం గురించి వరుసగా ఏసీబీకి ఫిర్యాదులు వెళ్లాయి. అవినీతి జరుగుతుందని చాలా మంది కంప్లైంట్ ఇచ్చారు. దీంతో దాడి చేసి కార్యాలయం తలుపులు మూసివేసి కీలక దస్త్రాలను పరిశీలించారు. ఏసీబీ దాడుల నేపథ్యంలో అనధికారికంగా ఉన్న కొంతమంది వ్యక్తులు అక్కడ నుంచి మెల్లగా జారుకున్నారు. రిజిస్ట్రర్లు, రికార్డులను అధికారులు స్వాధీనం చేసుకున్నారు.