గణేష్ చతుర్థి వేడుకలకు దూరంగా ఓ గ్రామం.. కారణం ఏంటో తెలుసా?

దాదాపు ప్రతీ గ్రామం వినాయక చవితి వేడుకలతో అంగరంగ వైభవంగా ఉంది. అయితే ఓ గ్రామం మాత్రం ఈ ఉత్సవాలకు దూరంగా ఉంది. కారణం ఏంటో తెలుసుకోండి.

దేశమంతటా గణేష్ చతుర్థి వేడుకలు ఘనంగా జరుగుతున్నప్పటికీ, అనంతపురం జిల్లాలోని ఒక గ్రామం ఈ ఉత్సవాలకు దూరంగా ఉండాలని నిర్ణయించుకుంది. బసంపల్లి మండలం శెట్టూరు గ్రామ ప్రజలు వినాయక చవితి వేడుకలను నిర్వహించకూడదని ఏకగ్రీవంగా తీర్మానించారు. గ్రామ దేవత మారెమ్మ అమ్మవారి ఉత్సవాల నేపథ్యంలో ఈ నిర్ణయం తీసుకోవడం విశేషం.

గణేష్ చతుర్థి ఉత్సవాలు

శెట్టూరు గ్రామంలో ప్రసిద్ధి చెందిన మారెమ్మ అమ్మవారి వార్షిక ఉత్సవాలు మంగళవారం నుంచి ప్రారంభం అవుతాయి. గణేష్ చతుర్థి సోమవారం. సాధారణంగా ఈ గ్రామ దేవత జాతర వినాయక చవితి పండుగకు ఒకటి లేదా రెండు రోజులు అటు ఇటుగా ఉంటుంది. ఈ సంవత్సరం మారెమ్మ ఉత్సవాలు.. గణేష్ చతుర్థి తర్వాతి రోజున ఉన్నాయి.

గ్రామ ఆచారం ప్రకారం మారెమ్మ అమ్మవారి ఉత్సవాల సందర్భంగా గ్రామస్థులు, భక్తులు సాంప్రదాయబద్ధంగా మాంసాహార నైవేద్యాలను సమర్పిస్తారు. ఒకవైపు మారెమ్మ జాతరలో మాంసాహార వంటకాలు సిద్ధం చేస్తుండగా, మరొకవైపు అత్యంత నియమనిష్ఠలతో నిర్వహించే వినాయక చతుర్థి పూజలు చేయడం సమంజసం కాదని ఊరి పెద్దలు, గ్రామస్థులు భావించారు.

గ్రామ దేవత జాతర జరుగుతుండగా.. వినాయక మండపాలు ఏర్పాటు చేసి పూజలు జరపడం శాస్త్రోక్తంగా సరికాదని స్థానికులు విశ్వసించారు. అందువల్ల గణేష్ ఉత్సవాల నుండి దూరంగా ఉండి, గ్రామమంతా కలిసికట్టుగా మారెమ్మ అమ్మవారి సేవలోనే పాల్గొనాలని నిర్ణయించుకున్నారు. చాలా ఏళ్ల నుంచి ఈ గ్రామంలో వినాయక చవితి ఉత్సవాలకు దూరంగానే ఉంటున్నారు. మారెమ్మ ఉత్సవాల సందర్భంగా ఇంట్లో బంధువులు ఉంటారు. నాన్ వెజ్ వంటకాలు ఉంటాయి.