E-Paper
Andhrapradesh : దసరా వేళ దుర్గాదేవి మండపాలకు ఉచిత విద్యుత్ - అనుమతి ఉంటేనే...
దుర్గాపూజ నిర్వాహకులకు ఆంధ్రప్రదేశ్ ప్రభుత్వం తీపి కబురు అందించింది. 2026 దసరా ఉత్సవాల సందర్భంగా రాష్ట్రవ్యాప్తంగా ఏర్పాటు చేసే దుర్గాదేవి మండపాలకు ఉచితంగా విద్యుత్ సరఫరా చేయనున్నట్లు మంత్రి నారా లోకేశ్ ప్రకటన చేశారు.
Prefer HTon Google
నవరాత్రి ఉత్సవాలకు సమాయత్తమవుతున్న ఆంధ్రప్రదేశ్‌లోని దుర్గాదేవి భక్తులు, పూజా నిర్వాహకులకు రాష్ట్ర ప్రభుత్వం తీపి కబురు అందించింది. దసరా పండుగ ఉత్సవాలను ప్రజలంతా ఎంతో భక్తిశ్రద్ధలు, సంతోషాల మధ్య జరుపుకోవాలనే ఉద్దేశంతో కీలక నిర్ణయం తీసుకుంది. 2026 దసరా నవరాత్రుల సందర్భంగా రాష్ట్రవ్యాప్తంగా ఏర్పాటు చేసే దుర్గాదేవి పూజా మండపాలకు ఉచిత విద్యుత్ సరఫరా చేయనున్నట్లు మంత్రి నారా లోకేశ్ ఓ ప్రకటన విడుదల చేశారు.
ఈ నిర్ణయం ప్రకారం…. గ్రామాల్లోనూ, పట్టణాల్లోనూ ఉండే మండపాలకు నిర్ణీత పరిమితి మేర విద్యుత్‌ను ఉచితంగా అందజేస్తారు. గ్రామీణ ప్రాంతాల్లో ఏర్పాటు చేసే ప్రతి అధికారిక దుర్గాదేవి మండపానికి 3 కిలోవాట్ల (3 KW) వరకు ఉచిత విద్యుత్ సరఫరా అందుతుంది. అలాగే పట్టణ ప్రాంతాల్లోఏర్పాటు చేసే మండపాలకు 5 కిలోవాట్ల (5 KW) వరకు ఉచిత విద్యుత్‌ను సఫరా చేస్తారు.
పోలీసుల అనుమతి ఉంటేనే….
పండుగ వేళ భక్తులంతా ఒక్కటై దేవీ నవరాత్రులను ఘనంగా నిర్వహించుకునేలా ప్రోత్సహించేందుకే ఈ ఉచిత విద్యుత్ సదుపాయాన్ని కల్పించాలని ఏపీ సర్కార్ నిర్ణయించింది. ఆధ్యాత్మిక వాతావరణం ఉట్టిపడేలా గ్రామాలు, నగరాల్లో నిర్వాహకులు ఏర్పాటు చేసే కాంతులీనే లైటింగ్, మైక్ సిస్టమ్స్ మరియు ఇతర విద్యుత్ అవసరాలకు ఈ నిర్ణయం ఎంతో ఊరటనివ్వనుంది. అయితే తప్పకుండా మండపాల ఏర్పాటుకు పోలీసులు అనుమతి ఉండాలని ప్రభుత్వం స్పష్టం చేసింది. అలాంటి వాటికి మాత్రమే ఈ ఉచిత విద్యుత్ నిర్ణయం వర్తిస్తుందని పేర్కొంది.
దసరా ఉత్సవాల నిర్వహణలో ఆర్థిక భార తగ్గింపు దిశగా తీసుకున్న ఈ నిర్ణయంపై రాష్ట్రవ్యాప్తంగా ఉన్న దుర్గాపూజా కమిటీ నిర్వాహకులు హర్షం వ్యక్తం చేస్తున్నారు. భక్తులందరికీ రాష్ట్ర ప్రభుత్వం ఈ సందర్భంగా పండుగ శుభాకాంక్షలు తెలిపింది.
