ఏపీకి తీవ్ర తుపాను ముప్పు - అత్యవసర సహాయం కోసం టోల్ ఫ్రీ నెంబర్లు ఇవే

ఆంధ్రప్రదేశ్‌కు తుపాను ముప్పు పొంచి ఉన్న నేపథ్యంలో ప్రజలందరూ అప్రమత్తంగా ఉండాలని రాష్ట్ర విపత్తుల నిర్వహణ సంస్థ సూచించింది. ఈ మేరకు అత్యవసర మార్గదర్శకాలను జారీ చేశారు.

రాష్ట్రానికి తుపాను ముప్పు పొంచి ఉన్న నేపథ్యంలో ప్రజల ప్రాణ, ఆస్తి నష్టాలను నివారించేందుకు ప్రభుత్వం అన్ని రకాల ముందస్తు చర్యలు చేపట్టింది. ఈ క్రమంలో ప్రజలు అత్యంత అప్రమత్తంగా ఉండాలని… సూచించిన జాగ్రత్తలు తప్పనిసరిగా పాటించాలని ఆంధ్రప్రదేశ్ రాష్ట్ర విపత్తుల నిర్వహణ సంస్థ స్పష్టం చేసింది.

సంప్రదించాల్సిన టోల్ ఫ్రీ నంబర్లు:

తుపాను ముప్పు - కీలక సూచనలు

ఏదైనా అత్యవసర సహాయం లేదా సమాచారం కోసం ప్రజలు రౌండ్ ది క్లాక్ అందుబాటులో ఉండే స్టేట్ ఎమర్జెన్సీ ఆపరేషన్స్ సెంటర్ (SEOC) టోల్ ఫ్రీ నంబర్లను సంప్రదించవచ్చు అని పేర్కొంది.

• 112
• 1070
• 1800 425 0101

పాటించాల్సిన మార్గదర్శకాలు:

• సోషల్ మీడియాలో వచ్చే అనవసరమైన పుకార్లను ఎట్టి పరిస్థితుల్లోనూ నమ్మకూడదు. ప్రశాంతంగా ఉంటూ మానసిక ధైర్యాన్ని కాపాడుకోవాలి.
• అత్యవసర సమాచార మార్పిడి కోసం మొబైల్ ఫోన్‌లను నిరంతరం ఛార్జ్ చేసి ఉంచుకోవాలి. విపత్తుల నిర్వహణ సంస్థ పంపే హెచ్చరిక ఎస్ఎంఎస్ (SMS) లను ఎప్పటికప్పుడు గమనించాలి.
• రేడియో, టీవీ వార్తలు చూడటం మరియు వార్తాపత్రికలు చదవడం ద్వారా తాజా సమాచారాన్ని తెలుసుకోవాలి.
• ఆధార్, పాస్‌పోర్ట్, ఆస్తి పత్రాలు, విద్యా సంబంధిత సర్టిఫికెట్లను వాటర్ ప్రూఫ్ కవర్లలో భద్రపరుచుకోవాలి.
• టార్చ్ లైట్, మందులు, పొడి ఆహార పదార్థాలతో కూడిన అత్యవసర వస్తు సామగ్రిని ముందే సిద్ధం చేసుకోవాలి.
• ఇంటి పైకప్పును తనిఖీ చేసి, అవసరమైన మరమ్మతులు ఉంటే ముందే పూర్తి చేయాలి.
• లోతట్టు ప్రాంతాలు, వరదలు లేదా ఉప్పెన ముప్పు ఉన్న ప్రాంతాల ప్రజలు వెంటనే అధికారులు ఏర్పాటు చేసిన ఎత్తైన, సురక్షితమైన ఆశ్రయ ప్రాంతాలకు (షెల్టర్లకు) వెళ్లాలి.
• కనీసం ఒక వారానికి సరిపడా తాగునీరు, తడిసిపోని ఆహార పదార్థాలను నిల్వ ఉంచుకోవాలి.
• ఇంటి తలుపులు, కిటికీలను సురక్షితంగా మూసివేయాలి. అధికారులు సూచించిన వెంటనే సురక్షిత ప్రాంతాలకు తరలివెళ్లాలి.

తుపాను సమయంలో (ఇంట్లో ఉంటే):

• ప్రమాదాలను నివారించడానికి ఇంట్లోని ఎలక్ట్రికల్ మెయిన్ స్విచ్ ఆఫ్ చేయాలి; గ్యాస్ సిలిండర్ కనెక్షన్లను తొలగించాలి.
• ఈదురు గాలుల ధాటికి అద్దాలు పగలకుండా తలుపులు, కిటికీలను మూసి ఉంచాలి.
• మీరు నివసించే భవనం సురక్షితం కాదని భావిస్తే, ముందే సురక్షిత రీతిలో ఉన్న ప్రభుత్వ షెల్టర్‌కు చేరుకోవాలి.
• నీటి ద్వారా వచ్చే వ్యాధులను నివారించడానికి కాచి చల్లార్చిన లేదా క్లోరినేషన్ చేసిన నీటిని మాత్రమే తాగాలి.
• ఒకవేళ భవనం దెబ్బతినే సూచనలు కనిపిస్తే, స్వయంగా రక్షణ కోసం ఒక బలమైన టేబుల్ లేదా బెంచ్ కింద దాక్కోవాలి.

తుపాను సమయంలో (బయట ఉంటే):

• దెబ్బతిన్న, శిథిలావస్థలో ఉన్న లేదా పాత భవనాల్లోకి ఆశ్రయం కోసం వెళ్లవద్దు.
• భారీ గాలులు వీచేటప్పుడు చెట్లు, విద్యుత్ స్తంభాలు మరియు ప్రకటనల హోర్డింగ్‌ల కింద ఎప్పుడూ నిలబడవద్దు.
• గాలుల తీవ్రత తగ్గినా తుపాను ముగిసిందని భావించవద్దు. అధికారులు అధికారికంగా 'ఆల్ క్లియర్' ప్రకటించే వరకు బయటకు రాకూడదు.

తుపాను తదుపరి చర్యలు….

• నీటిని కాచి చల్లార్చిన తర్వాత మాత్రమే తాగాలి.
• అధికారులు స్పష్టమైన సమాచారం ఇచ్చే వరకు షెల్టర్లను వదిలి ఇళ్లకు వెళ్లకూడదు.
• రోడ్లపై తెగిపడిన విద్యుత్ తీగలు, విరిగిన స్తంభాల పట్ల తీవ్ర జాగ్రత్త వహించాలి; వాటికి దూరంగా ఉండాలి.
• నీటిలో తడిసిన ఎలక్ట్రానిక్ వస్తువులను ఎలక్ట్రీషియన్ ద్వారా పూర్తిగా తనిఖీ చేయించిన తర్వాతే తిరిగి వాడాలి.