అమరావతి, అరకు లోయలో ప్రధాన పర్యాటక ప్రాజెక్టులకు ప్రోత్సాహకాలు!

పర్యాటక రంగాన్ని ప్రోత్సహించేందుకు ఏపీ ప్రభుత్వం కీలక చర్యలు తీసుకుంటోంది. ఇందులో భాగంగా కీలక ప్రాజెక్టులకు ప్రోత్సహకాలు అందిస్తోంది.

పర్యాటక రంగంలో ప్రైవేట్ పెట్టుబడులను ఆకర్షించడానికి ఏపీ ప్రభుత్వం ప్రోత్సాహకాలను ఆమోదించింది. రాష్ట్ర పర్యాటక విధానం 2024-2029 కింద వివిధ ప్రధాన ప్రాజెక్టులకు ప్రతిపాదనలను ఆమోదించింది. వీటిలో అమరావతిలోని లగ్జరీ హోటళ్లు, అరకు లోయలోని ఒక ఎకో-లగ్జరీ రిసార్ట్ ఉన్నాయి.

ప్రతీకాత్మక చిత్రం

అమరావతిలో రూ.177 కోట్లతో కోర్ట్ యార్డ్ బై మారియట్ హోటల్‌ను అభివృద్ధి చేయడానికి మెస్సర్స్ సదరన్ గ్లోబ్ హోటల్స్ & రిసార్ట్స్ లిమిటెడ్‌కు ప్రోత్సాహకాలు మంజూరు అయ్యాయి. దీనికి 10 సంవత్సరాల పాటు 100 శాతం నికర ఎస్‌జీఎస్టీ రీయింబర్స్‌మెంట్ లేదా స్థిర మూలధన పెట్టుబడి తిరిగి పొందే వరకు, 10 శాతం మూలధన పెట్టుబడి సబ్సిడీని రూ.10 కోట్లకు పరిమితం చేయడం, స్టాంప్ డ్యూటీ మినహాయింపు, పరిశ్రమ-రేటు విద్యుత్, ఆస్తి పన్ను ప్రయోజనాలు వంటి ప్రోత్సాహకాలు అందిస్తారు. ఈ ప్రాజెక్టు దాదాపు 600 ఉద్యోగాలను సృష్టిస్తుందని, 24 నెలల్లో పూర్తవుతుందని అంచనా.

అమరావతిలో రూ.200 కోట్లతో 4-స్టార్ దస్పల్లా హోటల్‌ను ప్లాన్ చేస్తున్న దస్పల్లా అమరావతి హోటల్స్ ప్రైవేట్ లిమిటెడ్ కూడా ఇలాంటి ప్రోత్సాహకాలను పొందింది. వాటిలో ఎస్జీఎస్టీ రీయింబర్స్‌మెంట్, స్టాంప్ డ్యూటీ ప్రయోజనాలు, విద్యుత్ సబ్సిడీలు ఉన్నాయి. దీనితో 400 మందికి ఉపాధి లభిస్తుంది. ప్రాజెక్ట్ కాలక్రమం 24 నెలలుగా నిర్ణయించారు.

అరకు లోయలో రూ.55.84 కోట్ల విలువైన పర్యావరణ రిసార్ట్‌ను అభివృద్ధికి మెస్సర్స్ వీఎస్‌కే హోటల్స్ & రిసార్ట్స్ ఎల్ఎల్‌పీకి ప్రోత్సాహకాలు అందుతున్నాయి. ప్రోత్సాహకాలలో 100 శాతం ఎస్‌జీఎస్టీ రీయింబర్స్‌మెంట్, ఐదు విడతల్లో రూ.10 కోట్ల స్థిర మూలధన సబ్సిడీ, ఐదు సంవత్సరాల పాటు విద్యుత్ సుంకం రీయింబర్స్‌మెంట్, సింగిల్ విండో మద్దతు ఉన్నాయి. ఈ ప్రాజెక్ట్ 98 ప్రత్యక్ష ఉద్యోగాలను, 100 పరోక్ష ఉద్యోగాలను సృష్టించవచ్చు.