కూకట్‌పల్లిలో తీవ్ర అగ్నిప్రమాదం - గోడౌన్లకు వ్యాపించిన మంటలు, వాహనాలు దగ్ధం!

హైదరాబాద్‌లోని కూకట్‌పల్లి పోలీస్ స్టేషన్ పరిధిలో ఆస్బెస్టాస్ కాలనీలో పేపర్ టీ కప్పులు, ప్లేట్ల తయారీ పరిశ్రమలో భారీ అగ్నిప్రమాదం చోటుచేసుకుంది.ఐదు ఆటోలు, ఒక డీసీఎం వాహనం కాలిపోయాయి.

హైదరాబాద్‌ నగర పరిధిలోని కూకట్‌పల్లిలో శనివారం తీవ్ర అగ్నిప్రమాదం చోటుచేసుకుంది. స్థానిక పీఎస్ పరిధిలోని ఆస్బెస్టాస్ కాలనీలో ఉన్న ఒక పారిశ్రామిక ప్రాంతంలో అకస్మాత్తుగా భారీగా మంటలు చెలరేగాయి. క్షణాల వ్యవధిలోనే అగ్నికీలలు పక్కనే ఉన్న పరిశ్రమలకు, గోదాములకు వ్యాపించడంతో తీవ్ర కలకలం రేగింది.

అగ్నిప్రమాదం

ఆస్బెస్టాస్ కాలనీలోని ఒక పేపర్ కప్పుల తయారీ యూనిట్‌లో మొదట మంటలు ప్రారంభమయ్యాయి. కాగితపు వ్యర్థాలు, ఇతర దహనశీల పదార్థాలు ఎక్కువగా ఉండటంతో మంటలు వేగంగా పక్కనే ఉన్న ప్రముఖ వ్యాపార సంస్థల గోదాములకు దట్టంగా అల్లుకున్నాయి. పక్కనే ఉన్న జీఆర్‌టీ నెయ్యి గోదాము, హల్దీరామ్స్ కంపెనీలకు చెందిన గోదాములకు మంటలు వ్యాపించడంతో నష్టం తీవ్ర రూపం దాల్చింది.

ఈ ఘోర ప్రమాదంలో మొత్తం 3 పారిశ్రామిక యూనిట్లు తీవ్రంగా దెబ్బతిని కాలి బూడిదయ్యాయి. కేవలం గోదాములు, పరిశ్రమల భవనాలే కాకుండా అక్కడ నిలిపి ఉంచిన రవాణా వాహనాలు కూడా నిప్పుల రొంపిలో చిక్కుకున్నాయి. ప్రాంగణంలో ఉన్న 5 ఆటోలు, ఒక డీసీఎం సరుకుల వాహనం పూర్తిగా అగ్నికి ఆహుతై భస్మీపటలమయ్యాయి. ప్రమాద తీవ్రత కారణంగా పరిసర ప్రాంతాల్లో దట్టమైన పొగలు అలుముకోవడంతో స్థానిక ప్రజలు తీవ్ర భయాందోళనలకు గురయ్యారు.

ప్రమాదం గురించిన సమాచారం అందుకున్న వెంటనే అగ్నిమాపక శాఖ అధికారులు నివారణ చర్యలు చేపట్టారు. పలు ఫైరింజన్లను ఘటనా స్థలానికి తరలించి మంటలను అదుపు చేసేందుకు శ్రమించారు. అటు హైడ్రా (HYDRAA) విపత్తు నిర్వహణ బృందాలు కూడా వెంటనే రంగంలోకి దిగి సహాయక చర్యల్లో పాల్గొన్నాయి. శ్రమించి మంటలు పరిసర నివాస ప్రాంతాలకు విస్తరించకుండా అదుపు చేయగలిగారు.

షార్ట్ సర్క్యూటే కారణామా..?

ఈ అగ్నిప్రమాదానికి ప్రాథమికంగా విద్యుత్ షార్ట్ సర్క్యూటే ప్రధాన కారణమని పోలీసులు అంచనా వేస్తున్నారు. అయితే ప్రమాద సమయంలో లోపల ఉన్న కార్మికులు క్షేమంగా బయటపడటంతో ప్రమాద తీవ్రతకు తగ్గట్టు ప్రాణనష్టం తప్పిందని భావిస్తున్నారు. ఆస్తి నష్టం అంచనాపై పోలీసులు, ఫైర్ అధికారులు విచారణ వేగవంతం చేశారు.