E-Paper
INS Nipun : హెచ్ఎస్ఎల్ మరో ఘనత - భారత నావికాదళానికి ‘నిపుణ్’, వ్యూహాత్మక శక్తికి కొండంత బలం!
స్వదేశీ పరిజ్ఞానంతో హిందుస్థాన్ షిప్యార్డ్ లిమిటెడ్ (HSL) రూపొందించిన డైవింగ్ సపోర్ట్ వెసెల్ 'నిపుణ్' నౌకను భారత నౌకాదళానికి అందజేసింది. ఇది భారత సముద్రగర్భ భద్రతా సామర్థ్యాన్ని మరింత పెంచనుంది.
INS Nipun : భారత సముద్రగర్భ వ్యూహాత్మక సామర్థ్యం, నావికాదళ సముద్ర భద్రతా సన్నద్ధత మరింత బలపడ్డాయి. విశాఖపట్నంలోని ప్రముఖ ప్రభుత్వ రక్షణ రంగ సంస్థ 'హిందుస్థాన్ షిప్యార్డ్ లిమిటెడ్' (HSL) తమ నౌకా నిర్మాణ కేంద్రంలో రూపొందించిన అత్యంత ఆధునిక డైవింగ్ సపోర్ట్ వెసెల్ (DSV) 'నిపుణ్' నౌకను శుక్రవారం భారత నౌకాదళానికి అధికారికంగా అందజేసింది.
గతేడాదే 'ఐఎన్ఎస్ నిస్తార్' అనే నౌకను విజయవంతంగా తయారు చేసి భారత నావికాదళానికి అందించిన హిందుస్థాన్ షిప్యార్డ్… కేవలం ఏడాది వ్యవధిలోనే మరో సంక్లిష్టమైన యుద్ధనౌక 'నిపుణ్'ను పూర్తి చేసి రక్షణ రంగానికి అప్పగించడం విశేషం. స్వదేశీ నౌకా నిర్మాణ రంగంలో భారతదేశం సాధిస్తున్న అపారమైన పురోగతికి ఇది నిదర్శనంగా నిలుస్తోంది. అత్యంత సంక్లిష్టమైన వ్యూహాత్మక నౌకా వేదికలను సమర్థవంతంగా నిర్మించడంలో హెచ్ఎస్ఎల్ తన ప్రత్యేకతను మరోసారి చాటుకుంది.
విశాఖపట్నంలో జరిగిన ఈ చారిత్రాత్మక కార్యక్రమంలో భారత నౌకాదళ ఉన్నతాధికారి, వెస్ట్రన్ నేవల్ కమాండ్ సీఎస్ఓ (టెక్), D448 కమిటీ చైర్మన్ రియర్ అడ్మిరల్ అర్వింద్ రావల్ (వీఎస్ఎమ్), హిందుస్థాన్ షిప్యార్డ్ లిమిటెడ్ ఛైర్మన్ మరియు మేనేజింగ్ డైరెక్టర్ రియర్ అడ్మిరల్ చంద్రశేఖరన్ రఘురాం (రిటైర్డ్, వీఎస్ఎమ్) పాల్గొని నిపుణ్ డెలివరీకి సంబంధించిన అధికారిక ఒప్పంద పత్రాలపై సంతకాలు చేశారు.
‘నిపుణ్’ నౌక ప్రత్యేకతలు, సాంకేతిక సామర్థ్యాలు
- భారత నౌకాదళంలో చేరిన 'ఐఎన్ఎస్ నిపుణ్' అనేక ఆధునిక రక్షణ, సహాయక సామర్థ్యాలను కలిగి ఉంది.
- ఈ నౌక పొడవు 118 మీటర్లు కాగా, ఇది సుమారు 8,560 టన్నుల బరువు (డిస్ప్లేస్మెంట్) కలిగి ఉంటుంది.
- ఈ భారీ నౌక తయారీకి కావలసిన సామాగ్రిలో ఏకంగా 80 శాతానికి పైగా స్వదేశీ పరిజ్ఞానాన్ని, ఉత్పత్తులనే ఉపయోగించారు.
- డైనమిక్ పొజిషనింగ్, సాచ్యురేషన్ డైవింగ్, సబ్మెరైన్ రెస్క్యూ (సబ్మెరైన్ ప్రమాదాల్లో చిక్కుకున్న వారిని కాపాడటం) మరియు డీప్-సీ ఇంటర్వెన్షన్ (సముద్రంలో అత్యంత లోతైన ప్రాంతాల్లో కార్యకలాపాలు) వంటి సంక్లిష్టమైన విధులను ఇది నిర్వర్తిస్తుంది.
కేంద్ర ప్రభుత్వం, భారత నావికాదళం, హిందుస్థాన్ షిప్యార్డ్ సంస్థల ఉమ్మడి ఆకాంక్ష అయిన 'ఆత్మనిర్భర్ భారత్', 'మేక్ ఇన్ ఇండియా' సంకల్పానికి నిపుణ్ నిర్మాణం ఒక నిలువెత్తు నిదర్శనమని అధికారులు అభిప్రాయపడ్డారు. విదేశాలపై ఆధారపడటాన్ని తగ్గించి, సొంతంగా సముద్రగర్భ ప్రతిఘటన శక్తిని పెంపొందించుకోవడంలో ఈ నౌక కీలక పాత్ర పోషిస్తుందని ధీమా వ్యక్తం చేశారు.
