గ్రామానికి చేరుకోలేకపోయిన అంబులెన్స్.. పోలీస్ జీపులో ఆసుపత్రికి గర్బిణి.. కవలలు జననం!

మెుంథా తుపానుతో వాగులు, వంకలు పొంగిపొర్లాయి. దీంతో అంబులెన్సు రాక ఇబ్బంది పడుతున్న గర్భిణిని పోలీసు జీపులో ఆస్పత్రికి తరలించారు. ఆమె కవలలకు జన్మనిచ్చారు.

ఆంధ్రప్రదేశ్‌లో మెుంథా తుపాను ప్రభావంతో భారీగా పడింది. దీంతో చాలా ప్రాంతాల్లో రాకపోకలకు ఇబ్బందులు అయ్యాయి. తుపానుతో వాగులు, వంకల్లో వరద నీరు భారీగా ప్రవహించింది. ఇదే సమయంలో బాపట్ల జిల్లాలో ఓ గర్భిణికి పురిటినొప్పులు వచ్చాయి. అంబులెన్స్ వచ్చే పరిస్థితి లేకపోవడంతో పోలీస్ జీపులో ఆసుపత్రికి తీసుకెళ్లారు. పూర్తి వివరాళ్లోకి వెళ్తే..

ప్రతీకాత్మక చిత్రం

మెంథా తుపాను సమయంలో చాలా గ్రామాలు వరదలో చిక్కుకున్నాయి. బాపట్ల జిల్లా ఇంకొల్లు మండలం కొణికి గ్రామ పంచాయతీలోని కట్టవారిపాలెం గ్రామంలో 24 ఏళ్ల కీర్తికి పురిటినొప్పులు వచ్చాయి. మెుంథా తుపాను కారణంగా కురిసిన భారీ వర్షాల కారణంగా వాగులు, వంకలు పొంగిపొర్లాయి. అత్యవసర సేవలకు పూర్తిగా అంతరాయం కలిగింది. 108 అంబులెన్స్ గ్రామాన్ని చేరుకోలేకపోయింది.

మెడికల్ ఎమర్జెన్సీ గురించి సమాచారం అందుకున్న ఎస్ఐ సురేష్, కొణికి గ్రామ మహిళా పోలీసు అధికారి ప్రియ, మహిళా హెడ్ కానిస్టేబుల్ బ్రహ్మేశ్వరి, హెడ్ గార్డ్ రామకృష్ణ వెంటనే సంఘటనా స్థలానికి చేరుకున్నారు. అంగన్‌వాడీ కార్యకర్త, మహిళా పోలీసు అధికారి సహాయంతో గర్భిణిని జాగ్రత్తగా తమ పోలీసు జీపులో ఎక్కించారు. తుపాను పరిస్థితుల మధ్య వరదలున్న ప్రాంతం గుండానే మెల్లగా ప్రయాణించి కీర్తిని ఇంకొల్లులోని ఓ ప్రైవేట్ ఆసుపత్రికి తీసుకెళ్లారు. అక్కడ ఆమె కవల పిల్లలను సురక్షితంగా ప్రసవించింది. తల్లి, శిశువులు సురక్షితంగా ఉన్నారు.

తెలంగాణలో

తెలంగాణలోని నల్గొండ జిల్లాలోనూ గర్భిణి ఇబ్బందులు ఎదుర్కోంది. దేవరకొండ మండలం మడమడక గ్రామంలో జట్టి దేవి ప్రసవ వేదనకు గురైంది. 108కి ఫోన్ చేసింది. చింతపల్లి నుంచి 108 సిబ్బంది వెంటనే స్పందించారు. అయితే ఓ వైపు భారీగా వర్షం పడుతుంది. మైనంపల్లి వాగు ప్రవహిస్తోంది.

దీంతో చింతపల్లి 108 సిబ్బంది రవి నాయక్, సైదులు గర్భిణిని స్ట్రెచర్ మీద వాగు దాటించారు. తర్వాత సురక్షితంగా దేవరకొండ ఏరియా ఆసుపత్రికి తరలించారు. గర్భిణి కుటుంబ సభ్యులు, స్థానికులు 108 సిబ్బందిని అభినందించారు.