అనకాపల్లి జిల్లాలో తీవ్ర విషాదం చోటుచేసుకుంది. ఎస్.రాయవరం మండలం పెనుగొల్లు సమీపంలోని వరాహ నదిలో స్నానానికి దిగి గల్లంతైన ముగ్గురు యువకులు మృత్యువాత పడ్డారు. ఆదివారం ఉదయం నదిలో తేలియాడుతున్న వారి మృతదేహాలను స్థానికులు, పోలీసులు కలిసి బయటకు వెలికితీశారు. అప్పటివరకు తమ బిడ్డలు క్షేమంగా తిరిగి వస్తారని ఆశగా ఎదురుచూసిన తల్లిదండ్రులు, కుటుంబ సభ్యులు విగతజీవులుగా మారిన యువకులను చూసి కన్నీరుమున్నీరుగా విలపించారు. ఈ ఘటనతో పెనుగొల్లు గ్రామంలో విషాద ఛాయలు అలుముకున్నాయి.
ఏం జరిగిందంటే….?
శనివారం ఆరుగురు యువకులు సరదాగా స్నానం చేసేందుకు పెనుగొల్లు వద్ద ఉన్న వరాహ నదిలోకి దిగారు. అయితే నదిలో నీటి ప్రవాహం, లోతు అంచనా వేయలేక వారు ప్రమాదంలో చిక్కుకున్నారు. ఆరుగురిలో ముగ్గురు యువకులు ఈదుకుంటూ సురక్షితంగా ఒడ్డుకు చేరుకోగలిగారు. కానీ కాతేటి రిషి (18), ముప్పిడి నాగవంశీ (22), కోడి జగదీశ్ (20) నీటి ఉధృతికి కొట్టుకుపోయి గల్లంతయ్యారు. సమాచారం అందుకున్న వెంటనే పోలీసులు, స్థానికులు నదిలో ముమ్మరంగా గాలింపు చర్యలు చేపట్టారు. రాత్రి వరకు వెతికినా వారి ఆచూకీ లభించలేదు.
ఆదివారం(ఇవాళ) తెల్లవారుజామున మళ్లీ గాలింపు ప్రారంభించగా…. ముగ్గురు యువకుల మృతదేహాలు నదిలో తేలియాడుతూ కనిపించాయి. స్థానిక మత్స్యకారులు, పోలీసుల సాయంతో మృతదేహాలను ఒడ్డుకు చేర్చారు. చేతికి అందివచ్చిన యువకులు ఇలా అకాల మరణం చెందడంతో కుటుంబ సభ్యుల రోదనలు మిన్నంటాయి.
కేసు నమోదు చేసుకున్న పోలీసులు…. పోస్టుమార్టం నిమిత్తం మృతదేహాలను ప్రభుత్వ ఆస్పత్రికి తరలించారు. నిరుపేద కుటుంబాలకు చెందిన ఈ ముగ్గురు యువకుల మృతితో ఆయా కుటుంబాలు దిక్కుతోచని స్థితిలో పడ్డాయని, ప్రభుత్వం తక్షణమే స్పందించి మృతుల కుటుంబాలకు తగిన ఆర్థిక పరిహారం అందించాలని కాలనీవాసులు అధికారులను కోరారు.