విశాఖ జిల్లాలో తెల్లవారుజామున భూప్రకంపనలు.. అక్కడ భూకంప కేంద్రం!

ఆంధ్రప్రదేశ్‌‌లోని విశాఖ జిల్లాలో భూకంపం సంభవించింది. దీంతో జనాలు బయటకు పరుగులు తీశారు.

ఆంధ్రప్రదేశ్‌లోని విశాఖపట్నం జిల్లాలోని పలు ప్రాంతాల్లో భూకంపం సంభవించింది. విశాఖపట్నం, సింహాచలంలో భూమి స్వల్పంగా కంపించింది. తెల్లవారుజామున 4:19 గంటల సమయంలో భూప్రకంపనలు వచ్చాయి. ముఖ్యంగా విశాఖ వాసులు ఎక్కువగా భూకంపం చూశారు. విశాఖలోని పలు ప్రాంతాల్లో భూమి కంపించింది.

ప్రతీకాత్మక చిత్రం

ఈ సమయంలో శబ్ధం రావడంతో ప్రజలు ఇళ్ల నుంచి బయటకు పరుగులు తీశారు. విశాఖపట్టణంలోని పలు ప్రాంతాల్లో.. అరిలోవ, అడవివరం, మాధవధార, అక్కయ్యపాలెం, హెచ్‌బీ కాలనీ, అల్లిపురం, ఎండాడ, భీమిలి, పెందూర్తిలో తెల్లవారుజామున 4:19 గంటల సమయంలో భూప్రకంపనలు వచ్చాయి. పెద్ద శబ్ధంతో భీమిలి బీచ్‌ రోడ్డులో భూమి కంపించింది.

మరోవైపు సింహాచలంలోనూ.. భూప్రకంపనలు వచ్చాయి. దీంతో జనాలు ఇళ్ల నుంచి బయటకు పరుగులు తీశారు. భూ కంపం వచ్చిన సమయంలో పెద్ద శబ్ధాలు వచ్చినట్టుగా స్థానికులు చెబుతున్నారు. ఒక్కసారిగా భూమి కంపించేసరికి.. విశాఖవాసులు కలవరపడ్డారు. ఇళ్లలోని సామాన్లు కింద పడినట్టుగా వెళ్లడించారు. ఈ స్వల్ప భూప్రకంపనలతో ఎలాంటి ప్రాణ, ఆస్తి నష్టం జరగలేదు.

రిక్టర్ స్కేలుపై భూకంపం తీవ్రత 3.7గా నమోదైంది. అల్లూరి సీతారామరాజు జిల్లాల్లోనూ భూ ప్రకంపనలు వచ్చాయి. జి.మాడుగులలో భూకంప కేంద్రాన్ని గుర్తించారు. కొన్ని రోజుల కిందట గుంటూరు, ప్రకాశంతోపాటు మరికొన్ని ప్రాంతాల్లో భూమి స్వల్పంగా కంపించింది. అదే సమయంలో ఖమ్మం, వరంగల్ జిల్లాల్లోనూ తేలికపాటి భూకంపం సంభవించింది.