E-Paper
సినీ ఇండస్ట్రీలో 40 ఏళ్లు పూర్తి.. 5 సినిమాల్లో హీరో, 170 ముఖ్య పాత్రలు.. సీనియర్ నటుడు చిట్టి అసలు పేరు ఇదే!
తెలుగు సినీ ఇండస్ట్రీలో 40 ఏళ్లు పూర్తి చేసుకున్నారు సీనియర్ నటుడు చిట్టి. ప్రస్తుతం మెగాస్టార్ చిరంజీవి, అనిల్ రావిపూడి కాంబినేషన్లో వస్తున్న మూవీలో మంచి పాత్ర చేసినట్లు ఆయన ఈ సందర్భంగా తెలిపారు. 5 సినిమాల్లో హీరోగా కూడా చేసిన నటుడు చిట్టి అసలు పేరు ఏంటీ అనేది ఆయన చెప్పుకొచ్చారు.
తెలుగు సినీ ఇండస్ట్రీలో ఎంతోమంది గొప్ప నటీనటులు ఉన్నారు. కానీ, వారికి ఆశించినంత స్థాయిలో సరైన గుర్తింపు దక్కలేదు. వారు ప్రతి సినిమాల్లో ఏదో ఒక పాత్రతో అలరిస్తూనే ఉంటారు. అలాంటి వారిలో సీనియర్ నటుడు చిట్టి ఒకరు.
40 ఏళ్లు పూర్తి
ఎందరో హీరోలతో కలిసి ముఖ్య పాత్రలు పోషించిన నటుడు చిట్టి సినీ పరిశ్రమలోకి అడుగుపెట్టి 40 ఏళ్లు పూర్తి చేసుకున్నారు. నటుడిగా 40 ఏళ్లు పూర్తి చేసుకున్న చిట్టి ఈ సందర్భంగా ఆయన అసలు పేరు, చేసిన పాత్రల గురించి తెలిపారు.
తల్లిదండ్రులు పెట్టిన పేరు
టాలీవుడ్ ఇండస్ట్రీలో 40 ఏళ్లు పూర్తి చేసుకున్న నటుడు చిట్టి మాట్లాడుతూ.. "నేను కళామ్మతల్లి కి నేను ఎంతో రుణపడి ఉన్నాను. అందరూ నన్ను చిట్టి.. చిట్టి అనడంతో నా స్రీన్ నేమ్ చిట్టిగా మారింది. కానీ, నాకు తల్లిదండ్రులు పెట్టిన పేరు మాత్రం చందన లక్ష్మీ నరసింహారావు" అని అన్నారు.
"చిత్ర పరిశ్రమ మద్రాస్ నుంచి హైదరాబాద్కి వచ్చినప్పటి నుండి ఆనాటి డైరెక్టర్స్ నుండి ఈ రోజు దర్శకుల వరకు అందరితో నేను పని చేసాను. నాకు పాత్రలు రాసిన రైటర్స్కి, పాత్రలు ఇచ్చిన డైరెక్టర్స్కి ప్రతి ఒక్కరికి పేరు పేరునా ధన్యవాదాలు" అని చిట్టి తెలిపారు.
హీరోగా ఐదు సినిమాల్లో
"పరిశ్రమలో ఉన్న హీరోలు అందరితో కలిసి వెండితెరని పంచుకోవడం నా అదృష్టం. ఇప్పటి వరకు 5 సినిమాల్లో హీరోగా చేసాను, 170 సినిమాల్లో ముఖ్య పాత్రల్లో నటించాను. కొన్ని ఓటీటీ వెబ్ సిరీస్లో అలా తెలుగు, తమిళ్, కన్నడ భాషల్లో నటించిన నేను నేటికి 40 ఏళ్ల సినీ ప్రస్థానంలో ఎన్నో అవార్డులు, ప్రశంసలు పొందడం చాలా సంతోషంగా ఉంది" అని నటుడు చిట్టి వెల్లడించారు.
"పచ్చని సంసారం, రౌడీ అన్నయ్య, మాస్టర్, గౌతమ్ SSC, ఠాగూర్, రణం, ఇష్క్, పోకిరి, క్రాక్, లెజెండ్, అఖండ, సరిలేరు నీకెవ్వరూ, వీరసింహ రెడ్డి, భగవంత్ కేసరి, సంక్రాంతికి వస్తున్నాం ఇలా నేను నటించిన చాలా సినిమాలు హిట్ అయ్యాయి" అని చిట్టి పేర్కొన్నారు.
చిరంజీవి సినిమాలో
"ప్రస్తుతం మెగాస్టార్ చిరంజీవి గారు అండ్ అనిల్ రావిపూడి సినిమాలో మంచి పాత్రలో నటించాను. కొత్త తరం పరిశ్రమకి రావాలి, కొత్త ఆలోచనలతో , కొత్త కథలతో ఎన్నో సినిమాలు రావాలి. చిత్ర పరిశ్రమ ఇంకా అభివృద్ధి చెందాలి" అని చిట్టి కోరుకున్నారు.
"అలానే కొత్త, పాత దర్శకులకి మా లాంటి సీనియర్ నటుల సపోర్ట్ ఎల్లప్పుడూ ఉంటుంది. మరొకసారి ఇప్పటి వరకు నాకు అవకాశాలు ఇచ్చిన ప్రతి నిర్మాతకు, దర్శకులకి, హీరోలకి ప్రత్యేక ధన్యవాదాలు" అని నటుడు చిట్టి తన మనసులోని భావాలను బయటపెట్టారు.
