అఖండ 2 టీజర్.. మరోసారి బాలయ్య, బోయపాటి విశ్వరూపం.. బర్త్ డే గిఫ్ట్ అదిరింది

అఖండ 2 టీజర్ వచ్చేసింది. నందమూరి బాలకృష్ణ బర్త్ డే సందర్భంగా ఒకరోజు ముందే మేకర్స్ ఈ టీజర్ రిలీజ్ చేశారు. మరోసారి సిల్వర్ స్క్రీన్ పై బాలయ్య, బోయపాటి కాంబినేషన్ సృష్టించబోయే రక్తపాతానికి ఈ టీజర్ అద్దం పడుతోంది.

బాలకృష్ణ, బోయపాటి శ్రీను కలిశారంటే బొమ్మ బ్లాక్‌బస్టరే. ఈ సూపర్ హిట్ జోడీ మరోసారి అదే మ్యాజిక్ రిపీట్ చేయడానికి అఖండ 2తో ప్రేక్షకుల ముందుకు వస్తున్నారు. తాజాగా సోమవారం (జూన్ 9) అదిరిపోయే టీజర్ రిలీజ్ చేశారు. మంగళవారం (జూన్ 10) బాలయ్య బాబు బర్త్ డే ఉండటంతో ఒక రోజు ముందే టీజర్ రావడం విశేషం. ఇందులో మరోసారి బాలకృష్ణ నట విశ్వరూపం చూపించేశాడు.

అఖండ 2 టీజర్.. మరోసారి బాలయ్య, బోయపాటి విశ్వరూపం.. బర్త్ డే గిఫ్ట్ అదిరింది

అఖండ 2 టీజర్

ఈ ఏడాది దసరా సందర్భంగా రిలీజ్ కాబోతున్న మూవీ అఖండ 2. అయితే సుమారు మూడున్నర నెలల ముందే బాలకృష్ణ 65వ బర్త్ డేకు ఒకరోజు ముందు ఈ మూవీ టీజర్ వచ్చేసింది. బాలయ్య, బోయపాటి కాంబినేషన్ లో అభిమానులు ఆశించే అన్ని ఎలిమెంట్స్ ఇందులో ఉండబోతున్నట్లు టీజర్ చూస్తేనే స్పష్టమవుతోంది. పొడవాటి గడ్డం, చేతిలో త్రిశూలంతో బాలయ్య లుక్ చాలా పవర్‌ఫుల్ గా కనిపించింది.

ఒకేసారి ఐదారు మంది రౌడీలను గాల్లోకి ఎత్తి పారేయడమే కాదు.. తన చేతిలోని త్రిశూలాన్ని మెడ చుట్టూ తిప్పుతూ వాళ్ల గొంతు కోసే సీన్ తో బోయపాటి టీజర్లోనే తన మార్క్ మాస్ యాక్షన్ ఎపిసోడ్ ను క్రియేట్ చేశాడు. నా శివుడి అనుమతి లేనిదే.. ఆ యముడైనా కన్నెత్తి చూడడు.. నువ్వు చూస్తావా.. అమాయకుల ప్రాణాలు తీస్తావా అంటూ బాలయ్య ఓ పవర్‌ఫుల్ డైలాగ్ కూడా చెబుతాడు. ఇక తమన్ బీజీఎం కూడా ఈ టీజర్ ను మరో లెవెల్ కు తీసుకెళ్లింది.

అఖండ 2 మూవీ గురించి..

అఖండ 2 మూవీ ఈ ఏడాది సెప్టెంబర్ 25న థియేటర్లలో రిలీజ్ కానుంది. డిసెంబర్, 2021లో రిలీజైన అఖండ మూవీకి ఇది సీక్వెల్ గా వస్తోంది. అప్పట్లో ఆ మూవీ ఓ సంచలనం. గతేడాదే ఈ మూవీకి సీక్వెల్ ను అనౌన్స్ చేశారు. దీంతో బాలయ్య బాబు అభిమానుల్లో దీనిపై అంచనాలు భారీగా పెరిగిపోయాయి.

ఇప్పుడు వచ్చిన టీజర్ ఆ అంచనాలను మరో స్థాయికి తీసుకెళ్లాయి. బాలకృష్ణ, బోయపాటి మూవీలోని అన్ని కమర్షియల్ మాస్ మసాలా హంగులన్నీ అఖండ 2లో ఉండబోతున్నట్లు టీజర్ చూస్తే స్పష్టమవుతోంది. బాలయ్య అభిమానులకు ఒకరోజు ముందే అందిన బర్త్ డే గిఫ్ట్ అదిరిపోయిందని చెప్పొచ్చు.