అఖిల్ పెళ్లికి సీఎం రేవంత్‍ను ఆహ్వానించిన నాగార్జున, అమల.. వివాహం ఎప్పుడంటే!

అక్కినేని అఖిల్ త్వరలో పెళ్లి చేసుకోనున్నారు. ఈ వివాహ వేడుకకు తెలంగాణ సీఎం రేవంత్ రెడ్డిని ఆహ్వానించారు నాగార్జున, అమల. అమ్మాయి తల్లిదండ్రులు కూడా వారి వెంట ఉన్నారు.

అక్కినేని ఇంట పెళ్లిబాజాలు అతిత్వరలో మోగనున్నాయి. కింగ్ నాగార్జున చిన్న కుమారుడు, హీరో అక్కినేని అఖిల్ వివాహం జూన్‍లోనే జరగనుంది. తన ప్రేయసి జైనాబ్ రవ్ద్‌జీని అఖిల్ పెళ్లాడనున్నారు. గతేడాది నవంబర్‌లోనే వీరి ఎంగేజ్‍మెంట్ జరిగింది. ఇప్పుడు వివాహానికి సిద్ధమవుతున్నారు. ఈ తరుణంలో అఖిల్ పెళ్లికి తెలంగాణ ముఖ్యమంత్రి రేవంత్ రెడ్డిని కింగ్ నాగార్జున, అమల ఆహ్వానించారు.

అఖిల్ పెళ్లికి సీఎం రేవంత్‍ను ఆహ్వానించిన నాగార్జున, అమల.. వివాహం ఎప్పుడంటే!

సీఎంను కలిసిన ఇరు కుటుంబాల పెద్దలు

అఖిల్ - జైనాబ్‍ల పెళ్లికి ఇరు కుటుంబాల పెద్దలు.. సీఎం రేవంత్ రెడ్డికి ఆహ్వానం పలికారు. అఖిల్ తల్లిదండ్రులు అక్కినేని నాగార్జున, అమలతో పాటు జైనాబ్ పేరెంట్స్ నేడు (మే 31) రేవంత్‍ను కలిశారు. జూబ్లిహిల్స్‌లోని ఆయన నివాసానికి వెళ్లి ఆహ్వానించారు. ఇందుకు సంబంధించిన ఫొటోలు బయటికి వచ్చాయి.

పెళ్లి తేదీ, వేదిక ఇవే!

అఖిల్, జైనాబ్ పెళ్లి వేడుక జూన్ 6వ తేదీన జరుగుతుందని సమాచారం. హైదరాబాద్‍లోని అన్నపూర్ణ స్టూడియోస్ వేదికగా ఈ వేదిక జరగనుందని తెలుస్తోంది. అయితే, ఈ విషయాలపై అధికారికంగా ప్రకటన రావాల్సి ఉంది. గతేడాది అక్కినేని నాగచైతన్య, శోభితా దూళిపాళ్ల వివాహం కూడా అన్నపూర్ణ స్టూడియోస్‍లోనే జరిగింది.

ఎన్‍ కన్వెన్షన్ వివాదం

కాగా, గతేడాది తెలంగాణ సీఎంగా రేవంత్ రెడ్డి బాధ్యతలు చేపట్టిన తర్వాత నాగార్జునకు చెందిన ఎన్ కన్వెన్షన్ కూల్చివేత హాట్ టాపిక్ అయింది. ఈ విషయంపై ప్రభుత్వానికి వ్యతిరేకంగా కోర్టును కూడా నాగార్జున ఆశ్రయించారు. కూల్చివేత సరికాదనేలా ట్వీట్ కూడా చేశారు. ప్రతిపక్షాలు కూడా ఎంటర్ అవ్వడంతో ఈ అంశం అప్పట్లో రాజకీయ మలుపు కూడా తీసుకుంది. అయితే, కొన్నాళ్లకు ఇది సద్దుమణిగింది. ఇప్పుడు సీఎం రేవంత్‍ను స్వయంగా కలిసి అఖిల్ పెళ్లికి ఆహ్వానించారు నాగార్జున.

లెనిన్‍తో అఖిల్ బిజీ

2023లో అల్ట్రా డిజాస్టర్ మూవీ 'ఏజెంట్' తర్వాత అఖిల్కాస్త బ్రేక్ తీసుకున్నారు. ప్రస్తుతం ‘లెనిన్’ చిత్రం చేస్తున్నారు. ఈ మూవీలో అఖిల్ సరసన శ్రీలీల హీరోయిన్‍గా చేస్తున్నారు. ఈ యాక్షన్ లవ్ మూవీకి మురళీకిశోర్ అబ్బూరు దర్శకత్వం వహిస్తున్నారు. ఈ చిత్రంలో రస్టిక్ మాస్ లుక్‍లో అఖిల్ కనిపించననున్నారు. ఇప్పటికే వచ్చిన గ్లింప్స్ ఆకట్టుకుంది. ఈ సినిమాకు థమన్ సంగీతం అందిస్తున్నారు. సితార ఎంటర్‌టైన్‍మెంట్స్, అన్నపూర్ణ స్టూడియోస్ బ్యానర్లు ఈ లెనిన్ చిత్రాన్ని సంయుక్తంగా ప్రొడ్యూజ్ చేస్తున్నాయి.