E-Paper
సైలెంట్గా ఓటీటీలోకి వచ్చిన బిగ్బాస్ కంటెస్టెంట్ థ్రిల్లర్ మూవీ.. ఐఎండీబీలో 8 రేటింగ్.. కానీ ఓ ట్విస్ట్
బిగ్బాస్ కంటెస్టెంట్ టేస్టీ తేజ నటించిన థ్రిల్లర్ మూవీ సైలెంట్ గా ఓటీటీలోకి వచ్చింది. ఐఎండీబీలో 8 రేటింగ్ సాధించిన ఈ సినిమా రెండు నెలల తర్వాత డిజిటల్ ప్రీమియర్ అయింది. ఎలాంటి ముందస్తు సమాచారం లేకుండా ఈ సినిమా ఓటీటీలోకి రావడం విశేషం.
బిగ్బాస్ తెలుగు సీజన్ 8 కంటెస్టెంట్ టేస్టీ తేజ నటించిన మూవీ 6 జర్నీ (6 Journey). ఈ సినిమా రెండు నెలల కిందట థియేటర్లలో రిలీజైంది. అయితే ఇప్పుడు సడెన్ గా ఓటీటీలోకి అడుగుపెట్టింది. రిలీజ్ సమయంలో పాజిటివ్ రివ్యూలే వచ్చినా.. బాక్సాఫీస్ దగ్గర పెద్దగా సక్సెస్ కాని ఈ సినిమాను ప్రైమ్ వీడియో స్ట్రీమింగ్ చేస్తోంది. ఐఎండీబీలోనూ 8 రేటింగ్ సాధించిన మూవీ ఇది.
6 జర్నీ ఓటీటీ స్ట్రీమింగ్
బిగ్బాస్ సీజన్ 8 కంటెస్టెంట్ టేస్టీ తేజ ప్రధాన పాత్ర పోషించిన ఫారెస్ట్ థ్రిల్లర్ మూవీ 6 జర్నీ. పెద్ద స్టార్లు ఎవరూ లేకపోవడంతో థియేటర్లలో ఈ సినిమాకు రెస్పాన్స్ రాలేదు. మే 9న థియేటర్లలో రిలీజ్ కాగా.. శుక్రవారం (జులై 11) నుంచి అమెజాన్ ప్రైమ్ వీడియోలో స్ట్రీమింగ్ కు వచ్చింది. ఎలాంటి ముందస్తు సమాచారం లేకుండానే ఈ సినిమా డిజిటల్ ప్రీమియర్ అయింది.
చాలా తక్కువ మొత్తానికే ఈ సినిమా డిజిటల్ హక్కులను ప్రైమ్ వీడియో సొంతం చేసుకున్నట్లు సమాచారం. అయితే ప్రైమ్ వీడియో ఇప్పుడు కూడా సినిమాను ఫ్రీగా స్ట్రీమింగ్ చేయడం లేదు. రూ.149 రెంట్ చెల్లించి సినిమాను చూడాల్సి ఉంటుంది. ఓటీటీలోకి రెండు నెలల తర్వాత వచ్చినా.. ఇప్పటికీ రెంట్ విధానంలో రావడం కాస్త ఆశ్చర్యం కలిగించే విషయమే. అది కూడా బాక్సాఫీస్ దగ్గర బోల్తా పడిన సినిమాను రూ.149 చెల్లించి చూస్తారా అన్నదీ అనుమానమే.
6 జర్నీ మూవీ గురించి..
6 జర్నీ మూవీని బషీర్ ఆలూరి డైరెక్ట్ చేశాడు. ఇందులో టేస్టీ తేజతోపాటు సమీర్ దత్తా, పల్లవి రాథోడ్, రవి ప్రకాశ్ రెడ్డి, రమ్య రెడ్డి, సంజయ్ ఆచార్య, బొర్రా అభిరామ్ లాంటి వాళ్లు నటించారు. ఇదో థ్రిల్లర్ మూవీ. ఇది ఆరుగురు వ్యక్తుల చుట్టూ తిరుగుతుంది. వాళ్లు ఓ మోసానికి గురైన తర్వాత ఆత్మహత్య చేసుకుందామని ప్లాన్ చేస్తారు.
అయితే ఓ సైకియాట్రిస్ట్ అంతకంటే ముందు చివరిగా గోవా ట్రిప్ వెళ్దామని, తానూ వస్తానని అంటాడు. అయితే ఆ ట్రిప్ వాళ్ల జీవితాలను మార్చేస్తుంది. మధ్యలోనే మొబైల్ రేడియేషనే ఆయుధంగా ఓ మాఫియా వాళ్లను బంధిస్తుంది. ఓ అడవిలో చిక్కుకుపోయిన వాళ్లు తమ ప్రాణాల కోసం పోరాడాల్సిన పరిస్థితి ఏర్పడుతుంది. ఆ తర్వాత ఏం జరిగిందన్నదే 6 జర్నీ మూవీ స్టోరీ.
