గేమ్ ఛేంజర్ తీసి పెద్ద తప్పు చేశాను.. పెద్ద డైరెక్టర్‌తో సినిమా తీసి దెబ్బ తిన్నాను: దిల్ రాజు షాకింగ్ కామెంట్స్

గేమ్ ఛేంజర్ మూవీ చేయడం తన తప్పే అని, పెద్ద డైరెక్టర్ తో సినిమా వల్ల దెబ్బ తిన్నానని ప్రముఖ నిర్మాత దిల్ రాజు అన్నాడు. రామ్ చరణ్ మూవీపై అతడు చేసిన కామెంట్స్ షాక్ కు గురి చేస్తున్నాయి. అసలు అతడు ఎందుకలా అన్నాడో ఒకసారి చూద్దాం.

రామ్ చరణ్ లీడ్ రోల్లో నటించిన గేమ్ ఛేంజర్ మూవీ డిజాస్టర్ గా నిలిచిన విషయం తెలుసు కదా. ఈ సినిమాపై తాజాగా ప్రొడ్యూసర్ దిల్ రాజు స్పందించాడు. తమ్ముడు మూవీ ప్రమోషన్లలో భాగంగా ఎం9 న్యూస్ కు ఇచ్చిన ఇంటర్వ్యూలో దిల్ రాజు ఆ సినిమాపై స్పందిస్తూ.. తాను తప్పు చేశానని అంగీకరించాడు.

గేమ్ ఛేంజర్ తీసి పెద్ద తప్పు చేశాను.. పెద్ద డైరెక్టర్‌తో సినిమా తీసి దెబ్బ తిన్నాను: దిల్ రాజు షాకింగ్ కామెంట్స్

గేమ్ ఛేంజర్ తప్పు నా వైఫల్యమే..

ఈ ఇంటర్వ్యూలో భాగంగా దిల్ రాజు గేమ్ ఛేంజర్మూవీపై చేసిన కామెంట్స్ వైరల్ అవుతున్నాయి. దిల్ రాజు అంటే ఇండస్ట్రీలో జడ్జిమెంట్, ఫిల్మ్ మేకింగ్ లో ఎక్స్‌పీరియన్స్ అనే బ్రాండ్ ఉంది.. మీరు తీసే సినిమాలో మీకు తెలియకుండా ఏమీ జరగదంటారు.. కానీ గేమ్ ఛేంజర్ విషయంలో అలా ఎందుకు జరిగింది అని యాంకర్ ప్రశ్నించారు. దీనిపై దిల్ రాజు ఇలా స్పందించాడు.

“పెద్ద సినిమాలు, పెద్ద డైరెక్టర్లతో చేసినప్పుడు 100 శాతం ఆ సమస్య ఉంటుంది. దిల్ రాజుకే కాదు.. అందరికీ ఆ సమస్య ఉంటుంది. సినిమాను 4.5 గంటలు తీశారని ఎడిటర్ ఇచ్చిన స్టేట్మెంట్ నిజం. పెద్ద డైరెక్టర్ సినిమా చేస్తున్నప్పుడు ఎక్కువగా జోక్యం చేసుకోలేం. అవుతే రోజూ కిచిడీ ఉంటుంది.. రోజూ కిచిడీ కావాలా.. మొత్తం అయిపోయాక ఒకేసారి చూసుకోవాలా అన్నది నిర్ణయించుకోవాలి. తప్పు జరిగినప్పుడు ప్రొడ్యూసర్ ఆపాలి. దానిని ఆపలేకపోయానంటే అది నా వైఫలమ్యే” అని దిల్ రాజు స్పష్టం చేశాడు.

పెద్ద డైరెక్టర్‌తో చేయడమే తప్పు

దీనిపై దిల్ రాజు మరిన్ని వివరాలు కూడా చెప్పాడు. “అలాంటి ప్రాజెక్టును నేను చేయకూడదు. నా కెరీర్లో 60 వరకు సినిమాలు తీశాను. కానీ ఎప్పుడూ పెద్ద డైరెక్టర్లతో సినిమాలు చేయలేదు. అందువల్ల నా మొదటి తప్పుడు నిర్ణయం అదే. పెద్ద డైరెక్టర్ తో తీస్తున్నప్పుడు ముందే కాంట్రాక్ట్ లో క్లియర్ గా నా పాయింట్లు పెట్టి సినిమాకు వెళ్లాలి.

అలా వెళ్లలేకపోయాను. అది నా తప్పు. ఆ తప్పును అంగీకరించి దానిని అక్కడితో వదిలేశాను. అది మన స్కూల్ కాదు. అలా కానప్పుడు దాని గురించి ఎక్కువ ఆలోచించడం వేస్ట్” అని దిల్ రాజు అన్నాడు. అయితే ఈ సినిమాను చివరి నిమిషం వరకూ చూడలేదన్న ఆరోపణలపైనా అతడు స్పందిస్తూ.. అది మాత్రం తప్పని, తాను ముందే సినిమా చూశానని చెప్పాడు.

ఇక ఇదే గేమ్ ఛేంజర్ మూవీపై మరో ప్రెస్ మీట్లోనూ దిల్ రాజు స్పందించాడు. తొలి రోజే ప్రపంచవ్యాప్తంగా రూ.186 కోట్లు వసూలు చేసిందన్న పోస్టర్ మీరే వేశారా అని ప్రశ్నించగా.. మాకు కొన్ని బలహీనతలు ఉంటాయి కాబట్టి దీనిపై ఏమీ మాట్లాడలేమని అతడు అనడం గమనార్హం.