E-Paper
జెనీలియా పాత్రను దేశం మొత్తం అభిమానిస్తుంది.. శ్రీలీల నాకు చిన్నప్పటి నుంచి తెలుసు.. గాలి జనార్ధన్ రెడ్డి కామెంట్స్
ప్రముఖ వ్యాపారవేత్త గాలి జనార్ధన్ రెడ్డి కుమారుడు కిరీటి రెడ్డి హీరోగా పరిచయం అవుతున్న సినిమా జూనియర్. ఈ సినిమాలో కిరీటి రెడ్డికి జోడీగా శ్రీలీల హీరోయిన్గా చేయగా సీనియర్ టాలీవుడ్ బ్యూటీ జెనీలియా కీలక పాత్ర పోషించింది. జూనియర్ ప్రీ రిలీజ్ ఈవెంట్లో గాలి జనార్ధన్ రెడ్డి కామెంట్స్ చేశారు.
ప్రముఖ వ్యాపారవేత్త గాలి జనార్ధన్ రెడ్డి కుమారుడు కిరీటి రెడ్డి టాలీవుడ్లో హీరోగా పరిచయం అవుతున్న సినిమా జూనియర్. ఈ మూవీకి రాధా కృష్ణ దర్శకత్వం వహించారు. యూత్ ఎంటర్టైనర్గా తెరకెక్కిన జూనియర్ మూవీలో కిరీటి రెడ్డికి జోడీగా డ్యాన్సింగ్ క్వీన్ శ్రీలీల హీరోయిన్గా చేసింది.
కీలక పాత్రలో జెనీలియా
అలాగే, టాలీవుడ్ సీనియర్ హీరోయిన్ జెనీలియా జూనియర్ మూవీలో కీలక పాత్ర పోషించింది. వారాహి చలన చిత్రం బ్యానర్పై రజని కొర్రపాటి నిర్మించిన జూనియర్ సినిమా జూలై 18న థియేటర్లలో గ్రాండ్గా రిలీజ్ కానుంది. ఈ సందర్భంగా బెంగళూరులో జూనియర్ ప్రీ రిలీజ్ ఈవెంట్ నిర్వహించారు. ఈ ఈవెంట్లో గాలి జనార్ధన్ రెడ్డి ఇంట్రెస్టింగ్ విశేషాలు పంచుకున్నారు.
గాలి జనార్దన్ రెడ్డి మాట్లాడుతూ.. "అందరికీ నమస్కారం. ఈ కార్యక్రమానికి విచ్చేసి చిత్ర బృందాన్ని ఆశీర్వదించిన డాక్టర్ శివరాజ్ కుమార్ గారికి మనస్ఫూర్తిగా కృతజ్ఞతలు. ఈ సినిమాలో రవిచంద్రన్ గారు, కిరీటి నటించిన సీన్స్ అన్ని అద్భుతంగా ఉన్నాయి" అని అన్నారు.
ఎన్నో సినిమాలతో
"ఎన్నో సినిమాలతో ప్రేక్షకులను అలరించిన జెనీలియా గారు ఈ సినిమాలో భాగం కావడం చాలా ఆనందంగా ఉంది. వారికి ధన్యవాదాలు. ఈ సినిమాలో ఆమె పాత్ర చాలా అద్భుతంగా ఉంటుంది. జెనీలియా పాత్రని దేశం మొత్తం అభిమానిస్తుంది" అని గాలి జనార్ధన్ రెడ్డి అభిప్రాయపడ్డారు.
"బాహుబలి లాంటి అద్భుతమైన సినిమాలకు పనిచేసిన కెమెరామెన్ సెంథిల్ కుమార్ గారు ఈ సినిమాకి పనిచేయడం కిరీటి అదృష్టం. నేను సాయి గారు కర్ణాటకలో ఒకే స్కూల్లో చదువుకున్నాం. వారాహి బ్యానర్తో ఆయన దేశవ్యాప్తంగా చాలా అద్భుతమైన పేరు ప్రఖ్యాతలు సంపాదించుకున్నారు. కిరీటి చిన్న వయసులో ఉన్నప్పుడే తనతో సినిమా చేస్తానని ఆయన చెప్పడం గొప్ప ఆశీర్వాదం" అని గాలి జనార్ధన్ రెడ్డి తెలిపారు.
పునీత్ రాజ్ కుమార్ ఆశీస్సులు
"శ్రీలీల నాకు చిన్నప్పటి నుంచి తెలుసు. తను దేశవ్యాప్తంగా చాలా మంచి పేరు ప్రఖ్యాతలు సంపాదించుకుంటున్నారు. పునీత్ రాజ్ కుమార్ గారి ఆశీస్సులు కిరీటిపై ఉన్నాయి. జేమ్స్ సినిమా సమయంలో కిరీటికి ఆయనతో సమయాన్ని గడిపే అదృష్టం దక్కింది" అని గాలి జనార్ధన్ రెడ్డి చెప్పారు.
"కిరీటికి చిన్నప్పటి నుంచి యాక్టింగ్, డాన్సింగ్ అంటే ఇష్టం. తను ఒక పాషన్తోనే ఈ పరిశ్రమలోకి వస్తున్నాడు. కిరీటిపై అందరి ఆశీస్సులు ఉండాలని కోరుకుంటున్నాను. చాలా మంచి సినిమా ఇది. మన ఇంట్లో జరిగే కథలాగా ఉంటుంది. తప్పకుండా సినిమాని చూసి మీరందరూ ఆశీర్వదిస్తారని కోరుకుంటున్నాను" అని గాలి జనార్ధన్ రెడ్డి చెప్పుకొచ్చారు.
