నన్ను హీరోగా నిలబెట్టిన పిల్లర్స్ లాంటి దర్శకులు ఇద్దరు.. ఆయనతో 10 సినిమాలు చేశాను.. హీరో శ్రీకాంత్ కామెంట్స్

టాలీవుడ్‌లో హీరోగా మంచి క్రేజ్ సంపాదించుకున్నారు శ్రీకాంత్. ఇప్పుడు విభిన్న పాత్రలు పోషిస్తూ అలరిస్తున్నారు ఈ సీనియర్ హీరో. అయితే, జూన్ 1న ఎస్వీ కృష్ణారెడ్డి పుట్టిన రోజు వేడుకలను ఘనంగా నిర్వహించారు. ఈ కార్యక్రమంలో పాల్గొన్న హీరో శ్రీకాంత్, అలీ, తనికెళ్ల భరణి ఇంట్రెస్టింగ్ విశేషాలు చెప్పుకొచ్చారు.

సకుటుంబసమేతంగా చూసే ఎన్నో చిత్రాలను రూపొందించి తెలుగు చిత్ర పరిశ్రమకు మర్చిపోలేని ఘన విజయాలు అందించిన దిగ్ధర్శకుడు ఎస్వీ కృష్ణారెడ్డి. 32 ఏళ్ల కెరీర్‌లో 42 ఎవర్ గ్రీన్ మూవీస్ డైరెక్ట్ చేశారు ఎస్వీ కృష్ణారెడ్డి. జూన్ 1న ఎస్వీ కృష్ణారెడ్డి పుట్టినరోజు వేడుకలను హైదరాబాద్ ఎఫ్ఎన్ సీసీలో ఘనంగా నిర్వహించారు.

నన్ను హీరోగా నిలబెట్టిన పిల్లర్స్ లాంటి దర్శకులు ఇద్దరు.. ఆయనతో 10 సినిమాలు చేశాను.. హీరో శ్రీకాంత్ కామెంట్స్

ఎస్వీ కృష్ణారెడ్డి పుట్టినరోజు వేడుక అతిథులు

ఈ కార్యక్రమంలో హీరో శ్రీకాంత్, హీరోయిన్స్ ఆమని, ఇంద్రజ, లయ, రవళి, కమెడియన్ బ్రహ్మానందం, అలీ, నటులు శివాజీ రాజా, తనికెళ్ల భరణి, చంద్రబోస్, రాజేంద్రప్రసాద్, రోజా, మురళీమోహన్, బండ్ల గణేష్, తదితరులు పాల్గొన్నారు. ఇంట్రెస్టింగ్ విశేషాలు చెప్పుకొచ్చారు.

హీరోగా ఎదిగేందుకు

హీరో శ్రీకాంత్ మాట్లాడుతూ.. "నన్ను హీరోగా నిలబెట్టిన ఫిల్లర్స్ లాంటి దర్శకులు ఇద్దరు.. ఒకరు ఈవీవీ సత్యనారాయణ, మరొకరు ఎస్వీ కృష్ణారెడ్డి. ఘటోత్కచుడు చిత్రంలో అర్జునుడిగా నటించాను. అది మా కాంబినేషన్‌లో మొదటి సినిమా. ఆ తర్వాత వినోదం, ఎగిరే పావురమా, ఆహ్వానం.. ఇలా పది చిత్రాలు చేశాను. నేను హీరోగా ఎదిగేందుకు ఆయన సినిమాలన్నీ ఎంతో ఉపయోగపడ్డాయి" అని అన్నారు.

యమలీల మర్చిపోలేను

"ఎస్వీ కృష్ణారెడ్డి గారు, అచ్చిరెడ్డి గారు చేసిన ఎన్నో చిత్రాల్లో నేను నటించాను. నా జీవితంలో యమలీల సినిమా ఎప్పటికీ మర్చిపోలేను. స్నేహానికి వీరిద్దరూ మారుపేరు. నాలాగే ఎంతోమంది నటీనటుల కెరీర్‌లను నిలబెట్టిన దర్శకుడు ఎస్వీ కృష్ణారెడ్డి గారు. ఆయనకు పుట్టినరోజు శుభాకాంక్షలు చెబుతున్నా" కమెడియన్, నటుడు అలీ తెలిపాడు.

తోట రాముడిగా మంచి పేరు

నటుడు తనికెళ్ల భరణి మాట్లాడుతూ.. "నా నట జీవితం యమలీలకు ముందు యమలీల తర్వాత అని చెప్పుకోవాలి. ఆ సినిమాలో తోట రాముడిగా నాకు మంచి పేరు వచ్చింది. ఎస్వీ కృష్ణారెడ్డి గారి చిత్రాల్లో నటించడం మర్చిపోలేని అనుభవం" అని వెల్లడించారు.

మా కుటుంబం గుర్తుంచుకుంటుంది

లిరిసిస్ట్ చంద్రబోస్ మాట్లాడుతూ.. "ఎస్వీ కృష్ణారెడ్డి గారు మా కుటుంబంలో పెద్ద లాంటి వారు. ఆయన నాకు ఎన్నో అవకాశాలు ఇచ్చి ప్రోత్సహించారు. సినిమాలోని అన్ని పాటలు రాసే అవకాశం కూడా ఎస్వీ కృష్ణారెడ్డి కల్పించారు. మా కుటుంబం ఆయనను ఎప్పటికీ గుర్తుంచుకుంటాం" అని చెప్పుకొచ్చారు.

గొప్ప వ్యక్తిత్వానికి నిదర్శనం

నటుడు, నిర్మాత మురళీ మోహన్ మాట్లాడుతూ.. "కుటుంబ కథా చిత్రాలను రూపొందించి ఇండస్ట్రీకి స్ఫూర్తిగా నిలిచారు ఎస్వీ కృష్ణారెడ్డి గారు. ఆయన ఒక చిన్న సినిమా తీసినా అది చాలా పెద్ద విజయాన్ని అందుకునేది. ఈ రోజు ఆయన పుట్టినరోజు వేడుకలకు వచ్చిన ప్రతి ఒక్కరూ ఎంతో ఎమోషనల్‌గా మాట్లాడుతుడటం ఎస్వీ కృష్ణారెడ్డి గారి మంచితనానికి, గొప్ప వ్యక్తిత్వానికి నిదర్శనం" అని తెలిపారు.