రూ.5723 కోట్లు.. ఈ ఏడాది రిలీజైన సినిమాల బాక్సాఫీస్ వసూళ్లు ఇవి.. రెండో స్థానంలో సంక్రాంతికి వస్తున్నాం

ఇండియన్ బాక్సాఫీస్ ఈ ఏడాది తొలి భాగంలో బ్లాక్‌బస్టర్ అయింది. తొలి ఆరు నెలల్లో ఏకంగా రూ.5723 కోట్లు వసూలు చేయడం విశేషం. అత్యధిక వసూళ్ల సినిమాల్లో సంక్రాంతికి వస్తున్నాం రెండో స్థానంలో ఉంది. మరి మిగిలిన మూవీస్ ఏంటి? ఆ రిపోర్టు ఎలా ఉందో చూడండి.

ఈ ఏడాది ఇండియాలో రిలీజైన సినిమాలు బాక్సాఫీస్ దగ్గర దుమ్మురేపాయి. జనవరి నుంచి జూన్ నెల ముగిసే సమయానికి మొత్తంగా దేశంలో అన్ని సినిమాలు కలిపి వసూలు చేసిన మొత్తం రూ.5723 కోట్లు అని ఆర్మాక్స్ రిపోర్టు వెల్లడించింది. వీటిలో ఇండియాలో అత్యధిక గ్రాస్ వసూళ్ల సినిమాల్లో తొలి స్థానంలో హిందీ మూవీ ఛావా ఉండగా.. రెండో స్థానంలో సంక్రాంతికి వస్తున్నాం నిలిచింది.

రూ.5723 కోట్లు.. ఈ ఏడాది రిలీజైన సినిమాల బాక్సాఫీస్ వసూళ్లు ఇవి.. రెండో స్థానంలో సంక్రాంతికి వస్తున్నాం

కళకళలాడిన బాక్సాఫీస్

ఈ ఏడాది ఇండియన్ బాక్సాఫీస్ బ్లాక్‌బస్టర్ అయింది. తొలి ఆరు నెలల్లో రిలీజైన అన్ని భాషల సినిమాలు కలిపి ఏకంగా రూ.5723 కోట్లు రాబట్టాయి. గతేడాది ఫస్ట్ హాఫ్ తో పోలిస్తే ఇది 14 శాతం ఎక్కువని ఆర్మాక్స్ రిపోర్టు వెల్లడించింది. గతేడాది ఇదే సమయంలో రూ.5032 కోట్లు మాత్రమే వచ్చాయి. ఇక గత ఐదేళ్లలో 2022లో అత్యధిక వసూళ్లు రాగా.. దానికి కేవలం రూ.15 కోట్ల దూరంలో నిలిచిపోయింది.

ఈ ఏడాది రూ.693 కోట్లతో ఛావా అత్యధిక వసూళ్లు సాధించిన సినిమాగా నిలిచింది. ఇక మొత్తంగా 17 సినిమాలు రూ.100 కోట్ల మార్క్ దాటాయి. ఇండియా డొమెస్టిక్ బాక్సాఫీస్ వద్ద ఒకే ఒక్క సినిమా మాత్రమే రూ.250 కోట్ల మార్క్ అందుకున్నట్లు ఈ రిపోర్టు తెలిపింది.

తెలుగు సినిమా సత్తా

ఈ ఏడాది ఫస్ట్ హాఫ్ లో తెలుగు సినిమా సత్తా చాటింది. డొమెస్టిక్ గ్రాస్ వసూళ్ల పరంగా చూస్తే.. మొత్తం వసూళ్లలో 19 శాతం మన తెలుగు మూవీసే సాధించాయి. 39 శాతంతో హిందీ సినిమా తొలి స్థానంలో నిలిచింది. ఇక తమిళ సినిమాలు 17 శాతం, మలయాళం, హాలీవుడ్ చెరో 10 శాతం, మిగిలినవి 5 శాతం వసూళ్లు సాధించినట్లు ఆర్మాక్స్ మీడియా రిపోర్ట్ తెలిపింది.

ఇక గ్రాస్ డొమెస్టిక్ వసూళ్లలో రూ.693 కోట్లతో ఛావా తొలి స్థానంలో నిలవగా.. సంక్రాంతికి వస్తున్నాం సినిమా రూ.222 కోట్లతో రెండో స్థానం సాధించడం విశేషం. ఆ తర్వాత వరుసగా సితారే జమీన్ పర్, హౌజ్‌ఫుల్ 5, రైడ్ 2 ఉన్నాయి. ఇక టాప్ 10లో గేమ్ ఛేంజర్ కూడా రూ.153 కోట్లతో నిలిచింది.

ఫిబ్రవరిలో అత్యధికం

ఇక నెలవారీగా చూసుకుంటే ఈ ఏడాది ఫిబ్రవరిలో రిలీజైన సినిమాలు అత్యధిక వసూళ్లు సాధించాయి. ఆ నెలలో వచ్చిన సినిమాలు రూ.1264 కోట్ల గ్రాస్ బాక్సాఫీస్ వసూళ్లు సొంతం చేసుకున్నాయి. ఆ తర్వాతి నెల అంటే మార్చిలో మాత్రం కేవలం రూ.580 కోట్లు మాత్రమే వచ్చాయి. జనవరిలో రూ.1020 కోట్లు, ఏప్రిల్లో రూ.813 కోట్లు, మేలో రూ.1126 కోట్లు, జూన్ లో రూ.920 కోట్లు వసూలు చేశాయి. మొత్తంగా 2025లో తొలి భాగంలో అన్ని భాషల సినిమాలు కలిపి రూ.5723 కోట్లు రాబట్టడం విశేషం.