జీ తెలుగులో మరో కొత్త సీరియల్ జయం- మారిన ఇతర సీరియల్స్ టైమింగ్స్- జీవితంలో సవాళ్లను ఎలా ఎదుర్కోవాలో చెప్పే మోటివేషన్‌తో!

బుల్లితెర ఛానెల్ జీ తెలుగులో మరో కొత్త సీరియల్ జయం ప్రారంభం కానుంది. ప్రేమ, మోసం, పట్టుదల, బాధ్యతల నడుమ సాగే ఈ సీరియల్ జీవితంలో సవాళ్లను ఎలా ఎదుర్కొవాలో చెబుతుందని మేకర్స్ అంటున్నారు. ఇక జయం సీరియల్ టీవీ ప్రీమియర్‌తో ఇతర సీరియల్స్ టైమింగ్స్‌లో మార్పులు ఉండనున్నాయి.

తెలుగు రాష్ట్రాల ప్రజలకు ఎల్లప్పుడూ వినోదం పంచే ఛానల్​ జీ తెలుగు. ఊహించని మలుపులు, ఆసక్తికర కథనాలతో సాగే సీరియల్స్‌​తో ఆకట్టుకుంటోన్న జీ తెలుగు సరికొత్త సీరియల్​ ‘జయం’తో ప్రేక్షకుల ముందుకు రానుంది. ప్రేమ, మోసం, పట్టుదల, బాధ్యతల నడుమ సాగే సరికొత్త ప్రేమ కథతో రూపొందుతున్న సీరియల్​ జయం​.

జీ తెలుగులో మరో కొత్త సీరియల్ జయం- మారిన ఇతర సీరియల్స్ టైమింగ్స్- జీవితంలో సవాళ్లను ఎలా ఎదుర్కోవాలో చెప్పే మోటివేషన్‌తో!

సవాళ్లను ఎదుర్కొంటూ

జీవితంలో ఎదురయ్యే సవాళ్లను ఎదుర్కొంటూ ఎలా ముందుకు సాగాలో తెలిపే స్ఫూర్తివంతమైన కథతో ఈ సీరియల్​ ప్రేక్షకుల ముందుకు రానుంది. ఆకట్టుకునే కథతో రానున్న జయం జులై 14న ప్రారంభం కానుంది. అంటే మరో రెండు రోజుల్లో సోమవారం నుంచి శనివారం వరకు ప్రతిరోజు రాత్రి 8 గంటలకు జీ తెలుగులో జయం సీరియల్ ప్రసారం కానుంది.

జయం సీరియల్ కథ

జయం సీరియల్ కథ విషయానికొస్తే.. మాజీ బాక్సర్​ రుద్ర ప్రతాప్​ (శ్రీరామ్​ వెంకట్​), పేదింటి అమ్మాయి గంగావతి (వర్షిణి) జీవితాల చుట్టూ తిరుగుతుంది. రుద్ర తన సోదరుడి మరణం, చెరగని గాయాలతో కూడిన గతంతో సతమతమవుతుండగా.. పేదరికం, తల్లి అనారోగ్యం, తండ్రి బాధ్యతారాహిత్యంతో గంగ జీవితం దినదిన గండంగా సాగుతుంది.

జయం సీరియల్ ట్విస్టులు

వీరిద్దరూ ఎలా కలుస్తారు? వారి మధ్య ప్రేమ చిగురిస్తుందా? గతాన్ని అధిగమించి ముందుకు వెళ్లగలరా? అనే ప్రశ్నలకు సమాధానం తెలియాలంటే జీ తెలుగులో సోమవారం నుంచి శనివారం వరకు రాత్రి 8 గంటలకు ప్రసారమయ్యే జయం సీరియల్​ తప్పకుండా చూడాల్సిందే అని మేకర్స్ చెబుతున్నారు.

జయం సీరియల్ ప్రెస్ మీట్

అయితే, జయం సీరియల్​ విశేషాలు పంచుకోడానికి జులై 11న హైదరాబాద్‌​లోని ప్రసాద్​ ల్యాబ్స్‌​లో ప్రెస్​ మీట్​ నిర్వహించారు. ఈ ప్రెస్ మీట్‌లో జయం సీరియల్​ ప్రధాన పాత్రదారులైన శ్రీరామ్​ వెంకట్​, వర్షిణి పాల్గొని కథలోని పాత్రలు, ఆసక్తికరమైన అంశాలను పంచుకున్నారు.

నటుడు శ్రీరామ్ వెంకట్ కామెంట్స్

ప్రముఖ నటుడు శ్రీరామ్ వెంకట్ మాట్లాడుతూ.. "జయం ఒక ప్రత్యేకమైన కథ. ఇది ఇప్పటివరకు నేను పోషించిన పాత్రలకు భిన్నమైనది. బాక్సింగ్ కోచ్‌గా రుద్ర పాత్రలో నటించడం నాకు సవాలుగా, అదే సమయంలో ఉత్సాహంగా అనిపించింది. మా నటీనటులు, సిబ్బంది అంకితభావంతో పనిచేస్తున్నారు. ప్రేక్షకులు ఈ ధారావాహికను తప్పకుండా ఆదరిస్తారని ఆశిస్తున్నాం" అని అన్నారు.

ఇతర సీరియల్స్‌లో మార్పులు

జయం సీరియల్​ టీవీ ప్రీమియర్తో ఇతర ధారావాహికల ప్రసార సమయాల్లో స్వల్ప మార్పులు ఉంటాయి. జులై 14 నుంచి చామంతి రాత్రి 8:30 గంటలకు, జగద్ధాత్రి రాత్రి 9 గంటలకు ప్రసారమవుతాయి.