ఎన్టీఆర్, హృతిక్ ‘వార్ 2’ తెలుగు థియేట్రికల్ హక్కులకు భారీ ధర.. ఎన్ని కోట్లంటే!

వార్ 2 సినిమా తెలుగు థియేట్రికల్ హక్కుల డీల్ జరిగిపోయింది. తెలుగు వెర్షన్‍కు భారీ ధర దక్కింది. సితార ఎంటర్‌టైన్‍మెంట్స్ ఈ రైట్స్ తీసుకుంది.

టాలీవుడ్ మ్యాన్ ఆఫ్ మాసెస్ జూనియర్ ఎన్టీఆర్, బాలీవుడ్ స్టార్ హీరో హృతిక్ రోషన్ ప్రధాన పాత్రలు పోషించిన ‘వార్ 2’ సినిమాకు ఓ రేంజ్‍లో క్రేజ్ ఉంది. ఈ స్పై యాక్షన్ థ్రిల్లర్ చిత్రంపై అంచనాలు భారీ స్థాయిలో నెలకొన్నాయి. ఈ మూవీతోనే బాలీవుడ్‍‌లోకి ఎంట్రీ ఇస్తున్నారు ఎన్టీఆర్. ఈ సినిమాకు తెలుగులోనూ హైప్ బాగా ఉంది. ఆగస్టు 14న ఈ చిత్రం విడుదల కానుంది. ఈ తరుణంలో వార్ 2 మూవీ తెలుగు వెర్షన్ థియేట్రికల్ హక్కులు భారీ ధరకు అమ్ముడయ్యాయి. ఆ వివరాలు బయటికి వచ్చాయి.

‘సితార’ చేతికి.. భారీ ధర

ఎన్టీఆర్, హృతిక్ ‘వార్ 2’ తెలుగు థియేట్రికల్ హక్కులకు భారీ ధర

వార్ 2 సినిమా తెలుగు వెర్షన్ థియేట్రికల్ హక్కులను సితార ఎంటర్‌టైన్‍మెంట్స్ పతాకంపై నిర్మాత నాగవంశీ దక్కించుకున్నారు. ఏకంగా రూ.80కోట్ల భారీ ధరకు ఈ మూవీ తెలుగు రైట్స్‌ను సితార సంస్థ దక్కించుకుందని సమాచారం బయటికి వచ్చింది. దీంతో వార్ 2 తెలుగు వెర్షన్ డీల్‍పై నెలకొన్న ఉత్కంఠకు తెరపడింది.

వార్ 2 చిత్రం తెలుగు థియేట్రికల్ హక్కులకు ముందుగా రూ.100కోట్లను యశ్ రాజ్ ఫిల్మ్స్ డిమాండ్ చేసిందని టాక్ బయటికి వచ్చింది. అయితే, చర్చల తర్వాత రూ.80కోట్లకు డీల్ జరిగిందని సమాచారం వెల్లడైంది. మొత్తంగా ఈ చిత్రానికి తెలుగులో అంచనాలకు తగ్గట్టే క్రేజీ ధర దక్కింది.

స్పై యాక్షన్ థ్రిల్లర్‌గా..

వార్ 2 చిత్రానికి అయాన్ ముఖర్జీ దర్శకత్వం వహించారు. స్పై యాక్షన్ థ్రిల్లర్ మూవీగా తెరకెక్కించారు. ఆరేళ్ల క్రితం వచ్చి సూపర్ హిట్ అయిన వార్‌కు సీక్వెల్‍గా ఈ మూవీ రూపొందింది. వార్ 2లోనూ మేజర్ కబీర్ పాత్రను హృతిక్ పోషించారు. ఎన్టీఆర్కూడా స్పై ఏజెంట్‍గా నటించారు. ఈ సినిమాతో బాలీవుడ్‍లోకి తారక్ అడుగుపెడుతున్నారు. ఈ చిత్రంలో కియారా అడ్వానీ హీరోయిన్‍గా చేశారు. అనిల్ కపూర్, షాబిర్ అహ్లువాలియా, అశుతోష్ రాణా కీలకపాత్రలు పోషించారు.