వారంలోనే తెలుగులో మరో ఓటీటీలోకి వస్తున్న మలయాళం బ్లాక్‌బస్టర్ స్పోర్ట్స్ కామెడీ మూవీ.. ఇంకా చూశారా లేదా?

మలయాళం బ్లాక్‌బస్టర్ స్పోర్ట్స్ కామెడీ మూవీ ఆలప్పుళ జింఖానా మూవీ ఓ ఓటీటీలోకి వచ్చిన వారంలోనే మరో ఓటీటీలోకి వస్తోంది. అది కూడా తెలుగు ఆడియోతో కావడం విశేషం. ఈ సినిమాకు థియేటర్లలో ఎలాంటి రెస్పాన్స్ వచ్చిందో.. ఓటీటీలో అంతకుమించిన రెస్పాన్స్ వస్తోంది.

ఈ ఏడాది మలయాళం ఇండస్ట్రీ నుంచి వచ్చిన మరో బ్లాక్‌బస్టర్ ఆలప్పుళ జింఖానా (Alappuzha Gymkhana). ఈ సినిమా గత గురువారం (జూన్ 12) నుంచి సోనీలివ్ ఓటీటీలో స్ట్రీమింగ్ అవుతోంది. మలయాళంతోపాటు తెలుగు, తమిళం, కన్నడ, హిందీల్లో చూడొచ్చు. అయితే ఇప్పుడు తెలుగు వెర్షన్ మరో ఓటీటీలోకి కూడా వస్తుండటం విశేషం.

వారంలోనే తెలుగులో మరో ఓటీటీలోకి వస్తున్న మలయాళం బ్లాక్‌బస్టర్ స్పోర్ట్స్ కామెడీ మూవీ.. ఇంకా చూశారా లేదా?

ఆలప్పుళ జింఖానా ఓటీటీ

ప్రేమలు మూవీ ఫేమ్ నస్లేన్ నటించిన మూవీ ఆలప్పుళ జింఖానా. విషు సందర్భంగా ఏప్రిల్ 10న థియేటర్లలో రిలీజైన ఈ సినిమా.. రెండు నెలల తర్వాత ఈ మధ్యే ఓటీటీలోకి వచ్చింది.

ఇక ఇప్పుడు తెలుగు వెర్షన్ వచ్చే శుక్రవారం (జూన్ 20) నుంచి ఆహా వీడియో ఓటీటీలోనూ స్ట్రీమింగ్ కానుంది. దీంతో రెండు ఓటీటీ ప్లాట్‌ఫామ్స్ లో ఈ మూవీ తెలుగు వెర్షన్ ను చూసే అవకాశం ఇక్కడి ప్రేక్షకులకు దక్కనుంది. ఈ సినిమా ఆహాలోకి కూడా వస్తే.. మరింత మంది ప్రేక్షకుల దగ్గరకు చేరనుంది.

ఆలప్పుళ జింఖానా ఎలా ఉందంటే?

ఆలప్పుళ జింఖానా మూవీ ఓ మస్ట్ వాచ్ అని చెప్పొచ్చు. ఇదో స్పోర్ట్స్ కామెడీ మూవీ. ఖాలిద్ రెహమాన్ డైరెక్ట్ చేసిన ఈ సినిమా ఐదుగురు యువకుల చుట్టూ తిరుగుతుంది. ఇంటర్ ఎగ్జామ్స్ లో ఫెయిలై.. ఉన్నత చదువుల కోసం స్పోర్ట్స్ కోటాలో సీట్లు సాధించాలనుకుని బాక్సింగ్ ను ఎంచుకుంటారు వీళ్లు. అదే వాళ్ల జీవితాలను మలుపు తిప్పుతుంది.

స్థానికంగా ఉన్న ఆలప్పుళ జింఖానాలో బాక్సింగ్ కోచింగ్ కోసం చేరతారు. మొదట జిల్లా, ఆ తర్వాత రాష్ట్ర స్థాయి పోటీల్లో గెలిచి కాలేజీలో సీట్లు సంపాదించాలని ఆరాటపడతారు. మరి వాళ్ల కల నెరవేరిందా లేదా అన్నది ఈ మూవీలో చూడాలి.

డైలాగులు, నటన, మ్యూజిక్.. హైలైట్

ప్రేమలు ఫేమ్ నస్లేన్ గఫూర్ తోపాటు సందీప్ ప్రదీప్, లూక్మన్ అవరన్, గణపతి, అనఘ రవి, ఫ్రాంకో ఫ్రాన్సిస్, బేబీ జీన్, శివ హరిహరణ్ లాంటి వాళ్లు నటించారు. స్పోర్ట్స్ బ్యాక్‌డ్రాప్ మూవీ అయినా.. బాక్సింగ్ కంటే కామెడీతోనే ఈ సినిమా యువతను బాగా ఆకట్టుకుంటోంది. ముఖ్యంగా తెలుగు డబ్బింగ్ చాలా బాగుంది. డైలాగులు అదిరిపోయాయి. ఇక్కడి ప్రేక్షకులను బాగా ఆకర్షించేలా తెలుగులో డైలాగులు రాశారు. అదే స్థాయిలో డబ్బింగ్ కూడా చెప్పారు.

నస్లేన్ తోపాటు మిగిలిన నటీనటులందరూ చాలా సహజ నటనతో ఆకట్టుకున్నారు. ఇక మ్యూజిక్ కూడా ఈ సినిమాకు ప్రధాన బలం అని చెప్పొచ్చు. విష్ణు విజయ్ అందించిన మ్యూజిక్, బీజీఎం సినిమాను మరో లెవెల్ కు తీసుకెళ్లాయి. రెండు గంటల 20 నిమిషాల పాటు హాయిగా నవ్వించే మూవీ ఈ ఆలప్పుళ జింఖానా. సోనీ లివ్ ఓటీటీలో వెంటనే చూసేయండి. ఒకవేళ ఆ సబ్‌స్క్రిప్షన్ లేకపోతే వచ్చే శుక్రవారం (జూన్ 20) వరకు ఆగితే ఆహా వీడియోలోనూ చూడొచ్చు.