మలయాళం థ్రిల్లర్ మూవీ.. యూట్యూబ్‌లో ఫ్రీ స్ట్రీమింగ్.. క్లైమ్యాక్స్ ట్విస్ట్ అస్సలు ఊహించలేరు

ఓ మలయాళం థ్రిల్లర్ మూవీ యూట్యూబ్ లో ఫ్రీగా స్ట్రీమింగ్ అవుతోంది. ఆసిఫ్ అలీ లీడ్ రోల్లో నటించిన ఈ సినిమా క్లైమ్యాక్స్ లో వచ్చే ట్విస్టును అస్సలు ఊహించలేరు. తెలుగులోనూ ఈ సినిమా అందుబాటులో ఉండటం విశేషం.

మీరు మలయాళం థ్రిల్లర్ సినిమాలకు అభిమానులా? అయితే యూట్యూబ్‌లోనూ ఫ్రీగా స్ట్రీమింగ్ అవుతున్న ఈ సినిమాను అస్సలు మిస్ కావద్దు. తెలుగులో చూడాలనుకుంటే సోనీ లివ్ ఓటీటీలో అందుబాటులో ఉంది. ఐఎండీబీలో 6.2 రేటింగ్ ఉన్న ఈ థ్రిల్లర్ సినిమా మూడేళ్ల కిందట థియేటర్లలో రిలీజై ఓ మోస్తరు విజయం సాధించింది.

మలయాళం థ్రిల్లర్ మూవీ.. యూట్యూబ్‌లో ఫ్రీ స్ట్రీమింగ్.. క్లైమ్యాక్స్ ట్విస్ట్ అస్సలు ఊహించలేరు

ఇన్నలే వరే మూవీ స్టోరీ ఏంటంటే?

యూట్యూబ్ లో మలయాళంతోపాటు హిందీలోనూ ఫ్రీగా స్ట్రీమింగ్ అవుతున్న ఈ సినిమా పేరు ఇన్నలే వరే (Innale Vare). అంటే తెలుగులో నిన్నటి వరకు అని అర్థం. జిస్ జాయ్ డైరెక్ట్ చేసిన ఈ సినిమాలో ఆసిఫ్ అలీ, నిమిషా సజయన్ లాంటి వాళ్లు నటించారు. ఇదో డిఫరెంట్ థ్రిల్లర్ మూవీ. సినిమా నటుడు ఆది శంకర్ (ఆసిఫ్ అలీ) వరుస పరాజయాల కారణంగా అప్పుల పాలై కష్టాల్లో ఉంటాడు.

ఆ అప్పులు తీర్చి మళ్లీ గాడిలో పడటానికి ప్రయత్నిస్తుంటాడు. దీనికితోడు ఓవైపు తాను పెళ్లి చేసుకోవాలనుకునే అమ్మాయి, మరోవైపు సహ నటితో శారీరక సంబంధాలతోనూ ఇబ్బంది పడుతుంటాడు. ఇలాంటి పరిస్థితుల్లో షాని (నిమిషా సజయన్) అనే ఓ అమ్మాయి ఓరోజు అతనికి రోడ్డుపై లిఫ్ట్ ఇచ్చి తన అభిమానిని అని చెబుతూ ఇంటికి తీసుకెళ్లి ఓ రూమ్ లో అతన్ని బంధిస్తుంది. ఓ హ్యాకర్, ఈ కుట్రలో భాగం అయిన శరత్ (ఆంటోనీ వర్గీస్) సాయంతో అతని ఫోన్ ను హ్యాక్ చేసి.. ఆదికి సంబంధించిన వ్యక్తులను బోల్తా కొట్టిస్తుంటారు.

తమకు రూ.1.5 కోట్లు ఇస్తేనే నిన్ను విడిచిపెడతామని ఆదికి వాళ్లు స్పష్టం చేస్తారు. అసలు ఆ ఇద్దరు ఎవరు? వాళ్లకు ఆది శంకర్ కు అసలు సంబంధం ఏంటి? వాళ్ల బారి నుంచి ఆది తప్పించుకుంటాడా? సాదాసీదా కిడ్నాప్ లా అనిపించే ఈ సినిమాలో క్లైమ్యాక్స్ లో వచ్చే ట్విస్ట్ ఏంటి అన్నది ఇన్నలే వరే మూవీలో చూడొచ్చు.

ఇన్నలే వరే ఎలా ఉందంటే?

మలయాళం థ్రిల్లర్ సినిమాలను తెరకెక్కించే మేకర్స్ కు ఓ ప్రత్యేకత ఉంది. ఓ సింపుల్ స్టోరీకి ఊహించని ట్విస్టులను జోడించి ప్రేక్షకులకు థ్రిల్ పంచడం వాళ్లకు అలవాటు. అలాంటిదే ఈ ఇన్నలే వరే మూవీ కూడా. అసలే కష్టాల్లో ఓ నటుడిని ఓ ఇద్దరు అనామకులు బంధించడం, డబ్బులు డిమాండ్ చేయడం అనేది ఓ మామూలు కథే కావచ్చు. కానీ వాళ్లు అతన్నే ఎంచుకోవడానికి కారణం ఏంటి? టెక్నాలజీ సాయంతో ఓ సెలబ్రిటీ కిడ్నాప్‌ను కూడా బయటి ప్రపంచానికి తెలియకుండా చేయడం, క్లైమ్యాక్స్ ట్విస్టుతో మూవీని ఆసక్తికరంగా మలిచాడు డైరెక్టర్ జిస్ జాయ్.

2022లో థియేటర్లలో రిలీజైన ఈ సినిమా ఓ మోస్తరు విజయం సాధించింది. ప్రస్తుతం సోనీ లివ్ ఓటీటీలో తెలుగులోనూ స్ట్రీమింగ్ అవుతోంది. మలయాళం, హిందీ వెర్షన్లయితే యూట్యూబ్ లోనూ ఫ్రీగా అందుబాటులో ఉన్నాయి. మరీ అంత థ్రిల్ చేయకపోయినా.. ఈ మూవీ చూసిన తర్వాత పెద్దగా నిరాశ మాత్రం కలగదు.