E-Paper
మంచు మనోజ్ కన్నప్ప రివ్యూ: నేను అనుకున్న దాని కంటే వెయ్యి రెట్లు బాగుంది.. ప్రభాస్ వచ్చిన తర్వాత మరో లెవెల్..
మంచు మనోజ్ కన్నప్ప మూవీ రివ్యూ ఇచ్చాడు. తన అన్న మంచు విష్ణు, తండ్రి మోహన్ బాబుతో గొడవల నేపథ్యంలో అతడు ఈ సినిమా చూసి అద్భుతమని మెచ్చుకోవడం గమనార్హం. ప్రభాస్ ఎంట్రీ తర్వాత మరో లెవెల్ అని అతడు అన్నాడు.
కన్నప్ప మూవీకి అన్ని వైపుల నుంచి పాజిటివ్ రివ్యూలు వస్తున్నాయి. ముఖ్యంగా మంచు విష్ణు తమ్ముడు, మోహన్ బాబు చిన్న కొడుకు, నటుడు మంచు మనోజ్ కూడా ఈ సినిమా అద్భుతమని కొనియాడాడు. తాను అనుకున్నదాని కంటే వెయ్యి రెట్లు బాగుందని అతడు అనడం విశేషం. అన్న పేరు ఎత్తకుండానే అతని నటన కూడా అద్భుతమని పరోక్షంగా చెప్పాడు.
కన్నప్ప చాలా చాలా బాగుంది
మంచు మనోజ్ శుక్రవారం (జూన్ 27) ఉదయం హైదరాబాద్ లోని ప్రసాద్ మల్టీప్లెక్స్ లో కన్నప్ప మూవీ చూశాడు. ఐదు నిమిషాలు ఆలస్యంగా అతడు థియేటర్లోకి వెళ్లాడు. ఆ ఐదు నిమిషాల కోసం రేపు మరోసారి సినిమా చూస్తానని కూడా అతడు మీడియాతో అనడం విశేషం. ఈ సినిమా చాలా చాలా బాగుందని, లీడ్ రోల్స్ అందరూ అద్భుతంగా చేశారని మనోజ్ స్పష్టం చేశాడు. తన అన్న, తండ్రి పేర్లు అతని నోటి వెంట రాలేదు కానీ.. పరోక్షంగా వాళ్లను కూడా అతడు ప్రశంసించాడు.
“కన్నప్ప చూశాను. చాలా చాలా బాగుంది. ముఖ్యంగా ప్రభాస్ గారి ఎంట్రీ తర్వాత మరో లెవెల్ కు వెళ్తుంది. ప్రతి ఒక్కరూ లీడ్ క్యారెక్టర్స్ క్లైమ్యాక్స్ తో ఇంత గొప్ప పర్ఫార్మెన్స్ చేస్తారని కలలో కూడా అనుకోలేదు. చాలా అద్భుతంగా చేశారు. నేను అనుకున్నదాని కంటే వెయ్యి రెట్లు గొప్పగా ఉంది. టీమ్ మొత్తానికి శుభాకాంక్షలు. సినిమా గొప్ప విజయం సాధించాలి. మీరు పెట్టిన డబ్బు వెయ్యింతలు రావాలి. నేను ఐదు నిమిషాలు ఆలస్యంగా వెళ్లాను. ఆ ఐదు నిమిషాల కోసం రేపు మరోసారి సినిమా చూస్తాను” అని మనోజ్ అనడం విశేషం.
నిజానికి కన్నప్ప రిలీజ్ కు ముందు రోజే అతడు టీమ్ మొత్తానికి ఆల్ ద బెస్ట్ చెప్పాడు. ఈ సినిమా కోసం తన తండ్రితోపాటు టీమ్ అంతా ఎంతో శ్రమించారని మనోజ్ అన్నాడు. బ్లాక్బస్టర్ సక్సెస్ సాధించాలని ఆకాంక్షించాడు.
కన్నప్ప మూవీ గురించి..
ముకేశ్ కుమార్ సింగ్ డైరెక్ట్ చేసిన కన్నప్ప మూవీలో మంచు విష్ణు లీడ్ రోల్లో నటించిన విషయం తెలిసిందే. ప్రభాస్, మోహన్ లాల్, అక్షయ్ కుమార్ లాంటి వాళ్లు అతిథి పాత్రలు పోషించారు. ఈ సినిమాను మోహన్ బాబే నిర్మించాడు. ఈ సినిమాకు తొలి షో నుంచే పాజిటివ్ రివ్యూలు వస్తున్నాయి.
ముఖ్యంగా ప్రభాస్ పాత్ర చాలా బలంగా ఉందని, అతని ఎంట్రీ తర్వాత చివరి 20 నిమిషాలు మరో లెవెల్ అని అభిమానులు కూడా సోషల్ మీడియా ద్వారా రివ్యూలు ఇస్తున్నారు. ఎన్నో రోజులుగా ట్రోల్స్ ఎదుర్కొంటున్న కన్నప్ప టీమ్ ఈ రివ్యూలతో సంతోషంగా ఉంది. సినిమాకు పాజిటివ్ టాక్ తో బాక్సాఫీస్ వసూళ్లు కూడా బాగానే ఉంటాయని భావిస్తున్నారు.
