E-Paper
నెట్ఫ్లిక్స్ హారర్ వెబ్ సిరీస్ రెండో సీజన్ వస్తోంది.. తొలి 6 నిమిషాల వీడియో రిలీజ్.. తొలి సీజన్కు 8 ఐఎండీబీ రేటింగ్
నెట్ఫ్లిక్స్ సూపర్ హిట్ హారర్ వెబ్ సిరీస్ రెండో సీజన్ వచ్చేస్తోంది. గతంలోనే టీజర్ రిలీజ్ చేసిన ఆ ఓటీటీ తాజాగా.. తొలి 6 నిమిషాల వీడియోను ప్రేక్షకుల ముందుకు తీసుకొచ్చింది. తొలి సీజన్ కంటే కూడా ఈ రెండో సీజన్ మరింత భయపెట్టనున్నట్లు ఈ వీడియో చూస్తే తెలుస్తోంది.
హారర్ వెబ్ సిరీస్ అభిమానులకు గుడ్ న్యూస్. నెట్ఫ్లిక్స్ లో రెండున్నరేళ్ల కిందట వచ్చిన హారర్ సిరీస్ వెన్స్డే (Wednesday)కు ఇప్పుడు రెండో సీజన్ రాబోతోంది. అది కూడా రెండు భాగాలుగా కావడం విశేషం. గత ఏప్రిల్ నెలలో ఈ రెండో సీజన్ టీజర్ రిలీజ్ చేసిన నెట్ఫ్లిక్స్ గురువారం (జూన్ 5) ఈ రెండో సీజన్ తొలి 6 నిమిషాల వీడియోను రిలీజ్ చేయడం విశేషం.
వెన్స్డే రెండో సీజన్
నెట్ఫ్లిక్స్ లో స్ట్రీమింగ్ అయిన వెన్స్డే వెబ్ సిరీస్ కు ప్రేక్షకుల నుంచి మంచి రెస్పాన్స్ వచ్చింది. ఐఎండీబీలో ఏకంగా 8 రేటింగ్ నమోదైంది. దీంతో రెండో సీజన్ పై భారీ అంచనాలు ఉన్నాయి. ఈ నేపథ్యంలో గురువారం ఆ ఓటీటీతొలి 6 నిమిషాల వీడియో రిలీజ్ చేసింది.
ఇందులో వెన్స్డే అనే అమ్మాయిని ఓ కుర్చీకి కట్టేసి ఉండటం చూడొచ్చు. తాను సీరియల్ కిల్లర్ బేస్మెంట్ లో ఉన్నానని, తానే అతని తర్వాత టార్గెట్ అని అతడు అనుకుంటున్నట్లు ఆమె వాయిస్ ఓవర్ చెబుతుంది. అక్కడితో సీన్ కట్ అయి ఆరు వారాల ముందుకు వెళ్తుంది. ఆమెకు అసలు ఆ పరిస్థితి ఎందుకు వచ్చిందో చెప్పే ఫ్లాష్బ్యాక్ అది.
వెన్స్డే సీజన్ 2 వచ్చేది ఎప్పుడంటే?
వెన్స్డే రెండో సీజన్ టీజర్ గతంలోనే రిలీజ్ చేశారు. అప్పుడే ఈ కొత్త సీజన్ స్ట్రీమింగ్ తేదీలను నెట్ఫ్లిక్స్ అనౌన్స్ చేసింది. ఈ సిరీస్ లోని ప్రధాన పాత్ర వెన్స్డే ఆడమ్స్ ఈ కొత్త సీజన్లో మరింత ప్రమాదకరంగా మారి భయపెట్టడానికి వస్తున్నట్లు టీజర్ చూస్తే తెలుస్తోంది.
“మీ కేలండర్ ను ఇప్పుడే క్లియర్ చేసి పెట్టుకోండి. వెన్స్డే సీజన్ 2 ఆగస్ట్ 6 నెట్ఫ్లిక్స్ లోకి రాబోతోంది” అనే క్యాప్షన్ తో అప్పట్లో ఈ టీజర్ రిలీజ్ చేసింది. వెన్స్డే రెండో సీజన్ రెండు భాగాలుగా రాబోతుండటం విశేషం. తొలి భాగం ఆగస్ట్ 6 నుంచి స్ట్రీమింగ్ అవుతుంది. ఇక రెండో భాగం సెప్టెంబర్ 3న వస్తుందని నెట్ఫ్లిక్స్ తెలిపింది.
వెన్స్డే వెబ్ సిరీస్ గురించి..
వెన్స్డే ఓ అమెరికన్ సూపర్ నేచురల్ హారర్ కామెడీ వెబ్ సిరీస్. ఛార్లెస్ ఆడమ్స్ క్రియేట్ చేసిన వెన్స్డే ఆడమ్స్ అనే పాత్ర చుట్టూ తిరిగే సిరీస్ ఇది. ఈ పాత్రలో జెన్నా ఒర్టెగా నటించింది. ఆమెకు కొన్ని అతీత శక్తులు ఉంటాయి. తన సోదరుడిని బాయ్స్ పోలో టీమ్ సభ్యులు ఏడిపించారని తెలుసుకొని పూల్ లోకి పిరానాలను వదులుతుంది.
అది తెలుసుకున్న స్కూల్ యాజమాన్యం ఆమెను స్కూల్ నుంచి పంపించేస్తుంది. అక్కడి నుంచి ఆమె వెర్మాంట్ లోని జెరికోలో ఉన్న నెవెర్మోర్ అకాడెమీకి వెళ్తుంది. అక్కడ కూడా ఆమె ప్రవర్తన ఇతర విద్యార్థులకు వింతగా అనిపిస్తుంది. అయితే తనకున్న శక్తులతో అక్కడ జరిగే ఓ హత్య మిస్టరీని ఛేదిస్తుంది. తొలి సీజన్ కు ప్రేక్షకుల నుంచి మంచి రెస్పాన్స్ వచ్చింది. దీంతో ఆగస్టులో రాబోయే వెన్స్డే రెండో సీజన్ కోసం ఆసక్తిగా ఎదురు చూస్తున్నారు.
