E-Paper
పంచాయత్ సీజన్ 4 రివ్యూ.. క్లైమ్యాక్స్లో పెద్ద ట్విస్టే ఇచ్చారు.. ఎన్నికల రచ్చలోనూ నవ్వించినా..
ఇండియా మెచ్చిన వెబ్ సిరీస్లలో ఒకటి పంచాయత్. అమెజాన్ ప్రైమ్ వీడియోలోకి తాజాగా నాలుగో సీజన్ స్ట్రీమింగ్ కు వచ్చింది. ఇందులో మేకర్స్ పెద్ద ట్విస్టే ఇచ్చినా.. డర్టీ పాలిటిక్స్ లో తొలి మూడు సీజన్ల నవ్వులు ఈ కొత్త సీజన్లో పెద్దగా కనిపించలేదు.
పంచాయత్ వెబ్ సిరీస్ నాలుగో సీజన్ మంగళవారం (జూన్ 24) ప్రేక్షకుల ముందుకు వచ్చిన విషయం తెలిసిందే. ముందు చెప్పినదాని కంటే ఒక వారం ముందే ఈ కొత్త సీజన్ స్ట్రీమింగ్ అయింది. భారీ అంచనాల మధ్య వచ్చిన ఈ కొత్త సీజన్ ఎలా ఉంది? తొలి మూడు సీజన్లలాగే నవ్వించిందా? ఫులేరా ఎన్నికలు ఏమయ్యాయి? పంచాయత్ నాలుగో సీజన్ రివ్యూ ఇక్కడ చూడండి.
పంచాయత్ నాలుగో సీజన్ ఇలా..
పంచాయత్ పేరుతో 2019లో తొలిసారి అమెజాన్ ప్రైమ్ వీడియోలో ఈ వెబ్ సిరీస్ స్ట్రీమింగ్ కు వచ్చింది. చందన్ కుమార్ కథ అందించగా.. దీపక్ కుమార్ మిశ్రా డైరెక్ట్ చేశాడు. మూడు సీజన్లు పూర్తి చేసుకొని తాజాగా నాలుగో సీజన్ తో ప్రేక్షకుల ముందుకు వచ్చింది.
మరోసారి సచివ్ జీ అభిషేక్ త్రిపాఠీ (జితేంద్ర కుమార్), ప్రధాన్ జీ బ్రిజ్ భూషణ్ (రఘుబీర్ యాదవ్), ప్రహ్లాద్ (ఫైజల్ మాలిక్), ఆఫీస్ అసిస్టెంట్ వికాస్ (చందన్ రాయ్), ప్రధాన్ మంజు దేవి (నీనా గుప్తా), భూషణ్ (దుర్గేష్ కుమార్) తిరిగి వచ్చారు. మూడో సీజన్ ముగిసిన దగ్గర నుంచే ఈ నాలుగో సీజన్ మొదలైంది.
నాలుగో సీజన్.. డర్టీ పాలిటిక్స్
తొలి ఎపిసోడ్ మొత్తం అభిషేక్, భూషణ్ మధ్య రాజీ, కేసుల మాఫీ కోసం చేసే ప్రయత్నాలు చుట్టూ సాగుతుంది. రెండో ఎపిసోడ్ నుంచే అసలు స్టోరీ మొదలవుతుంది. ఫులేరా ఊళ్లో ఎన్నికల నగారా మోగుతుంది. దీంతో మంజు దేవి, క్రాంతి దేవి మధ్య హోరాహోరీ ఎన్నికల ప్రచారం ప్రారంభమవుతుంది.
అన్ని ఎన్నికల్లో ఉన్నట్లే ఫులేరాలోనూ డర్టీ పాలిటిక్స్ మొదలవుతాయి. ఒకరిపై మరొకరు పైచేయి సాధించడం కోసం ప్రయత్నాలు చేస్తూ ఉంటారు. నాలుగో సీజన్ మొత్తం ఎన్నికల ప్రక్రియ చుట్టూ తిరిగింది. ఎన్నికల్లో ఎవరు గెలిచారు? ఫులేరాకు కొత్త ప్రధాన్ ఎవరన్నది ఈ సీజన్లో చూడొచ్చు.
పంచాయత్ కొత్త సీజన్ ఎలా ఉందంటే?
పంచాయత్ నాలుగో సీజన్ రాజకీయాల్లో పడి అసలు కథను పక్కన పెట్టిందనే చెప్పాలి. అసలు తొలి మూడు సీజన్లు ప్రేక్షకులకు అంతగా కనెక్ట్ అయ్యాయంటే దానికి కారణం సున్నితమైన భావోద్వేగాలు, సాగుతూ హాయిగా నవ్విస్తూ సాగే కథనమే. కానీ నాలుగో సీజన్లో అవే మిస్సయ్యాయి.
ఎన్నికల హడావిడిలోనూ అక్కడక్కడా నవ్వించినా.. మొత్తంగా చూస్తే తొలి మూడు సీజన్లతో పోలిస్తే ఇదే అత్యంత బలహీనమైన సీజన్ అని చెప్పొచ్చు. ఎనిమిది ఎపిసోడ్లపాటు ఎన్నికల ప్రక్రియను సాగదీసినట్లుగా అనిపిస్తుంది. అయితే ఎప్పటిలాగే ఈ సిరీస్ లోని లీడ్ రోల్స్ నటన కోసం కొత్త సీజన్ చూడొచ్చు. మరోసారి అందరూ వారి వారి పాత్రల్లో జీవించేశారు.
ఇక క్లైమ్యాక్స్ లో వచ్చే ట్విస్ట్ కూడా ఐదో సీజన్ పై ఆసక్తి రేపుతోంది. కొత్త సీజన్లో ఏం జరగనుంది? సచివ్ జీ అభిషేక్ ఫులేరాలోనే ఉంటాడా? లేక తన ఎంబీయే కోసం వెళ్లిపోతాడా? అభిషేక్, రింకి ప్రేమ ఎక్కడి వరకూ వెళ్తుంది? అన్న ప్రశ్నలు రేకెత్తిస్తున్నాయి. అయితే నాలుగో సీజన్ డల్లుగా సాగడంతో ఐదో సీజన్ పై గతంలో ఉన్న స్థాయి అంచనాలు ఉండకపోవచ్చు.
