ఈ మధ్య బాక్సాఫీస్ దగ్గర బోల్తా పడిన సినిమాలు కూడా ఓటీటీలో ప్రేక్షకుల ఆదరణ సంపాదిస్తున్నాయి. తాజాగా నితిన్, శ్రీలీల జంటగా నటించిన రాబిన్హుడ్ మూవీ కూడా ఓటీటీలో దూసుకెళ్తోంది. బాక్సాఫీస్ దగ్గర ఈ సినిమా దారుణంగా బోల్తా పడింది. అయితే జీ5 ఓటీటీలోకి అడుగుపెట్టినప్పటి నుంచీ వరుసగా స్ట్రీమింగ్ మినట్స్ రికార్డులను తిరగరాస్తూ వెళ్తోంది.
రాబిన్హుడ్ ఓటీటీ స్ట్రీమింగ్
నితిన్, వెంకీ కుడుముల కాంబినేషన్ లో వచ్చిన సినిమా రాబిన్హుడ్. భారీ అంచనాల మధ్య థియేటర్లలో రిలీజైనా.. అక్కడ పెద్దగా రెస్పాన్స్ రాలేదు. చివరికి ఆస్ట్రేలియా క్రికెటర్ డేవిడ్ వార్నర్ గెస్ట్ రోల్ కూడా ఈ సినిమాను కాపాడలేకపోయింది.
అయితే ఈ యాక్షన్ కామెడీ మూవీ జీ5 ఓటీటీలోకి వచ్చిన తర్వాత ప్రేక్షకులను ఆకట్టుకుంటోంది. తాజాగా ఈ సినిమా 300 మిలియన్ల స్ట్రీమింగ్ మినట్స్ రికార్డును అందుకుంది. నిజానికి ఇది అరుదైన రికార్డే. ఓటీటీలోకి వచ్చిన అన్ని సినిమాలు ఈ స్థాయి స్ట్రీమింగ్ మినట్స్ రికార్డును అందుకోలేవు.
రాబిన్హుడ్ మూవీ గురించి..
నితిన్, శ్రీలీల జంటగా నటించిన రాబిన్హుడ్ మూవీ మార్చి 28న థియేటర్లలో రిలీజైంది. తనకు భీష్మలాంటి హిట్ ఇచ్చిన వెంకీ కుడుములకు నితిన్ మరో ఛాన్స్ ఇచ్చినా.. ఈ సినిమా తీవ్రంగా నిరాశ పరిచింది. పుష్పలాంటి సినిమాను తెరకెక్కించిన మైత్రీ మూవీ మేకర్స్ ఈ సినిమాను కూడా నిర్మించింది. ఇందులో రామ్ అనే ఓ అనాథ పాత్రలో నితిన్ నటించాడు. రాబిన్హుడ్ పేరుతో దొంగతనాలు చేస్తుంటాడు.
రాబిన్హుడ్ అనే టైటిల్ వినగానే సినిమా ఏంటో దాదాపుగా ఓ ఐడియా వస్తుంది. ఒక మంచి కోసం హీరో దొంగతనాలు చేస్తుంటాడని తెలిసిపోతుంది. అలాగే రాబిన్హుడ్ మూవీ స్టోరీ కూడా ఉంటుంది. కోటీశ్వరుల దగ్గర దోచేసి లేనోడికి పెట్టేయ్ అనేది రాబిన్హుడ్ ఫిలాసఫీ. అలాగే దొంగతనాలు చేస్తుంటాడు. రొటీన్ కథ అయినా కామెడీతో నడిపించాలని ప్రయత్నించిన దర్శకుడు వెంకీ కుడుముల సక్సెస్ అయ్యాడనే చెప్పవచ్చు. ఈ సినిమాను మీరు ఇప్పటి వరకూ చూసి ఉండకపోతే వెంటనే జీ5 ఓటీటీలో చూసేయండి.