ఓటీటీలోకి తెలుగు బోల్డ్ థ్రిల్లర్ మూవీ.. అమ్మాయి కోసం ఉన్మాదిగా మారే యువకుడు.. నాలుగు భాషల్లో స్ట్రీమింగ్

ఓటీటీలోకి ఓ తెలుగు బోల్డ్ థ్రిల్లర్ మూవీ సుమారు మూడు నెలల తర్వాత స్ట్రీమింగ్ కు వస్తోంది. ప్రముఖ దర్శకుడు రామ్ గోపాల్ వర్మ నిర్మాణ సంస్థ ఆర్జీవీ డెన్ నుంచి వచ్చిన ఈ మూవీ ఈవారమే డిజిటల్ ప్రీమియర్ కాబోతోంది.

ఈ ఏడాది ఏప్రిల్ 4న థియేటర్లలో రిలీజైన తెలుగు థ్రిల్లర్ మూవీ శారీ (Saaree). ఒకప్పుడు ఇండియాలోనే ప్రముఖ దర్శకుల్లో ఒకడిగా పేరుగాంచిన రామ్ గోపాల్ వర్మ నిర్మాణ సంస్థ ఆర్జీవీ డెన్ ప్రోడక్ట్ గా వచ్చింది. థియేటర్లలో పెద్దగా రెస్పాన్స్ రాలేదు. మొత్తానికి సుమారు మూడు నెలల తర్వాత ఇప్పుడు డిజిటల్ ప్రీమియర్ కు సిద్ధమైంది.

ఓటీటీలోకి తెలుగు బోల్డ్ థ్రిల్లర్ మూవీ.. అమ్మాయి కోసం ఉన్మాదిగా మారే యువకుడు.. నాలుగు భాషల్లో స్ట్రీమింగ్

శారీ ఓటీటీ రిలీజ్ డేట్

రామ్గోపాల్ వర్మ సమర్పించిన మూవీ శారీ. అతడే స్క్రిప్ట్ కూడా అందించాడు. ఈ శారీ మూవీ వచ్చే శుక్రవారం (జూన్ 27) నుంచి లయన్స్‌గేట్ ప్లే ఓటీటీలో స్ట్రీమింగ్ కాబోతోంది. ఓటీటీప్లే ప్రీమియం సబ్‌స్క్రిప్షన్ ఉన్నా కూడా ఈ సినిమాను చూడొచ్చు.

తెలుగుతోపాటు తమిళం, మలయాళం, హిందీ భాషల్లోనూ ఓటీటీలో స్ట్రీమింగ్ కు రానుండటం విశేషం. ఏప్రిల్ 4న థియేటర్లలో రిలీజైన ఈ సినిమాకు ప్రేక్షకుల నుంచి పెద్దగా స్పందన రాలేదు. గత కొన్నేళ్లుగా ఆర్జీవీకి చెందిన ఎన్నో సినిమాలు వచ్చి వెళ్లినట్లుగానే ఈ శారీ మూవీ కూడా ఏమాత్రం ప్రభావం చూపలేదు.

శారీ మూవీ గురించి..

శారీ మూవీని నిజ జీవిత ఘటనల ఆధారంగా తెరకెక్కించినట్లు గతంలోనే డైరెక్టర్ రామ్ గోపాల్ వర్మ వెల్లడించాడు. ఈ సినిమాను ఆర్జీవీ సమర్పించగా.. గిరి కృష్ణ కమల్ డైరెక్ట్ చేశాడు. ఓ అమ్మాయి కోసం ఉన్మాదిగా మారే యువకుడి చుట్టూ తిరిగే స్టోరీ ఇది. ఈ కాలం యువత సోషల్ మీడియా పేరుతో ఎలా పక్కదారి పడుతోందో, అమ్మాయిలు ఎలా బలవుతున్నారో చూపించే ప్రయత్నం ఈ సినిమా ద్వారా చేశారు.

ఈ సినిమా కిట్టు (సత్య యదు) అనే యువకుడి చుట్టూ తిరుగుతుంది. అతడు ఓ రోజు ఫ్రెండ్స్ తో కలిసి ఓ టూర్ వెళ్తాడు. అక్కడ ఆరాధ్య దేవి (ఆరాధ్య దేవి) అనే అమ్మాయి చీర కట్టుకొని ఎంతో అందంగా ముస్తాబై అతనికి కనిపిస్తుంది. అప్పటి నుంచే ఆమెను ఎలాగైనా దక్కించుకోవాలని అనుకుంటాడు. ఆమెకు ప్రపోజ్ కూడా చేస్తాడు. కానీ ఆమె నిరాకరిస్తుంది. దీంతో కిట్టు ఉన్మాదిలా మారిపోతాడు. ఆమెను దక్కించుకోవడానికి ఎంతకైనా తెగిస్తాడు.

ఓ బలమైన సామాజిక సందేశంతో తెరకెక్కిన సినిమానే అయినా.. దానిని స్క్రీన్ పై చూపించిన తీరు దారుణంగా ఉంది. మితిమీరిన హింస, బోల్డ్‌నెస్ తో ఫ్యామిలీ ప్రేక్షకులకు మూవీ దూరమైంది. మరి ఈ వారం లయన్స్‌గేట్ ప్లే ఓటీటీలోకి వస్తున్న ఈ శారీ సినిమాకు ప్రేక్షకుల నుంచి ఎలాంటి రెస్పాన్స్ వస్తుందో చూడాలి.