E-Paper
ది ఫ్యామిలీ మ్యాన్ సీజన్ 3 స్ట్రీమింగ్ డేట్ ఇదే.. ఎన్నాళ్లుగానో ఊరించి మొత్తానికి అనౌన్స్ చేసిన ప్రైమ్ వీడియో
ది ఫ్యామిలీ మ్యాన్ సీజన్ 3 వచ్చేస్తోంది. నాలుగేళ్లుగా ఈ కొత్త సీజన్ కోసం ఎదురు చూస్తున్న ఫ్యాన్స్ ఆశ నెరవేరబోతోంది. మంగళవారం (అక్టోబర్ 28) ఓ ఫన్నీ వీడియో ద్వారా ప్రైమ్ వీడియో ఓటీటీ రిలీజ్ డేట్ ను అనౌన్స్ చేసింది.
అమెజాన్ ప్రైమ్ వీడియోలో మోస్ట్ సక్సెస్ఫుల్ వెబ్ సిరీస్ లలో ఒకటి ది ఫ్యామిలీ మ్యాన్. ఇప్పటికే రెండు సీజన్లు పూర్తి చేసుకున్న ఈ సిరీస్ ఇప్పుడు కొత్త సీజన్ తో రాబోతోంది. ఇందులో లీడ్ రోల్స్ పోషించిన ప్రియమణి, మనోజ్ బాజ్పాయీలతో కూడిన ఓ ఫన్నీ వీడియో ద్వారా ప్రైమ్ వీడియో రిలీజ్ డేట్ అనౌన్స్ చేసింది.
ది ఫ్యామిలీ మ్యాన్ వచ్చేది ఆ రోజే..
ది ఫ్యామిలీ మ్యాన్ సీజన్ 3 స్ట్రీమింగ్ తేదీని ప్రైమ్ వీడియో ఎట్టకేలకు వెల్లడించింది. నవంబర్ 21 నుంచి ఈ మూడో సీజన్ రానున్నట్లు తెలిపింది. ఈ మేరకు మంగళవారం (అక్టోబర్ 28) ఓ వీడియోను సోషల్ మీడియాలో పోస్ట్ చేసింది. అందులో ప్రియమణి, మనోజ్ బాజ్పాయీలను ఓ ఫన్నీ అవతార్ లో చూడొచ్చు. “డార్లింగ్స్.. శ్రీకాంత్ కమ్బ్యాక్ టైమ్ వచ్చేసింది.. ది ఫ్యామిలీ మ్యాన్ ప్రైమ్ లో నవంబర్ 21 నుంచి” అనే క్యాప్షన్ తో ఓ వీడియో పోస్ట్ చేసింది.
నాలుగేళ్లుగా ఒకే పనిలో శ్రీకాంత్ తివారీ..
ఈ వీడియో చాలా సరదాగా సాగిపోయింది. మొదట్లోనే ఎంట్రీ ఇచ్చిన ప్రియమణి.. ఈ నాలుగేళ్లలో తన ఇంట్లో ఏం జరిగిందో చెప్పడం చూడొచ్చు. మొదట తన పిల్లలు ఏం చేస్తున్నారో చెప్పే ఆమె.. తర్వాత తన భర్త శ్రీకాంత్ తివారీ (మనోజ్ బాజ్పాయీ) గురించి చెబుతూ నాలుగేళ్లుగా ఒకే పని చేస్తున్నాడని అంటుంది. అప్పుడే అతడు ఆ… అనుకుంటూ అటుగా వెళ్తాడు. ఈ వీడియో మొత్తం అతడు అలాగే అంటూ కనిపిస్తాడు. చివరికి ఆ రహా హు మై (నేను వచ్చేస్తున్నాను) అని చెబుతాడు. అప్పుడే ది ఫ్యామిలీ మ్యాన్ కొత్త సీజన్ నవంబర్ 21 నుంచి అనే అనౌన్స్మెంట్ వస్తుంది.
ది ఫ్యామిలీ మ్యాన్ గురించి..
ది ఫ్యామిలీ మ్యాన్ ప్రైమ్ వీడియో అత్యంత విజయవంతమైన వెబ్ సిరీస్ లలో ఒకటి. ఐఎండీబీలో ఏకంగా 8.7 రేటింగ్ సొంతం చేసుకుంది. తొలి సీజన్ 2019లో రాగా.. రెండో సీజన్ 2021లో వచ్చింది. మూడో సీజన్ కోసం నాలుగేళ్లుగా ప్రేక్షకులు ఎదురు చూస్తూనే ఉన్నారు. తొలి సీజన్ కశ్మీర్ ఉగ్రవాదం చుట్టూ తిరగగా.. రెండో సీజన్ శ్రీలంక ఎల్టీటీఈ ఉగ్రవాదంతో కథ నడిపించారు.
ఈ సీజన్లోనే సమంత వెబ్ సిరీస్ లోకి ఎంట్రీ ఇచ్చింది. మొత్తంగా రెండు సీజన్లు కలిపి 19 ఎపిసోడ్లు ఉన్నాయి. రాజ్ అండ్ డీకే క్రియేట్ చేసి, డైరెక్ట్ చేసిన ఈ యాక్షన్ థ్రిల్లర్ వెబ్ సిరీస్ మూడో సీజన్ పై భారీ అంచనాలు ఉన్నాయి. ఇందులో కరోనా వైరస్ మూలాల గురించి చెప్పబోతున్నట్లుగా రెండో సీజన్ చివర్లో చూపించారు. మరి ఈ కొత్త సీజన్ ఎలా ఉంటుందో చూడాలి.
