E-Paper
తుడరుమ్ రివ్యూ.. పర్ఫెక్ట్ రివేంజ్ థ్రిల్లర్.. ఇంటర్వెల్ ట్విస్ట్, సెకండాఫ్ గూస్బంప్స్.. మోహన్లాల్ నట విశ్వరూపం
తుడరుమ్ మూవీ బాక్సాఫీస్ దగ్గర ఇంత పెద్ద హిట్ ఎందుకైందో ఆ సినిమా చూస్తే తెలుస్తుంది. ఇదో పర్ఫెక్ట్ రివేంజ్ థ్రిల్లర్ అని చెప్పొచ్చు. ఇంటర్వెల్ ట్విస్ట్, సెకండాఫ్ అయితే గూస్బంప్స్ గ్యారెంటీ. మోహన్లాల్ తన నట విశ్వరూపం చూపించాడు.
థ్రిల్లర్ సినిమా తీయడం అంటే అంత సులువైన విషయం కాదు. ఓ రెగ్యులర్ స్టోరీ అయినా కూడా దానికి ఊహించని ట్విస్టులు జోడించి మొదటి నుంచీ క్లైమ్యాక్స్ వరకూ ప్రేక్షకులను సీట్లకు అతుక్కుపోయేలా చేసినప్పుడే ఈ జానర్ సినిమాలు ఆసక్తి రేపుతాయి. మోహన్లాల్ నటించిన మలయాళం రివేంజ్ థ్రిల్లర్ తుడరుమ్ (Thudarum) సరిగ్గా అలాంటి సినిమానే.
తుడరుమ్.. సూపర్ థ్రిల్లర్
ఈ ఏడాది మోహన్లాల్ నటించిన రెండో బ్లాక్బస్టర్ మూవీ ఈ తుడరుమ్. అంతకుముందే ఎల్2: ఎంపురాన్ తో అత్యధిక వసూళ్ల మలయాళం సినిమాను అందించాడు. కానీ దాంతో పోలిస్తే ఈ తుడరుం పూర్తి భిన్నమైనది. ఒకప్పటి వింటేజ్ మోహన్లాల్ ను మరోసారి ఈ సినిమా మన కళ్ల ముందుకు తీసుకొచ్చింది.
ఆపరేషన్ జావా, సౌదీ వెల్లక్కలాంటి సూపర్ హిట్స్ అందించిన డైరెక్టర్ తరుణ్ మూర్తి ఈ తుడరుమ్ తో మరోసారి ప్రేక్షకులను మెస్మరైజ్ చేశాడు. మనసుకు హత్తుకునే ఫ్యామిలీ ఎమోషన్స్ ను చాలా బాగా చూపించే తరుణ్ మూర్తి.. ఈ తుడరుంలో ఆ ఎమోషన్స్ కు మంచి థ్రిల్ జోడించి అందించాడు.
తుడరుం స్టోరీ ఏంటంటే?
పరువు హత్యలపై ఇప్పటికే ఎన్నో సినిమాలు వచ్చాయి. కానీ తుడరుమ్ లాగా ఊహించని ట్విస్టులతో వచ్చినవి మాత్రం చాలా తక్కువే. సినిమా ఎక్కడో మొదలై ఎక్కడికో వెళ్తుంది. చాలా వరకు మలయాళం సినిమాలు స్లోగా మొదలై తర్వాత ఆడియెన్స్ ను ఎక్కడికో తీసుకెళ్తాయి.
ఈ తుడరుమ్ కూడా అలాంటిదే. భార్య, ఇద్దరు పిల్లలు, తనకెంతో ఇష్టమైన బ్లాక్ అంబాసిడర్ కారుతో హాయిగా జీవించే బెంజ్ షణ్ముగం (మోహన్లాల్) కథే ఈ తుడరుం. ఓ రోజు తన కొడుకు ఫ్రెండ్స్ ఆ కారును తీసుకెళ్లి చిన్న యాక్సిడెంట్ చేయడం, ఆ తర్వాత అది షెడ్డుకు చేరడం, అక్కడి నుంచి ఆ కారులో గంజాయి స్మగ్లింగ్ అంటూ పోలీస్ స్టేషన్ కు తీసుకెళ్లడం, ఆ కారును విడిపించుకునేందుకు హీరో చేసే ప్రయత్నాలు.. ఫస్టాఫ్ అంతా ఇలా సాగిపోతుంది.
అయితే ఇంటర్వెల్ దగ్గరవుతున్న కొద్దీ కథలో ఆసక్తి పెరుగుతుంది. అక్కడ ఉండే చిన్న ట్విస్ట్.. సెకండాఫ్ లో పీక్ స్టేజ్కి తీసుకెళ్లి.. ఇక ఆ తర్వాత అంతా గూస్బంప్స్ ఇస్తుంది. ముఖ్యంగా బెంజ్ గా మోహన్లాల్, లలితగా శోభన, సీఐ జార్జ్ మాథన్ గా ప్రకాశ్ వర్మ నటన మరో లెవెల్ అని చెప్పాలి.
తుడరుం ఎందుకు చూడాలంటే?
తుడరుమ్ ఓ భిన్నమైన రివేంజ్ థ్రిల్లర్ మూవీ. సినిమా మొదట్లో ఫ్యామిలీ అనుబంధాలను చూపిస్తూ డైరెక్టర్ తరుణ్ మూర్తి కథను మొదలుపెడతాడు. ఫస్టాఫ్ పెద్దగా థ్రిల్ ఏమీ ఇవ్వదు. కానీ ఇంటర్వెల్లో వచ్చే ట్విస్టుతోనే కథ మలుపు తిరుగుతుంది. సెకండాఫ్ అంతా ఓ సీట్ ఎడ్జ్ థ్రిల్లర్లా సాగుతుంది.
తరుణ్ మూర్తి ఈ కథను చెప్పిన విధానం, లీడ్ క్యారెక్టర్స్ నటన, కంటతడి పెట్టించే ఎమోషన్స్.. తుడరుం మూవీని ప్రత్యేకంగా నిలిపాయి. ఫ్లాష్బ్యాక్ లో సినిమాల్లో ఓ స్టంట్ మ్యాన్, ఓ సాధారణ ట్యాక్సీ డ్రైవర్.. తనకు అన్యాయం చేసిన ఇద్దరు పోలీసు అధికారులపై తీర్చుకునే ప్రతీకారమే ఈ తుడరుం కథ. తన ఫ్యామిలీ కోసం ఓ హీరో ఎంత వరకూ వెళ్తాడో గతంలో దృశ్యంలాంటి సినిమాలు చూపించాయి. ఈ తుడరుం కూడా అలాంటిదే. ఆ సినిమాలోని మోహన్లాలే ఈ మూవీ చూస్తుంటే కూడా గుర్తుకు వస్తుంటాడు.
తెలుగులోనూ అదే అర్థం కాని టైటిల్ తో రిలీజ్ చేసినందుకు మొదట్లో ఈ మూవీపై విమర్శలు వెల్లువెత్తినా.. తర్వాత సినిమా చూసిన తెలుగు ప్రేక్షకులు మెస్మరైజ్ అయ్యారు. దీంతో ఇక్కడా బాక్సాఫీస్ దగ్గర ఫర్వాలేదనిపించింది. ఒకవేళ థియేటర్లలో మిస్ అయి ఉంటే.. శుక్రవారం (మే 30) నుంచి జియోహాట్స్టార్ ఓటీటీలో స్ట్రీమింగ్ అవుతున్న ఈ సినిమాను ఈ వీకెండ్ చూసేయండి. కచ్చితంగా థ్రిల్ అవుతారు.
