ఉదయం చేసే ఈ 5 తప్పులు మీ కిడ్నీలకు చేటు చేయొచ్చు! చెన్నై యూరాలజిస్ట్ హెచ్చరిక

ఆరోగ్యకరమైన జీవితానికి కిడ్నీల సంరక్షణ చాలా ముఖ్యం. చెన్నైకి చెందిన ప్రముఖ ట్రాన్స్‌ప్లాంట్, రోబోటిక్ యూరాలజిస్ట్ డాక్టర్ వెంకట్ సుబ్రమణియం, చాలామంది ఉదయం తెలియకుండానే చేసే ఐదు సాధారణ అలవాట్లు కిడ్నీలకు ఎలా హాని కలిగిస్తాయో వివరించారు.

రోజులో ఉదయం సమయం మన దినచర్య మొత్తానికి శక్తినిస్తుంది. కానీ, ఉదయం మనం చేసే కొన్ని చిన్న, నిస్సారమైన అలవాట్లు కూడా దీర్ఘకాలంలో మన కీలకమైన అవయవాలలో ఒకటైన కిడ్నీల ఆరోగ్యాన్ని దెబ్బతీయవచ్చని నిపుణులు చెబుతున్నారు.

ఉదయం చేసే ఈ 5 తప్పులు మీ కిడ్నీలకు చేటు చేయొచ్చు (Shutterstock)

ఈ విషయాన్ని ప్రముఖ యూరాలజిస్ట్, ట్రాన్స్‌ప్లాంట్, రోబోటిక్ సర్జన్ అయిన డాక్టర్ వెంకట్ సుబ్రమణియం తన ఇన్‌స్టాగ్రామ్ పోస్ట్‌లో పంచుకున్నారు. కిడ్నీలను ఆరోగ్యంగా ఉంచుకోవడానికి ఉదయంపూట తప్పక నివారించాల్సిన 5 సాధారణ అలవాట్లను ఆయన స్పష్టం చేశారు.

1. ఉదయం లేవగానే నీరు తాగకపోవడం

"రాత్రంతా ఉపవాసం తరువాత, మన శరీరంతో పాటు కిడ్నీలు కూడా కాస్త నిర్జలీకరణకు (dehydration) గురై నీటి కోసం అల్లాడుతుంటాయి. అందుకే కాఫీ లేదా టీ తాగడానికి బదులుగా, కనీసం ఒక గ్లాసు నీటితో మీ రోజును ప్రారంభించండి" అని డాక్టర్ వెంకట్ సూచించారు. ఉదయం నీళ్లు తాగడం వల్ల కిడ్నీలు శరీరంలోని విషపదార్థాలను (toxins) బయటకు పంపడానికి సహాయపడతాయి.

2. మూత్రాశయాన్ని ఖాళీ చేయకుండా ఉండడం

"రాత్రంతా మూత్రాన్ని ఆపుకోవడం వల్ల మీ మూత్రాశయం (bladder) ఇప్పటికే పూర్తిగా నిండి, సాగిపోయి ఉంటుంది. అందుకే ఉదయం లేవగానే కానీ, రోజులో ఏ సమయంలోనైనా కానీ మూత్రాన్ని ఎప్పుడూ ఎక్కువసేపు ఆపుకోవద్దు" అని ఆయన గట్టిగా హెచ్చరించారు. మూత్రాన్ని ఆపుకోవడం వల్ల కిడ్నీలపై, మూత్రాశయంపై అనవసరమైన ఒత్తిడి పెరుగుతుంది.

3. ఖాళీ కడుపుతో పెయిన్‌కిల్లర్స్ వేసుకోవడం

"సరైన జాగ్రత్తలు తీసుకోకుండా పెయిన్‌కిల్లర్స్‌ (Painkillers) వాడితే అవి మీ కిడ్నీలకు హాని చేస్తాయి. ముఖ్యంగా ఖాళీ కడుపుతో వేసుకుంటే ఈ ప్రమాదం మరింత ఎక్కువవుతుంది" అని డాక్టర్ వెంకట్ వివరించారు. ఎప్పుడైనా సరే మందుల వాడకంలో వైద్యుల సూచనలను పాటించాలి. నొప్పి నివారణ మాత్రలు వేసుకునేటప్పుడు తప్పనిసరిగా వాటిని ఆహారంతో పాటు లేదా తగినంత నీటితో తీసుకోవాలని తెలిపారు.

4. వ్యాయామం తర్వాత నీళ్లు తాగకుండా ఉండడం

"ఉదయం వ్యాయామం చేయడం మీ రోజును అద్భుతంగా ప్రారంభించడానికి మంచి మార్గం, కానీ వర్కౌట్ తర్వాత శరీరానికి తగినంత నీటిని అందించడం కూడా అంతే ముఖ్యం" అని ఆయన గుర్తుచేశారు. వ్యాయామం సమయంలో చెమట రూపంలో శరీరం నీటిని కోల్పోతుంది. ఈ సమయంలో నీరు తాగితే, కిడ్నీలు ఒత్తిడికి గురికాకుండా విషపదార్థాలను సులువుగా బయటకు పంపుతాయి.

5. అల్పాహారం (బ్రేక్‌ఫాస్ట్) మానేయడం

"వ్యక్తిగతంగా, నేను ప్రతి ఒక్కరూ ఆరోగ్యకరమైన, ప్రోటీన్ అధికంగా ఉన్న అల్పాహారంతో రోజును ప్రారంభించాలని సిఫార్సు చేస్తాను" అని డాక్టర్ వెంకట్ పేర్కొన్నారు. చాలామంది అల్పాహారం మానేయడం వల్ల, ఆకలి తట్టుకోలేక ఉప్పు ఎక్కువగా ఉన్న చిరుతిండ్లు (high-salt snacks) తింటారు. అధిక సోడియం కారణంగా కిడ్నీలపై భారం పడుతుంది.

ఈ సాధారణ చిట్కాలను పాటించడం ద్వారా మీ ఉదయాన్ని ఆరోగ్యంగా, శక్తిమంతంగా మార్చుకోవచ్చు. దీని ద్వారా మీ కిడ్నీలను కూడా సులభంగా కాపాడుకోవచ్చు.

(పాఠకులకు ముఖ్య గమనిక: ఈ వార్తా కథనం సోషల్ మీడియాలో నిపుణులు అందించిన సమాచారం ఆధారంగా రూపొందించింది. ఇందులో పేర్కొన్న అంశాలను మా సంస్థ స్వతంత్రంగా ధృవీకరించలేదు. ఇది కేవలం సమాచారం అందించడానికి మాత్రమే. వృత్తిపరమైన వైద్య సలహాకు ఇది ఏమాత్రం ప్రత్యామ్నాయం కాదు.)