దీపావళి 2025 క్యాలెండర్: ధనత్రయోదశి నుంచి భాయిదూజ్ వరకు 5 రోజుల పండుగ తేదీలు

దీపావళి 2025 ఎప్పుడు వస్తుంది? ధనత్రయోదశి (ధన్‌తేరస్) నుంచి భాయిదూజ్ వరకు ప్రతి రోజుకు సంబంధించిన కచ్చితమైన తేదీలు, పండుగ విశేషాలను తెలుసుకోండి. 5 రోజుల పాటు జరిగే ఈ ఉత్సవాల క్యాలెండర్, ముహూర్తాల వివరాలు ఇక్కడ ఉన్నాయి.

దీపావళి పండుగను దేశవ్యాప్తంగా హిందువులు ఎంతో ఆనందోత్సాహాలతో, వైభవంగా జరుపుకుంటారు. ప్రతి ఇంటిని దీపాలు, రంగోళీలు, రంగురంగుల లైట్లతో అద్భుతంగా అలంకరిస్తారు. ఈ వేడుకలు కేవలం ఒక రోజు కాదు, ఏకంగా ఐదు రోజుల పాటు జరుగుతాయి. ప్రతి రోజుకు ఒక ప్రత్యేకమైన ఆచారం, ప్రాముఖ్యత ఉంటాయి. ఈ ఐదు రోజుల దీపావళి ఉత్సవాల క్యాలెండర్, తేదీలు, విశేషాలు ఇక్కడ అందిస్తున్నాం.

దీపావళి 2025 క్యాలెండర్: ధనత్రయోదశి నుంచి భాయిదూజ్ వరకు 5 రోజుల పండుగ తేదీలు (Pixabay)

దీపావళి 2025: తేదీలు, శుభ ముహూర్తాలు

ప్రముఖ ధృక్ పంచాంగం ప్రకారం, 2025 సంవత్సరంలో పండుగను జరుపుకోవడానికి అనుకూలమైన ముహూర్తాలు, తేదీలు ఇలా ఉన్నాయి.

రోజు 1: ధనత్రయోదశి (ధన్‌తేరస్) - అక్టోబర్ 18.

పండుగ ప్రాముఖ్యత: లక్ష్మీదేవి, కుబేరుడిని పూజించడం, కొత్త వస్తువులు కొనుగోలు చేయడం.

రోజు 2: నరక చతుర్దశి (ఛోటీ దీపావళి) - అక్టోబర్ 20

పండుగ ప్రాముఖ్యత: శ్రీకృష్ణుడు నరకాసురుడిని వధించినందుకు జరుపుతారు. మంచిపై చెడు విజయాన్ని సూచిస్తుంది.

రోజు 3: దీపావళి (లక్ష్మీ పూజ) - అక్టోబర్ 20

పండుగ ప్రాముఖ్యత: శ్రీరాముడు అయోధ్యకు తిరిగి రావడం; సాయంత్రం లక్ష్మీ గణేశ పూజ.

రోజు 4: గోవర్ధన పూజ - అక్టోబర్ 22

పండుగ ప్రాముఖ్యత: శ్రీకృష్ణుడు గోవర్ధన పర్వతాన్ని ఎత్తి, మథుర ప్రజలను ఇంద్రుడి కోపం నుంచి కాపాడినందుకు జరుపుకుంటారు.

రోజు 5: భాయిదూజ్ - అక్టోబర్ 23

పండుగ ప్రాముఖ్యత: సోదర సోదరీమణుల అనుబంధాన్ని, ప్రేమను జరుపుకునే రోజు.

దీపావళి పూర్తి క్యాలెండర్ – ప్రతి రోజు విశేషం

దీపావళి పండుగ ధనత్రయోదశి (ధన్‌తేరస్)తో మొదలై, నరక చతుర్దశి (ఛోటీ దీపావళి), ప్రధాన దీపావళి, గోవర్ధన పూజ, చివరగా భాయిదూజ్‌తో ముగుస్తుంది. ప్రతి రోజు ప్రాముఖ్యతను వివరంగా తెలుసుకుందాం.

మొదటి రోజు: ధనత్రయోదశి (ధన్‌తేరస్) - అక్టోబర్ 18

దీపావళి వేడుకలు ధనత్రయోదశితో ప్రారంభమవుతాయి. ఈ రోజున భక్తులు లక్ష్మీదేవిని, కుబేరుడిని పూజించి సంపద, శ్రేయస్సు కోసం ప్రార్థిస్తారు. ముఖ్యంగా, బంగారం, వెండి నాణేలు, ఆభరణాలు లేదా కొత్త గృహోపకరణాలను కొనుగోలు చేయడం ఆనవాయితీగా వస్తోంది. ఈ రోజు కొత్త వస్తువులు కొంటే అదృష్టం కలుగుతుందని నమ్ముతారు.

రెండవ రోజు: నరక చతుర్దశి (ఛోటీ దీపావళి) - అక్టోబర్ 20

నరక చతుర్దశిని 'ఛోటీ దీపావళి' లేదా 'కాళీ చౌదస్' అని కూడా అంటారు. ఇది ప్రధాన దీపావళికి ఒక రోజు ముందు వస్తుంది. ఈ రోజు శ్రీకృష్ణుడు నరకాసురుడిపై విజయం సాధించినందుకు జరుపుకుంటారు. చెడుపై మంచి సాధించిన విజయానికి ఇది ప్రతీక. ఇళ్లలో దీపాలు వెలిగించి, ఆధ్యాత్మిక శుద్ధి కోసం ప్రత్యేక పూజలు నిర్వహిస్తారు.

మూడవ రోజు: దీపావళి (లక్ష్మీ పూజ) - అక్టోబర్ 20

అత్యంత ముఖ్యమైన రోజు దీపావళి. ఈ రోజునే శ్రీరాముడు, సీతాదేవి, లక్ష్మణుడు 14 సంవత్సరాల వనవాసం తరువాత అయోధ్యకు తిరిగి వచ్చారు. ఆ సంతోషానికి సూచనగా ప్రజలు ఇళ్లను మట్టి ప్రమిదలు (దియాలు), రంగోళీలు, విద్యుత్ దీపాలతో అలంకరిస్తారు. సాయంత్రం వేళ లక్ష్మీ దేవి, గణేశుడికి ప్రత్యేక పూజలు చేసి, సంపద, శ్రేయస్సు, తెలివితేటలు ప్రసాదించమని వేడుకుంటారు.

నరక చతుర్దశి, దీపావళి రెండూ కొన్ని ప్రాంతాలలో ఒకే రోజు అంటే అక్టోబర్ 20న వస్తున్నాయి. కచ్చితమైన ముహూర్తాలు, తిథులు ప్రాంతాన్ని బట్టి మారవచ్చు.

నాలుగవ రోజు: గోవర్ధన పూజ - అక్టోబర్ 22

దీపావళి మరుసటి రోజు గోవర్ధన పూజ జరుపుకుంటారు. ఈ రోజున గోవర్ధన పర్వతాన్ని ఆరాధిస్తారు. పౌరాణిక కథనం ప్రకారం, శ్రీకృష్ణుడు ఇంద్రుడి కోపం నుంచి మథుర ప్రజలను కాపాడటానికి గోవర్ధన పర్వతాన్ని తన చిటికెన వేలిపై ఎత్తారని చెబుతారు. ఈ రోజున భక్తులు ఆహార పదార్థాలతో గోవర్ధన పర్వత ఆకారాన్ని చేసి పూజిస్తారు.

ఐదవ రోజు: భాయిదూజ్ - అక్టోబర్ 23

దీపావళి వేడుకల్లో చివరి రోజు భాయిదూజ్ (దీనిని 'భౌ బీజ్' లేదా 'భయ్యా దూజ్' అని కూడా అంటారు). ఇది అన్నాచెల్లెళ్లు లేదా అక్కాతమ్ముళ్ల మధ్య బంధాన్ని పటిష్టం చేసే పండుగ. ఈ రోజున సోదరీమణులు తమ సోదరుల నుదిటిపై తిలకం లేదా బొట్టు పెట్టి, వారికి ఆయురారోగ్యాలు, దీర్ఘాయువు ఉండాలని ప్రార్థిస్తారు. బదులుగా, సోదరులు వారికి బహుమతులు అందించి, రక్షణగా ఉంటామని మాటిస్తారు.