హ్యాపీ ఫ్రెండ్‌షిప్ డే: చీకటిలోనూ వెలుగులు నింపే నేస్తానికి స్పెషల్ డే

ఆగస్టు నెల మొదలవగానే, మనసులో తెలియని ఓ తీయని భావన. ఆ భావన స్నేహం. ఆ బంధానికి మనం ఇచ్చే విలువకు, ఆప్యాయతకు ప్రతీకగా వచ్చేదే స్నేహితుల దినోత్సవం.. అదే హ్యాపీ ఫ్రెండ్‌షిప్‌ డే.

ప్రతి సంవత్సరం ఆగస్టు మొదటి ఆదివారం ఫ్రెండ్‌షిప్ డే పండుగను జరుపుకుంటాం. ఈ ఆగస్టు 3వ తేదీ ఆదివారం స్నేహితుల దినోత్సవం రాబోతోంది. ఒకప్పుడు మనకు తెలియని మనుషులు, మన జీవితంలోకి అడుగుపెట్టి, రక్త సంబంధం కంటే గొప్ప బంధంగా మారతారు. కష్టసుఖాల్లో తోడుండి, ఒకరికొకరు అండగా నిలబడి, అలుపెరగని ప్రయాణంలో ఓదార్పునిచ్చే బలం స్నేహం. అలాంటి స్నేహానికి గుర్తింపుగా ఒక రోజు ఉండాలని ఆలోచించడమే ఫ్రెండ్‌షిప్‌ డే పుట్టుకకు కారణం.

హ్యాపీ ఫ్రెండ్‌షిప్ డే (Pixabay)

స్నేహితుల దినోత్సవం.. పుట్టుక, విస్తరణ

నిజానికి, స్నేహితుల దినోత్సవం ఆలోచనకు చాలా దశాబ్దాల చరిత్ర ఉంది. 1930లో హాల్‌మార్క్ కార్డ్స్ వ్యవస్థాపకుడు జాయిస్ హాల్ మొదటిసారిగా ఫ్రెండ్‌షిప్ డేను ప్రతిపాదించారు. గ్రీటింగ్ కార్డులు ఇచ్చిపుచ్చుకోవడం ద్వారా స్నేహాన్ని చాటాలని ఆయన సూచించారు. అయితే, ఇది కేవలం వ్యాపార ఆలోచనగా భావించి మొదట్లో పెద్దగా ఎవరూ పట్టించుకోలేదు.

ఈ ఆలోచనకు నిజమైన స్ఫూర్తి పరాగ్వే నుంచి వచ్చింది. 1958 జూలై 20న డాక్టర్ రామన్ ఆర్టెమియో బ్రాచో అనే ఆయన తన స్నేహితులతో కలిసి ప్యూర్టో పినాస్కోలో డిన్నర్ చేస్తుండగా వచ్చిన ఆలోచనతో 'ప్రపంచ స్నేహ దళం' (World Friendship Crusade) అనే సంస్థను స్థాపించారు. జాతి, రంగు, మతం తేడా లేకుండా మానవులందరి మధ్య స్నేహాన్ని, సౌభ్రాతృత్వాన్ని పెంపొందించడం దీని ప్రధాన లక్ష్యం. అప్పటి నుండి పరాగ్వేలో జూలై 30ని స్నేహితుల దినోత్సవంగా జరుపుకుంటున్నారు.

ఆ తర్వాత, 1935లో అమెరికా కాంగ్రెస్ ఆగస్టు మొదటి ఆదివారాన్ని 'జాతీయ స్నేహితుల దినోత్సవం'గా ప్రకటించినప్పటికీ, ప్రపంచవ్యాప్త గుర్తింపు రావడానికి మరింత సమయం పట్టింది. చివరకు, 2011లో ఐక్యరాజ్యసమితి జనరల్ అసెంబ్లీ జూలై 30ని ‘అంతర్జాతీయ స్నేహితుల దినోత్సవం’గా అధికారికంగా ప్రకటించింది. ప్రజలు, దేశాలు, సంస్కృతులు, వ్యక్తుల మధ్య స్నేహం శాంతి ప్రయత్నాలకు స్ఫూర్తినిస్తుందని, సమాజాల మధ్య వారధులుగా నిలుస్తుందని పేర్కొంది. ఐక్యరాజ్యసమితి అధికారికంగా జూలై 30ని ప్రకటించినప్పటికీ, భారత్, అమెరికా సహా చాలా దేశాలు మాత్రం ఆగస్టు మొదటి ఆదివారాన్నే స్నేహానికి అంకితం చేస్తూ వస్తున్నాయి.

ఈ రోజును కేవలం ఒక తూతూమంత్రంగా కాకుండా, స్నేహ బంధాన్ని పటిష్టం చేసుకునే అవకాశంగా భావించాలి. బిజీ జీవితంలో తీరిక లేకుండా గడిపే మనం, ఈ ఒక్క రోజైనా స్నేహితులను గుర్తు చేసుకోవాలి. వారితో గడిపిన తీపి జ్ఞాపకాలను నెమరు వేసుకోవాలి.

ఎలా జరుపుకోవాలి? ఏం బహుమతులు ఇవ్వాలి?

స్నేహితుల దినోత్సవం రోజున స్నేహితులు ఒకరికొకరు ఫ్రెండ్‌షిప్ బ్యాండ్లు కట్టుకుంటారు. ఇది వారి బంధానికి ప్రతీకగా నిలుస్తుంది. కేవలం బ్యాండ్లు మాత్రమే కాదు, మీ స్నేహం ఎంత బలమైందో గుర్తుచేసేలా చిన్న బహుమతులు ఇచ్చిపుచ్చుకోవచ్చు.

వ్యక్తిగతమైన బహుమతులు: మీ స్నేహితుడికి/స్నేహితురాలికి ఇష్టమైన పుస్తకం, ఒక మంచి పెన్, వారికి నచ్చిన రంగులో దుస్తులు, లేదా వారి అభిరుచులకు తగిన ఏదైనా బహుమతి ఇవ్వొచ్చు. ఇది మీ బంధంలోని ప్రత్యేకతను తెలియజేస్తుంది.

జ్ఞాపకాలను నెమరువేసే బహుమతులు: మీరిద్దరూ కలిసి దిగిన పాత ఫొటోలతో ఒక కొలాజ్, లేదా చిన్న ఫొటో ఫ్రేమ్ ఇవ్వడం ద్వారా పాత జ్ఞాపకాలను మళ్లీ తలుచుకునేలా చేయొచ్చు.

అనుభవాలను పంచే బహుమతులు: కలిసి ఓ సినిమాకు వెళ్లడం, నచ్చిన రెస్టారెంట్‌లో భోజనం చేయడం, లేదా ఊహించని చిన్న ట్రిప్ ప్లాన్ చేయడం.. ఇవి చిరకాలం గుర్తుండిపోయే మధురానుభూతులను అందిస్తాయి.

చేతితో చేసినవి: మీ చేతులతో ఒక గ్రీటింగ్ కార్డ్ తయారు చేయడం, లేదా చిన్న ఆర్ట్ పీస్ ఇవ్వడం.. దీనిలో మీ ప్రేమ, శ్రద్ధ స్పష్టంగా కనిపిస్తాయి.

అన్నింటికంటే ముఖ్యంగా, స్నేహితులతో సమయం గడపడం, మనసు విప్పి మాట్లాడుకోవడం, పాత జోకులను గుర్తుచేసుకొని నవ్వుకోవడం ఈ రోజుకు నిజమైన బహుమతులు.

స్నేహంపై స్ఫూర్తిదాయక వాక్యాలు

స్నేహం గురించి ఎందరో మహానుభావులు ఎన్నో గొప్ప మాటలు చెప్పారు. అందులో కొన్ని మీ స్నేహితులకు పంపించడానికి..

• "స్నేహం అనేది ఎప్పటికీ ముగియని పుస్తకం. హ్యాపీ ఫ్రెండ్‌షిప్ డే డియర్’’
• "నువు నాలో ఓ కొత్త ప్రపంచాన్ని సృష్టించావు. హ్యాపీ ఫ్రెండ్‌షిప్ డే డియర్"
• "నిజమైన స్నేహం చీకటిలో వెలుగులా, కష్టాల్లో తోడుగా ఉంటుంది. హ్యాపీ ఫ్రెండ్‌షిప్ డే డియర్"
• "నిన్ను పక్కన పెట్టుకుని నడిస్తే, చీకటిలోనూ వెలుగు దొరుకుతుంది. హ్యాపీ ఫ్రెండ్‌షిప్ డే డియర్"
• “జీవితం ఇచ్చిన గొప్ప బహుమతుల్లో నువ్వూ ఒకటి. హ్యాపీ ఫ్రెండ్‌షిప్ డే డియర్. లవ్ యూ”

స్నేహ బంధం అనేది ఓ పచ్చటి తోటలాంటిది. దానికి నీళ్లు పోసి పెంచినట్లే, ఈ ఫ్రెండ్‌షిప్‌ డే రోజున మీ స్నేహితులతో బంధాన్ని మరింత బలోపేతం చేసుకోండి. వారికి మీ ప్రేమను, కృతజ్ఞతను తెలియజేయండి. మీ స్నేహ బంధం కలకాలం నిలిచి ఉండాలని మనసారా ఆశిస్తున్నాను. అందరికీ హ్యాపీ ఫ్రెండ్‌షిప్‌ డే.. నీకు కూడా నేస్తం.. లవ్ యూ.