Vietnam Boat Accident : వియత్నాంలో ఘోర ప్రమాదం - 15 మంది దుర్మరణం, మృతుల్లో తెలుగు పర్యాటకులు

Vietnam Boat Capsize : వియత్నాంలో విషాదం చోటు చేసుకుంది. ఫు క్వాక్ ద్వీపం సమీపంలో పర్యాటక పడవ మునిగిపోయిన ప్రమాదంలో భారతీయ పర్యాటకులతో సహా 15 మంది మరణించారు. పలువురు తెలుగు పర్యాటకులు ఉన్నట్లు సమాచారం.

Vietnam Boat Capsize : వియత్నాంలో శనివారం ఘోర ప్రమాదం చోటుచేసుకుంది. పర్యాటక ప్రాంతమైన ఫు క్వాక్ ద్వీపం సమీపంలో పర్యాటకులతో వెళ్తున్న ఒక స్పీడ్‌బోట్ సముద్రంలో మునిగిపోయింది. ఈ ప్రమాదంలో భారతీయ పర్యాటకులతో సహా కనీసం 15 మంది మరణించినట్లు స్థానిక వియత్నాం మీడియా వెల్లడించింది.

వియత్నాంలో విషాదం

స్థానిక న్యూస్ పోర్టల్ 'వీఎన్ ఎక్స్‌ప్రెస్ ఇంటర్నేషనల్' తెలిపిన వివరాల ప్రకారం.. ఈ ప్రమాద సమయంలో స్పీడ్‌బోట్‌లో 32 మంది భారతీయ పర్యాటకులు, నలుగురు సిబ్బంది ఉన్నారు. వీరంతా హాన్ మే రుట్ నుంచి అన్ థోయ్ పోర్టుకు ప్రయాణిస్తుండగా….. హాన్ మే రుట్ న్గోయ్ తీరానికి దాదాపు 400 మీటర్ల దూరంలో పడవ అదుపుతప్పి బోల్తా పడింది. ప్రమాదం జరిగిన వెంటనే పడవలో ఉన్న వారంతా ఒక్కసారిగా సముద్రంలో పడిపోయారు.

సమాచారం అందుకున్న వెంటనే ఫు క్వాక్ స్పెషల్ ఎకనామిక్ జోన్ అధికారులు, సరిహద్దు రక్షక దళాలు, నౌకాదళం, కోస్ట్ గార్డ్ సిబ్బంది రంగంలోకి దిగి గాలింపు చర్యలు చేపట్టారు. ప్రమాదం జరిగిన వెంటనే సమీపంలో ఉన్న ఇతర పర్యాటక పడవలు కూడా రంగంలోకి దిగి సహాయక చర్యలు ప్రారంభించాయి. ఈ ప్రమాదంలో మొత్తం 15 మంది ప్రాణాలు కోల్పోయారని స్థానిక అధికారులు ప్రాథమికంగా ధృవీకరించారు.

భారత రాయబార కార్యాలయం అలర్ట్…

ఈ ఘోర ప్రమాదంపై వియత్నాంలోని భారత రాయబార కార్యాలయం స్పందించింది. ఘటనా స్థలంలో సహాయక చర్యలు ఇంకా కొనసాగుతున్నాయని, బాధితులకు అవసరమైన సేవలు అందించేందుకు ప్రత్యేక కంట్రోల్ రూమ్‌లను ఏర్పాటు చేసినట్లు ఎంబసీ సోషల్ మీడియా వేదిక ఎక్స్‌ లో ప్రకటించింది. అయితే, మరణించిన వారి పూర్తి వివరాలను భారత రాయబార కార్యాలయం అధికారికంగా ఇంకా వెల్లడించాల్సి ఉంది.

హో చి మిన్ సిటీలోని భారత కాన్సులేట్ జనరల్ కార్యాలయం, హనోయిలోని భారత రాయబార కార్యాలయాల్లో ఈ కంట్రోల్ రూమ్‌లను అందుబాటులోకి తెచ్చారు. బాధితుల కుటుంబ సభ్యులు సమాచారం, సహాయం కోసం క్రింది ఫోన్ నంబర్లను సంప్రదించవచ్చని అధికారులు తెలిపారు.

కంట్రోల్ రూమ్ నంబర్లు:

• 84 36 281 7930
• 84 91 552 37 14
• 84 33 452 0414

బోటులో తెలుగు ప్రయాణికులు..!

ఓ మొబైల్‌ కంపెనీ భారత్‌ నుంచి తమ డిస్ట్రిబ్యూటర్లను కుటుంబాలను వియత్నాం ట్రిప్‌కు తీసుకెళ్లినట్లు తెలుస్తోంది. ఎంపిక చేసిన వారిలో ఏపీ, తెలంగాణ నుంచి కూడా పలువురు ఉన్నారు. ట్రిప్‌లో భాగంగా వీరు మూడు పడవల్లో సముద్రంలో విహార యాత్రకు వెళ్లారు. చనిపోయినవారిలో పలువురు తెలుగు వారు ఉన్నట్లు సమాచారం. ఇందుకు సంబంధించి మరిన్ని వివరాలు తెలియాల్సి ఉంది.