20 మంది పిల్లలు చనిపోయాక.. దగ్గు సిరప్ నాణ్యత వైఫల్యాలపై DCGI కఠిన ఆదేశాలు

మధ్యప్రదేశ్‌లో 'కోల్డ్‌రిఫ్' దగ్గు సిరప్‌ తాగి 20 మంది పిల్లలు మరణించిన నేపథ్యంలో, డ్రగ్స్ కంట్రోలర్ జనరల్ ఆఫ్ ఇండియా (DCGI) దేశవ్యాప్తంగా అప్రమత్తమైంది. ముడి పదార్థాలు (Raw Materials), తుది ఉత్పత్తులను తప్పనిసరిగా పరీక్షించాలంటూ అన్ని రాష్ట్రాలు, కేంద్రపాలిత ప్రాంతాలకు DCGI ఆదేశాలు జారీ చేసింది.

మధ్యప్రదేశ్‌లో జరిగిన విషాదకర సంఘటన దేశవ్యాప్తంగా కలకలం రేపింది. కోల్డ్‌రిఫ్ (Coldrif) దగ్గు సిరప్ కారణంగా దాదాపు 20 మంది చిన్నారులు మృతి చెందినట్లు వార్తలు వచ్చాయి. దీనిపై డ్రగ్స్ కంట్రోలర్ జనరల్ ఆఫ్ ఇండియా (DCGI) కఠినంగా స్పందించింది.

20 మంది పిల్లలు చనిపోయాక.. దగ్గు సిరప్ నాణ్యత వైఫల్యాలపై DCGI కఠిన ఆదేశాలు (PTI file photo)

ఈ నేపథ్యంలో, డ్రగ్స్ తయారీలో వినియోగించే ముడి పదార్థాలు, తుది ఔషధాల నాణ్యత పరీక్షలపై 1945 నాటి డ్రగ్స్ రూల్స్‌ను ఖచ్చితంగా పాటించాలంటూ దేశంలోని అన్ని రాష్ట్రాలు, కేంద్రపాలిత ప్రాంతాలకు DCGI ఒక ప్రత్యేక ఆదేశాన్ని జారీ చేసింది.

ముడి పదార్థాల పరీక్ష తప్పనిసరి

డ్రగ్స్ కంట్రోలర్ జనరల్ ఆఫ్ ఇండియా డాక్టర్ రాజీవ్ సింగ్ రఘువంశీ, అక్టోబర్ 7న జారీ చేసిన లేఖలో ఒక విషయాన్ని స్పష్టం చేశారు. "ఔషధాల తయారీలో ఉపయోగించే ఎక్సిపియెంట్స్‌తో (Excipients) సహా కొత్త పదార్థాలను పరీక్షించడం అనేది అత్యంత కీలకం" అని ఆయన నొక్కి చెప్పారు.

మధ్యప్రదేశ్‌లోని ఛింద్వారాలో కలుషితమైన దగ్గు సిరప్‌ల కారణంగా చిన్నారుల మరణాలు సంభవించాయన్న వార్తల నేపథ్యంలోనే ఈ ఆదేశాలు జారీ అయ్యాయి. ఈ సిరప్‌ల నాణ్యతపై తీవ్ర ఆందోళనలు వ్యక్తమయ్యాయి.

తయారీ కేంద్రాలలో జరిపిన తనిఖీలు, అలాగే ‘నాట్ ఆఫ్ స్టాండర్డ్ క్వాలిటీ (Not of Standard Quality)’గా ప్రకటించిన మందులపై చేసిన విచారణలలో కొన్ని లోపాలు కనిపించాయి. ముఖ్యంగా, కొంతమంది తయారీదారులు ముడి పదార్థాలు, ఇనాక్టివ్ పదార్థాలను ఉత్పత్తికి ముందు సరిగా పరీక్షించడం లేదని ఆ నివేదికలలో తేలింది.

"తయారీదారులు ఫార్ములేషన్లలో ఉపయోగించే ముందు, అలాగే తుది ఉత్పత్తులలో కూడా ఎక్సిపియెంట్స్‌, ఇనాక్టివ్, యాక్టివ్ ఫార్మాస్యూటికల్ పదార్థాల ప్రతి బ్యాచ్‌ను, నిర్దేశించిన ప్రమాణాలకు అనుగుణంగా ఉన్నాయో లేదో తనిఖీ చేయడం లేదు" అని DCGI తన లేఖలో పేర్కొంది.

DCGI ఆదేశాలు ఏంటి?

ఈ వ్యవస్థాపరమైన లోపాన్ని సరిచేయడానికి DCGI కింది ఆదేశాలను జారీ చేసింది.

తప్పనిసరి పరీక్షలు: ప్రతి లైసెన్సీదారుడు ఔషధ తయారీలో ఉపయోగించే ముడి పదార్థాలను తప్పనిసరిగా వారి సొంత ప్రయోగశాలలో లేదా ఆమోదం పొందిన ప్రయోగశాలలలో పరీక్షించాలి.

రికార్డుల నిర్వహణ: ఈ పరీక్షలకు సంబంధించిన సమగ్ర రికార్డులను షెడ్యూల్ U ప్రకారం నిర్వహించాలి.

పర్యవేక్షణ: అన్ని రాష్ట్రాలు, కేంద్రపాలిత ప్రాంతాల డ్రగ్ కంట్రోలర్‌లు తనిఖీల సమయంలో ఈ నిబంధనలు ఖచ్చితంగా అమలయ్యేలా పర్యవేక్షించాలి. అలాగే, సర్క్యులర్‌ల ద్వారా తయారీదారులకు అవగాహన కల్పించాలి.

విక్రేత అర్హత (Vendor Qualification): తయారీదారులు ఒక పటిష్టమైన విక్రేత అర్హత వ్యవస్థను కలిగి ఉండాలి. విశ్వసనీయమైన, ఆమోదం పొందిన విక్రేతల నుంచి మాత్రమే ముడి పదార్థాలను (ఎక్సిపియెంట్స్‌తో సహా) కొనుగోలు చేయాలి.

తయారీ కంపెనీ యజమాని అరెస్ట్

మరోవైపు, ఈ సంఘటనకు సంబంధించి చర్యలు వేగవంతమయ్యాయి. 20 మంది చిన్నారుల మరణాలకు కారణమైన కోల్డ్‌రిఫ్ దగ్గు సిరప్‌ను తయారు చేసిన తమిళనాడుకు చెందిన ఫార్మాస్యూటికల్స్ కంపెనీ యజమాని ఎస్. రంగనాథన్‌ను మధ్యప్రదేశ్ పోలీసులు అరెస్ట్ చేశారు.

ఛింద్వారా ఎస్పీ తెలిపిన వివరాల ప్రకారం, రంగనాథన్‌ను ఈరోజు చెన్నై కోర్టులో హాజరుపరిచి, ట్రాన్సిట్ రిమాండ్ పొందిన తర్వాత ఛింద్వారాకు తరలించనున్నారు.

మధ్యప్రదేశ్ ఉప ముఖ్యమంత్రి, ఆరోగ్య మంత్రి రాజేంద్ర శుక్లా బుధవారం మాట్లాడుతూ, కోల్డ్‌రిఫ్ దగ్గు సిరప్ సేవించిన తర్వాత మొత్తం 20 మంది చిన్నారులు మరణించారని, మరో ఐదుగురికి చికిత్స అందిస్తున్నారని తెలిపారు. మరణించిన 20 మంది చిన్నారుల్లో 17 మంది ఛింద్వారా జిల్లాకు, ఇద్దరు బేతుల్ జిల్లాకు, ఒకరు పాంఢుర్ణా జిల్లాకు చెందినవారు ఉన్నారు.d