Ind vs Afg: టెస్ట్ క్రికెట్ చరిత్రలో టీమిండియా బిగ్గెస్ట్ విన్ రికార్డ్.. అరంగేట్రంతోనే అదరగొట్టిన మానవ్ సుతార్

Ind vs Afg: టెస్ట్ క్రికెట్ చరిత్రలోనే టీమిండియా అతిపెద్ద విజయం సాధించింది. ఆఫ్ఘనిస్థాన్ తో జరిగిన ఏకైక టెస్టు మ్యాచ్ లో ఆ టీమ్ ను చిత్తు చిత్తుగా ఓడించింది. తొలి మ్యాచ్ లోనే స్పిన్నర్ మానవ్ సుతార్ రికార్డు క్రియేట్ చేశాడు.

Ind vs Afg: చండీగఢ్ కొత్త స్టేడియం వేదికగా జరిగిన ఏకైక టెస్ట్ మ్యాచ్‌లో (India vs Afghanistan Test match) టీమిండియా సరికొత్త హిస్టరీ క్రియేట్ చేసింది. ఆఫ్ఘనిస్తాన్‌ను ఏకంగా ఇన్నింగ్స్ 300 పరుగుల భారీ తేడాతో చిత్తు చేసి, టెస్ట్ క్రికెట్ చరిత్రలోనే తన అతిపెద్ద విజయాన్ని సొంతం చేసుకుంది.

Ind vs Afg: టెస్ట్ క్రికెట్ చరిత్రలో టీమిండియా బిగ్గెస్ట్ విన్ రికార్డ్.. అరంగేట్రంతోనే అదరగొట్టిన మానవ్ సుతార్

కేవలం మూడే రోజుల్లో ముగిసిన ఈ మ్యాచ్‌లో ఇండియన్ బౌలర్లు, బ్యాటర్లు వన్ సైడ్ షో చూపించారు. అరంగేట్రం చేసిన యంగ్ స్పిన్నర్ మానవ్ సుతార్ (Manav Suthar) ఆరు వికెట్లతో చెలరేగితే, సెకండ్ ఇన్నింగ్స్‌లో వాషింగ్టన్ సుందర్, కుల్దీప్ యాదవ్ తమ స్పిన్ మాయతో అఫ్గాన్ బ్యాటర్లకు చుక్కలు చూపించారు.

ఆఫ్ఘనిస్తాన్‌ బ్యాటింగ్ ఎందుకు ఫెయిల్ అయింది?

తొలి ఇన్నింగ్స్‌లో కెప్టెన్ శుభ్‌మన్ గిల్, కేఎల్ రాహుల్ సెంచరీలతో కదం తొక్కడంతో టీమిండియా 564/8 స్కోరు వద్ద భారీ స్థాయిలొ డిక్లేర్ చేసింది. ఆ తర్వాత బ్యాటింగ్‌కు దిగిన ఆఫ్ఘనిస్తాన్‌.. ఇండియన్ స్పిన్ ట్రాక్స్‌ను ఎదుర్కోవడంలో పూర్తిగా తేలిపోయింది. రెడ్-బాల్ క్రికెట్‌లో వారికి ఉన్న తక్కువ అనుభవం, ముఖ్యంగా టర్నింగ్ పిచ్‌లపై స్పిన్‌ను ఎలా ఆడాలో తెలియకపోవడం వల్లే వాళ్ల లైనప్ కుప్పకూలింది. రెండో రోజు ముగిసేసరికే 113 పరుగులకే 5 వికెట్లు కోల్పోయి కష్టాల్లో పడ్డారు.

మూడో రోజు ఎంట్రీ ఇచ్చిన యంగ్ స్పిన్నర్ మానవ్ సుతార్ ఆఫ్ఘనిస్తాన్‌ టీమ్‌ను కోలుకోలేని దెబ్బ తీశాడు. రహ్మత్ షా (60) కాస్త పోరాడినా మిగతా వాళ్ల నుంచి ఎలాంటి సపోర్ట్ దొరకలేదు. సుతార్ ఒకే ఓవర్లో రెండు వికెట్లు తీసి తన డెబ్యూ మ్యాచ్‌లోనే 5 వికెట్ల మార్క్ అందుకున్నాడు. కేవలం 33 రన్స్ ఇచ్చి 6 వికెట్లు పడగొట్టాడు. 1988లో నరేంద్ర హిర్వాణీ వెస్టిండీస్‌పై క్రియేట్ చేసిన రికార్డ్ తర్వాత, ఒక డెబ్యూ బౌలర్ ఈ రేంజ్ పెర్ఫార్మెన్స్ ఇవ్వడం మళ్లీ ఇప్పుడే చూస్తున్నాం. దీంతో ఆఫ్ఘన్ ఫస్ట్ ఇన్నింగ్స్ 152 రన్స్‌కే ప్యాకప్ అయింది.

ఫాలో ఆన్‌లోనూ స్పిన్ మాయే!

ఫాలో ఆన్ ఆడుతూ సెకండ్ ఇన్నింగ్స్ స్టార్ట్ చేసిన ఆఫ్ఘనిస్తాన్‌ ను పిచ్ మరింత భయపెట్టింది. ఈసారి వాషింగ్టన్ సుందర్, కుల్దీప్ యాదవ్ వాళ్లను ముప్పతిప్పలు పెట్టారు. ఒక దశలో ఓపెనర్ సెదికుల్లా అటల్ (42), రహ్మానుల్లా గుర్బాజ్ (24) కొంచెం నిలకడగా ఆడి స్కోరు బోర్డును 74/1 వద్ద ఉంచారు.

కానీ ఆ తర్వాత ఇండియన్ బౌలర్లు రెచ్చిపోవడంతో కేవలం 38 రన్స్ గ్యాప్‌లోనే మిగిలిన 9 వికెట్లు పడిపోయాయి. మొత్తంగా 112 పరుగులకే ఆఫ్ఘనిస్తాన్‌ ఆలౌట్ అయింది. మ్యాచ్ మొత్తంలో 7 వికెట్లు తీసి రికార్డ్ సెట్ చేసిన మానవ్ సుతార్‌కు 'మ్యాన్ ఆఫ్ ది మ్యాచ్' అవార్డు దక్కింది.

ఆ లెంగ్త్ మార్చుకోవడమే వర్కౌట్ అయింది: వాషింగ్టన్ సుందర్

మ్యాచ్ తర్వాత వాషింగ్టన్ సుందర్ మాట్లాడుతూ.. "చాలా రోజుల తర్వాత టెస్ట్ ఫార్మాట్ ఆడటం హ్యాపీగా ఉంది. ఫస్ట్ బాల్ నుంచే నాకు మంచి రిథమ్ దొరికింది. పిచ్ బౌలర్లకు బాగా సపోర్ట్ చేసింది. అయితే కొంచెం షార్ట్ లెంగ్త్ బాల్స్ వేస్తే బ్యాటర్లకు ఆడేందుకు టైమ్ దొరుకుతుంది కదా, అందుకే వెంటనే ఆ లెంగ్త్ సరిచేసుకుని బౌలింగ్ చేశాను. అదే మాకు వర్కౌట్ అయింది" అని చెప్పుకొచ్చాడు.

ఈ చారిత్రాత్మక విజయం తర్వాత టీమిండియా తదుపరి వన్డే సిరీస్‌కు రెడీ అవుతోంది. జూన్ 13 నుంచి ధర్మశాల వేదికగా ఇండియా, అఫ్గానిస్తాన్ మధ్య మూడు మ్యాచ్‌ల వన్డే సిరీస్ స్టార్ట్ కానుంది.