PM kisan 21th installment : ఈ రైతులకు.. పీఎం కిసాన్​ 21వ విడత నిధులు అందకపోవచ్చు!

పీఎం కిసాన్​ 21వ విడత నిధుల విడుదలపై రైతుల్లో ఆసక్తి నెలకొంది. దీనిపై కేంద్రం ఇంకా క్లారిటీ ఇవ్వనప్పటికీ, దీపావళి నాటికి డబ్బులు రైతుల అకౌంట్​లో జమ అవుతాయని తెలుస్తోంది. అయితే, అందరి రైతులకు ఈ డబ్బులు అందకపోవచ్చు! కారణం ఏంటంటే..

రైతులకు ఆర్థిక సహాయం అందించే లక్ష్యంతో కేంద్రం పీఎం కిసాన్ సమ్మాన్ నిధి పథకాన్ని ప్రారంభించిన విషయం తెలిసిందే. ఈ పథకం ద్వారా కేంద్ర ప్రభుత్వం రైతులకు ఏటా రూ. 6,000 చొప్పున మూడు వాయిదాల్లో నేరుగా వారి బ్యాంక్ ఖాతాల్లో జమ చేస్తుంది. సాధారణంగా, ఈ వాయిదాలను ప్రతి నాలుగు నెలలకు ఒకసారి విడుదల చేస్తారు. 20వ విడత సొమ్ము ఆగస్టు 2025లో విడుదలైంది. ఈ నేపథ్యంలోనే పీఎం కిసాన్​ 21వ విడత నిధుల విడుదల తేదీపై సర్వత్రా ఆసక్తి పెరిగింది.

రైతుల ఖాతాల్లోకి పీఎం కిసాన్ డబ్బులు ఎప్పుడు?

పీఎం కిసాన్​ 21వ విడత విడుదల ఎప్పుడు?

దేశవ్యాప్తంగా రైతులంతా పీఎం కిసాన్ యోజన 21వ విడత కోసం ఆసక్తిగా ఎదురుచూస్తున్నారు. జమ్ముకశ్మీర్, మరో మూడు రాష్ట్రాల రైతులకు మాత్రం ఈ ఎదురుచూపులు ముగిశాయి. అక్టోబర్ 7న వారికి 21వ విడత సొమ్మును ప్రభుత్వం ముందుగానే జమ చేసింది. భారీ వర్షాలు, వరదలు, కొండచరియలు విరిగిపడడం వంటి సహజ విపత్తుల కారణంగా నష్టపోయిన రైతులను ఆదుకునేందుకు, వారికి సహాయం అందించే ఉద్దేశంతో పీఎం కిసాన్​ 21వ విడత నిధులను ముందుగా విడుదల చేశారు. ఈ ప్రకృతి విపత్తుల వల్ల ప్రభావితమైన 8.5 లక్షల మందికి పైగా రైతులకు రూ. 170 కోట్లకు పైగా మొత్తం నేరుగా వారి బ్యాంక్ ఖాతాల్లో జమ అయింది.

2023లో ఈ విడత నవంబర్ 15న విడుదలైంది. అలాగే 2024లో 18వ విడత అక్టోబర్ 5న విడుదలైంది. గత ఏడాది షెడ్యూల్‌ను పరిగణనలోకి తీసుకుంటే, 21వ విడత ఇప్పటికే విడుదల కావాలి. అయినప్పటికీ అనేక రాష్ట్రాలకు ఇంకా నిధులు విడుదలవ్వలేదు.

ప్రభుత్వం అధికారికంగా తేదీని ప్రకటించనప్పటికీ, పలు మీడియా నివేదికలు మాత్రం దీపావళి 2025 పండుగకు ముందే రైతుల ఖాతాల్లో రూ. 2,000 జమ కానున్నట్లు సూచిస్తున్నాయి. అంటే పీఎం కిసాన్ పథకం 21వ విడత అక్టోబర్ 2025 రాబోయే వారాల్లో విడుదలయ్యే అవకాశం ఉంది. దీన్ని రైతులకు దీపావళి కానుకగా చెప్పవచ్చు.

వీరికి పీఎం కిసాన్​ 21వ విడత డబ్బులు అందవు!

కొంతమంది రైతులు ఈ 21వ విడత నిధులు అందుకోలేకపోవచ్చు! ఎవరైతే ఈ-కేవైసీ పూర్తి చేయలేదో, లేదా వారి ఆధార్ నంబర్ బ్యాంక్ ఖాతాకు లింక్ చేయలేదో, లేదా వారి ఐఎఫ్ఎస్‌సి కోడ్ తప్పుగా ఉందో, బ్యాంక్ ఖాతా మూసివేయడం జరిగిందో, లేదా వ్యక్తిగత వివరాలు సరిపోలడం లేదో.. అలాంటి వారికి ఈ విడత సొమ్ము నిలిచిపోయే అవకాశం ఉంది. ఈ సమస్యల కారణంగా డబ్బు బదిలీ ఆగిపోవచ్చు. మొత్తంగా, ఈ-కేవైసీ పూర్తి చేసి, సరైన పత్రాలు సమర్పించి, ఆధార్‌ను తమ బ్యాంక్ ఖాతాకు లింక్ చేసిన రైతులకు దీపావళి కానుక లభించే అవకాశం ఉంది.

మీ పేరు లిస్ట్ నుంచి తీసేశారా? ఎలా తనిఖీ చేయాలి?

పీఎం-కిసాన్ పథకం లబ్ధిదారుల జాబితాలో మీ పేరు ఉందో లేదో తెలుసుకోవడం చాలా సులభం:

• ముందుగా, అధికారిక వెబ్‌సైట్ pmkisan.gov.in ను సందర్శించండి.
• 'ఫార్మర్ కార్నర్' (Farmer Corner) విభాగంలోకి వెళ్లి, 'బెనిఫిషియరీ లిస్ట్' (Beneficiary List) పై క్లిక్ చేయండి.
• మీ రాష్ట్రం, జిల్లా, బ్లాక్, గ్రామాన్ని ఎంచుకోండి.
• 'గెట్ రిపోర్ట్' (Get Report) పై క్లిక్ చేసి, ఆ జాబితాలో మీ పేరు ఉందో లేదో తనిఖీ చేసుకోండి.
• మీ ఖాతాలో డబ్బు జమ అవుతుందో లేదో తెలుసుకోండి

ఈసారి మీ ఖాతాలో డబ్బు జమ అవుతుందో లేదో తెలుసుకోవడానికి, ముందుగా లబ్ధిదారుల జాబితాను తనిఖీ చేయండి. ఆ ప్రక్రియ చాలా తేలిక:

• pmkisan.gov.in వెబ్‌సైట్‌ను తెరవండి.
• 'బెనిఫిషియరీ స్టేటస్' (Beneficiary Status) ఆప్షన్‌ను ఎంచుకోండి.
• ఆధార్ నంబర్ లేదా బ్యాంక్ ఖాతా నంబర్‌ను నమోదు చేసి 'గెట్ డేటా' (Get Data) పై క్లిక్ చేయండి.
• మీ వివరాలలో 'ఎలిజిబిలిటీ స్టేటస్' వద్ద 'యెస్' (Yes) అని ఉంటే, మీకు డబ్బు వస్తుంది. లేదంటే, మీ పేరు జాబితాలో లేదని అర్థం. ఆ విడత మీకు జమ కాదు.