Personal Loan: పర్సనల్​ లోన్​ చుట్టూ అనేక అపోహలు- ఈ విషయాలు కచ్చితంగా తెలుసుకోండి..

Personal Loan : పర్సనల్​ లోన్​ చుట్టూ అనేక అపోహలు నెలకొన్నాయి. ఫలితంగా అత్యవసర పరిస్థితుల్లో కూడా లోన్​ తీసుకునేందుకు చాలా మంది భయపడుతుంటారు. అందుకే పర్సనల్​ లోన్​ విషయంలో ఈ విషయాలు కచ్చితంగా తెలుసుకోండి..

అనుకోని ఆర్థిక అవసరాలను తీర్చుకోవడానికి పర్సనల్ లోన్స్ ఒక మంచి మార్గం. ఎటువంటి హామీ (సెక్యూరిటీ) లేకుండానే ఈ రుణాలు లభిస్తాయి. సరైన అర్హతలు ఉంటే.. సులభమైన దరఖాస్తు ప్రక్రియ, ఆకర్షణీయమైన వడ్డీ రేట్లు, వేగంగా డబ్బు పొందడం వంటి సౌకర్యాలు ఈ రుణాల ద్వారా లభిస్తాయి. అయితే, ఇన్ని ప్రయోజనాలు ఉన్నప్పటికీ, వ్యక్తిగత రుణాల గురించి కొన్ని అపోహలు ప్రజల్లో అనవసరమైన భయాన్ని కలిగిస్తున్నాయి. అటువంటి ముఖ్యమైన ఐదు అపోహలు, వాటి వెనుక ఉన్న వాస్తవాలను ఇప్పుడు తెలుసుకుందాం.

పర్సనల్​ లోన్​ చుట్టూ అనేక అపోహలు- ఈ విషయాలు కచ్చితంగా తెలుసుకోండి

పర్సనల్​ లోన్​ గురించి ఈ విషయాలు తెలుసుకోండి..

1. అపోహ: పర్సనల్​ లోన్​ కోసం ఆస్తులను తాకట్టు పెట్టాలి.

వాస్తవం: వ్యక్తిగత రుణాలు అనేవి అన్‌సెక్యూర్డ్ లోన్స్. అంటే, రుణం పొందడానికి ఎలాంటి ఆస్తిని తాకట్టు పెట్టాల్సిన అవసరం లేదు. దీనివల్ల రుణం తీసుకోవడం చాలా సులభం అవుతుంది.

2. అపోహ: రుణ మంజూరు ప్రక్రియ చాలా సంక్లిష్టంగా, ఆలస్యంగా ఉంటుంది.

వాస్తవం: ఇది నిజం కాదు. చాలా బ్యాంకులు, ఆర్థిక సంస్థలు ఆన్‌లైన్‌లోనే రుణం కోసం దరఖాస్తు చేసుకునే అవకాశాన్ని కల్పిస్తున్నాయి. అర్హత ఉంటే.. నిమిషాల్లోనే దరఖాస్తు ప్రక్రియ పూర్తవుతుంది. సరైన డాక్యుమెంట్లు ఉంటే, రుణం కూడా వేగంగా మంజూరవుతుంది.

3. అపోహ: పర్సనల్​ లోన్​ వడ్డీ రేట్లు చాలా ఎక్కువగా ఉంటాయి.

వాస్తవం: సెక్యూర్డ్ రుణాలతో పోలిస్తే పర్సనల్​ లోన్​ వడ్డీ రేట్లు కాస్త ఎక్కువగానే ఉంటాయి. ఎందుకంటే వీటిలో బ్యాంక్‌కు ఎటువంటి హామీ ఉండదు. కానీ క్రెడిట్ కార్డుల వడ్డీ రేట్లతో పోలిస్తే ఈ వ్యక్తిగత రుణాల వడ్డీ రేట్లు తక్కువగానే ఉంటాయి. చాలా సంస్థలు తక్కువ వడ్డీకే వ్యక్తిగత రుణాలు ఇస్తున్నాయి.

4. అపోహ: రుణం మంజూరు కావాలంటే క్రెడిట్ స్కోర్ ఎక్కువగా ఉండాలి.

వాస్తవం: క్రెడిట్ స్కోర్ ఎక్కువగా ఉంటే రుణం మంజూరయ్యే అవకాశాలు మెరుగవుతాయి. సాధారణంగా, 750 పైన ఉన్న క్రెడిట్ స్కోర్‌ను మంచిదిగా పరిగణిస్తారు. అయితే కేవలం క్రెడిట్ స్కోర్ మాత్రమే కాకుండా, రుణదాతలు మీ ఆదాయం, ఉద్యోగ చరిత్ర, ఆదాయం-అప్పుల నిష్పత్తి వంటి ఇతర అంశాలను కూడా పరిగణనలోకి తీసుకుంటారు. అందుకే క్రెడిట్ స్కోర్ తక్కువగా ఉన్నా, ఇతర అంశాలు మెరుగ్గా ఉంటే రుణం లభించే అవకాశం ఉంటుంది.

5. అపోహ: ఇప్పటికే ఒక లోన్ ఉంటే ఇంకో పర్సనల్ లోన్ రాదు.

వాస్తవం: మీ పేరు మీద ఇప్పటికే రుణాలు ఉంటే, రుణదాతలు వాటిని చాలా జాగ్రత్తగా పరిశీలిస్తారు. మీరు సకాలంలో ఈఎంఐలు చెల్లిస్తున్నారా లేదా అని చూస్తారు. ఒకవేళ మీ పాత రుణాలు లేదా హోమ్ లోన్ ఈఎంఐలు క్రమం తప్పకుండా చెల్లిస్తూ ఉంటే, అది మీ క్రెడిట్ హిస్టరీని మెరుగుపరుస్తుంది. దీనివల్ల మీకు కొత్త వ్యక్తిగత రుణం లేదా క్రెడిట్ కార్డు లభించే అవకాశాలు మరింత పెరుగుతాయి.

పర్సనల్​ లోన్​లు ఆర్థిక అత్యవసర పరిస్థితులకు చాలా ఉపయోగపడతాయి. అయితే, అధిక వడ్డీ రేట్లు, హిడెన్​ ఛార్జీలు, క్రెడిట్ స్కోర్‌పై ప్రభావం, ప్రాసెసింగ్ ఖర్చుల వంటి నష్టాలు కూడా ఉన్నాయి. అందుకే, ఏ రుణం తీసుకునేటప్పుడు తొందరపడకూడదు. వివిధ రుణ ఉత్పత్తులను జాగ్రత్తగా పోల్చి చూసుకోవాలి. మీ రుణాన్ని తిరిగి చెల్లించే సామర్థ్యాన్ని అంచనా వేసుకోవాలి. ఆర్థిక సలహాదారులను సంప్రదించి, సరైన నిర్ణయం తీసుకోవడం ముఖ్యం. దీనివల్ల అనవసరమైన అప్పుల ఊబిలో పడకుండా జాగ్రత్త పడవచ్చు.

(గమనిక- లోన్​ తీసుకోవడం రిస్కీ అని గుర్తుపెట్టుకోండి)