Supplements for woman : మహిళల సంపూర్ణ ఆరోగ్యం కోసం.. ఈ 6 సప్లిమెంట్లు!

ఆరోగ్యంగా ఉండటానికి విటమిన్ మాత్రలు, రకరకాల సప్లిమెంట్లు వాడటం ఒక తక్షణ పరిష్కారమని మీరు భావిస్తున్నారా? అయితే మీరు పొరపాటే చేస్తున్నారు. నేటి డిజిటల్ యుగంలో సోషల్ మీడియాలో ఏ కొత్త హెల్త్ ట్రెండ్ వచ్చినా, ఏ ఇన్‌ఫ్లుయెన్సర్ ఏ ప్రాడక్ట్‌ను ప్రమోట్ చేసినా.. అసలు మన శరీరానికి అది అవసరమా లేదా అని ఆలోచించకుండా బ్లైండ్‌గా ఫాలో అయిపోయే వారి సంఖ్య రోజురోజుకూ పెరుగుతోంది. కానీ, ఇలాంటి అలవాట్లు ఆరోగ్యానికి మేలు చేయడం కంటే ఎక్కువ కీడు చేస్తాయని వైద్య నిపుణులు గట్టిగా హెచ్చరిస్తున్నారు. ప్రతి ఒక్కరి శరీరం విభిన్నమైనది. కాబట్టి వ్యక్తిగత అవసరాలకు తగినట్లుగా, డాక్టర్ల పర్యవేక్షణలోనే సరైన సప్లిమెంట్లను ఎంచుకోవడం చాలా ముఖ్యం.

మహిళలు అసలు ఎలాంటి సప్లిమెంట్లు తీసుకోవాలి? ఏవి తీసుకోకూడదు? అనే విషయాలపై ప్రముఖ న్యూట్రిషనిస్ట్ డాక్టర్ విశాఖ శివదాసాని కొన్ని కీలకమైన వాస్తవాలను, మార్గదర్శకాలను పంచుకున్నారు. సోషల్ మీడియా ట్రెండ్స్ అనేవి చాలా వరకు తప్పుదోవ పట్టించేలా ఉంటాయని ఆమె పేర్కొన్నారు. ఏదైనా సప్లిమెంట్ వాడటానికి ముందు మీ రక్త పరీక్షలు చేయించుకుని, శరీరంలో ఉన్న లక్షణాలను బట్టి ఒక నిర్ణయానికి రావాలన్నారు. ఎలాంటి ఫ్యాన్సీ ట్రెండ్స్‌తో సంబంధం లేకుండా, మహిళల శరీరానికి నిజంగా అవసరమయ్యే ఆరు ముఖ్యమైన సప్లిమెంట్ల జాబితాను డాక్టర్ విశాఖ శివదాసాని వివరించారు. అవి..

విటమిన్ D3: ఇది ఎముకలను బలంగా ఉంచడమే కాకుండా, శరీర రోగనిరోధక శక్తిని పెంచుతుంది. హార్మోన్లను క్రమబద్ధీకరించడంలో, మానసిక స్థితిని మెరుగుపరచడంలో ఇది కీలక పాత్ర పోషిస్తుంది.

మెగ్నీషియం: రాత్రి పూట మంచి నిద్ర పట్టడానికి, ఒత్తిడి తగ్గడానికి ఇది సహాయపడుతుంది. అలాగే పీరియడ్స్ ముందు వచ్చే సమస్యలు, ఇన్సులిన్ సెన్సిటివిటీని నియంత్రించడంలో తోడ్పడుతుంది. అయితే మీ అవసరానికి తగిన సరైన మెగ్నీషియం రకాన్ని ఎంచుకోవడం ముఖ్యం.

ఒమేగా-3 (EPA + DHA): ట్రైగ్లిజరైడ్ రూపంలో ఉండే ఒమేగా-3 సప్లిమెంట్లు హార్మోన్ల సమతుల్యతను కాపాడతాయి. శరీరంలో వాపులను తగ్గించి, మెదడు, చర్మ ఆరోగ్యాన్ని మెరుగుపరుస్తాయి.

విటమిన్ B12 (మిథైల్‌కోబాలమిన్): ఇది శరీరానికి కావలసిన శక్తిని అందిస్తుంది, నరాల ఆరోగ్యాన్ని కాపాడుతుంది, జీవక్రియను మెరుగుపరుస్తుంది. ముఖ్యంగా శాఖాహారులు ఈ సప్లిమెంట్‌ను ఖచ్చితంగా తీసుకోవాలి.

ఐరన్: శరీరంలో ఐరన్ లోపం (రక్తహీనత) ఉందని నిర్ధారణ అయినప్పుడు మాత్రమే దీనిని వాడాలి. ఇది జుట్టు రాలడాన్ని తగ్గించి, శక్తిని పెంచుతుంది. మంచి నిద్రకు తోడ్పడటమే కాకుండా మైగ్రేన్ తలనొప్పిని తగ్గిస్తుంది.

జింక్: తక్కువ మోతాదులో, కొద్దిరోజుల పాటు మాత్రమే దీనిని వాడాలి. ఇది థైరాయిడ్ పనితీరును మెరుగుపరుస్తుంది, మొటిమలను తగ్గిస్తుంది, రోగనిరోధక శక్తిని, సంతానోత్పత్తి సామర్థ్యాన్ని పెంచడంతో పాటు గట్​ హెల్త్​ని కాపాడుతుంది.

అయితే, సప్లిమెంట్లు ఎప్పుడూ కూడా మనం తినే పౌష్టికాహారానికి అదనపు మద్దతుగా మాత్రమే పనిచేయాలి కానీ, ఆరోగ్యకరమైన ఆహారానికి అవి ప్రత్యామ్నాయం కావు. సరైన వైద్య పరీక్షలు చేయించుకుని, మీ శరీరానికి సరిపోయే చికిత్సను మాత్రమే ఎంచుకోవాలి. సప్లిమెంట్లను తప్పుగా ఉపయోగించడం వల్ల అంతర్గత అవయవాలు దెబ్బతినే ప్రమాదం ఉంది. కాబట్టి ఏదైనా కొత్త సప్లిమెంట్ ప్రారంభించే ముందు లేదా ఆపే ముందు తప్పనిసరిగా మీ ఫ్యామిలీ డాక్టర్‌ను సంప్రదించాలి. ఈ సమాచారం కేవలం మీ అవగాహన కోసం మాత్రమే, దీనిని వ్యక్తిగత వైద్య సలహాగా భావించకూడదు.