ఏపీ డీఎస్సీ కోసం చూస్తున్నారా...? ఈసారి మార్పులు ఉండే ఛాన్స్..! తెరపైకి ఆ 2 పరీక్షలు....?

ఏపీలో ప్రతి ఏడాది డీఎస్సీ నోటిఫికేషన్ ఇస్తామని ప్రభుత్వం చెప్పిన సంగతి తెలిసిందే. ఇప్పటికే వచ్చే ఏడాది జనవరిలో నోటిఫికేషన్ ఇస్తామని కూడా ప్రకటన చేసింది. ఇందుకోసం విద్యాశాఖ ఇప్పటికే కసరత్తు షురూ చేసింది.

నవంబర్ నెలలో టెట్ నోటిఫికేషన్ విడుదల చేయనుంది. ఈ పరీక్ష పూర్తి కాగానే జనవరి 2026లో డీఎస్సీ కొత్త నోటిఫికేషన్ ఇచ్చి... మార్చిలో పరీక్షలు నిర్వహించనున్నారు.

డీఎస్సీ నోటిఫికేషన్ ఇవనున్న నేపథ్యంలో పరీక్షల నిర్వహణలో కొన్ని మార్పులు తీసుకువచ్చే విషయాన్ని ఏపీ విద్యాశాఖ పరిశీలిస్తోంది. ఇంగ్లీష్ ఫ్రొఫిషియెన్సీ టెస్టుతో పాటు కంప్యూటర్ నాలెడ్జ్ టెస్టులు కూడా నిర్వహించాలని యోచిస్తోంది.

కొద్ది సంవత్సరాలుగా విద్యా వ్యవస్థలో అనేక మార్పులు చోటు చేసుకుంటున్నాయి. ముఖ్యంగా ప్రభుత్వ పాఠశాలల్లో కూడా ఇంగ్లీష్ మీడియం అందుబాటులోకి వచ్చింది. తల్లిదండ్రులు కూడా ఇంగ్లీష్ మీడియంలోనే పిల్లలను చేర్పిస్తున్నారు. ఈ నేపథ్యంలో రిక్రూట్ అయ్యే టీచర్లకు కూడా ఇంగ్లీష్ ప్రావీణ్యం ఉండాలని విద్యాశాఖ భావిస్తోంది.

డీఎస్సీలో భాగంగా ఆంగ్ల భాష ప్రావీణ్య పరీక్షతోపాటు బేసిక్‌ కంప్యూటర్‌ నాలెడ్జ్‌ పరీక్షలు నిర్వహించాలని విద్యాశాఖ యోచిస్తోంది. తద్వారా పిల్లలకు మరింత లబ్ధి చేకూరే అవకాశం ఉంటుందని భావిస్తోంది. ఇంగ్లీష్ మీడియం బోధనలో ఇబ్బందులు రాకుండా ఉండటమే కాకుండా... పాఠశాల స్థాయిలోనే పిల్లలకు బేసిక్‌ కంప్యూటర్‌ నాలెడ్జ్‌ అందించవచ్చని విద్యాశాఖ లెక్కలు వేస్తోంది.

రాష్ట్రంలో ఇప్పటి వరకు కేవలం ట్రైన్డ్‌ గ్రాడ్యుయేట్‌(టీజీటీ), పోస్టుగ్రాడ్యుయేట్‌ టీచర్ల(పీజీటీ), ప్రిన్సిపల్‌ పోస్టులకు మాత్రమే ఆంగ్ల భాష ప్రావీణ్య పరీక్ష నిర్వహిస్తున్నారు. డీఎస్సీలో అయితే లేదు. అయితే ఈ నిర్ణయంపై అధికారికంగా ప్రకటన రావాల్సి ఉంది.

. ప్రస్తుతానికి విద్యాశాఖ ఈ అంశాన్ని లోతుగా పరిశీలిస్తోంది. ఒకవేళ ఈ రెండు పరీక్షలపై సానుకూలంగా నిర్ణయం తీసుకుంటే.... టీచర్ ఉద్యోగాలకు ఎంపికయ్యే అభ్యర్థులు ఈ పరీక్షల్లో కూడా పాస్ కావాల్సి ఉంటుంది.