Asian Games 2026 : ప్రణవి ఆల్-టైమ్ రికార్డు.. భారతదేశానికి తొలి గోల్ఫ్ స్వర్ణం, సిల్వర్ కూడా!

ఆసియా గేమ్స్ చరిత్రలో భారత మహిళల గోల్ఫ్ విభాగం సరికొత్త అధ్యాయాన్ని లిఖించింది. మైసూర్ క్రీడాకారిణి, 23 ఏళ్ల ప్రణవి ఉర్స్ అత్యంత అద్భుత ప్రదర్శనతో భారత్‌కు ఆసియా గేమ్స్​లో తొలిసారిగా గోల్ఫ్‌ వ్యక్తిగత స్వర్ణ పతకాన్ని అందించి దేశ గర్వకారణంగా నిలిచారు. చివరి వరకు జరిగిన ఉత్కంఠ పోరులో ఆమె అగ్రస్థానాన్ని కైవసం చేసుకున్నారు. అంతేకాకుండా, మహిళల టీమ్ విభాగంలోనూ భారత్ రజత పతకాన్ని సాధించడంలో కీలక పాత్ర పోషించారు.

మూడో రోజు ఆట ముగిసేసరికి 4-అండర్ 66 స్కోరుతో సాధించిన 3-స్ట్రోక్స్ ఆధిక్యంతో ప్రణవి చివరి రోజు బరిలోకి దిగారు. అయితే నాలుగో రోజు మూడో హోల్‌ వద్ద 'ట్రిపుల్ బోగీ' పడటంతో ఒకేసారి ఆమె ఆధిక్యం తుడిచిపెట్టుకుపోయింది. తీవ్ర ఒత్తిడి నెలకొన్న వేళ ప్రణవి ఏమాత్రం సహనం కోల్పోలేదు. 6వ, 10వ, 13వ హోల్స్‌ వద్ద పర్ఫెక్ట్ 'బర్డీ'లు సాధించి తిరిగి అగ్రస్థానాన్ని రీక్యాప్చర్ చేశారు. చివరి 72వ హోల్‌ను 'పర్' (Par) చేయడంతో ఆమె 4 రోజుల మొత్తం స్కోరు 15-అండర్ 265తో ముగించి అగ్రస్థానంలో నిలిచారు.

చైనాకు చెందిన యిన్ రుయోనింగ్ (67), సింగపూర్ గోల్ఫర్ షానన్ టాన్ (68) తలో 266 స్కోరుతో సంయుక్తంగా నిలవగా, ప్లేఆఫ్ ద్వారా చైనాకు రజతం, సింగపూర్‌కు కాంస్య పతకాలు దక్కాయి. కేవలం ఒక్క స్ట్రోక్ ఆధిక్యంతో ప్రణవి స్వర్ణాన్ని ఖరారు చేసుకోవడం విశేషం.

చరిత్ర సృష్టించిన అనంతరం ప్రణవి మాట్లాడుతూ.. "ఏదైనా ఒక విషయాన్ని సాధించిన తొలి వ్యక్తిగా నిలవడం నాకు చాలా ఇష్టం. భవిష్యత్తులో ఎంతోమంది ఈ సాధనను పునరావృతం చేయవచ్చు, కానీ చరిత్రలో మొదటి వ్యక్తి స్థానం ఎప్పటికీ మారదు," అని ఆనందం వ్యక్తం చేశారు.

వ్యక్తిగత విభాగంలో పసిడి గెలిచిన ప్రణవి, టీమ్ విభాగంలో ఒలింపియన్ అదితి అశోక్, దీక్షా డాగర్‌లతో కలిసి భారత్‌కు రజత పతకాన్ని అందించారు. 1982 దిల్లీ ఆసియా గేమ్స్ తర్వాత భారత గోల్ఫర్లు ప్రదర్శించిన అత్యుత్తమ ప్రతిభ ఇది. నాటి క్రీడల్లో లక్ష్మణ్ సింగ్ పురుషుల వ్యక్తిగత స్వర్ణంతో పాటు, అమిత్ లుత్రా, రాజీవ్ మోహతాతో కలిసి టీమ్ గోల్డ్ కూడా గెలుచుకున్నారు. ఆసియా వేదికపై మహిళల విభాగంలో ఆ రికార్డులను తిరగరాస్తూ ప్రణవి భారత క్రీడా ప్రపంచంలో నూతన అధ్యాయాన్ని ప్రారంభించారు.