ఇంట్లో శివలింగం ఉంచవచ్చా..? పాటించాల్సిన నియమాలు, పూజా విధానం ఇదే

హిందూ ధర్మశాస్త్రాల ప్రకారం శివారాధనకు అత్యంత ప్రాముఖ్యత ఉంది. శివుడు 'భోలే బాబా'గా పిలవబడతాడు, అంటే భక్తుల చిన్నపాటి భక్తికి కూడా ఆయన త్వరగా ప్రసన్నమవుతాడు. ఈ క్రమంలోనే చాలామంది తమ ఇళ్లలో శాంతి, సౌభాగ్యాల కోసం శివలింగాన్ని ఏర్పాటు చేసుకోవాలని భావిస్తారు. అయితే, ఇంట్లో శివలింగాన్ని ఉంచడం అనేది ఒక బాధ్యతతో కూడుకున్న పని. పురాణాలు, వాస్తు శాస్త్రం ప్రకారం శివలింగ ప్రతిష్ఠకు కొన్ని కఠినమైన నియమాలు ఉన్నాయి.

శివలింగం అనేది సాకార మరియు నిరాకార రూపాల కలయిక. దీన్ని ఇంట్లో ఉంచడం వల్ల సానుకూల శక్తి ప్రసరిస్తుంది, దుష్ట శక్తులు దూరమవుతాయి. కానీ, ఇది క్రమబద్ధమైన ఆరాధనతోనే సాధ్యమవుతుంది.

ఇంట్లో ఉంచే శివలింగం ఎప్పుడూ భారీగా ఉండకూడదు. శాస్త్రాల ప్రకారం, గృహస్తులు తమ బొటనవేలు పరిమాణంలో ఉండే చిన్న శివలింగాన్ని పూజించడం శ్రేయస్కరం. పెద్ద శివలింగాలు ఆలయాలకు మాత్రమే పరిమితం, ఎందుకంటే వాటికి అవసరమైన కఠిన పూజా నియమాలను ఇంట్లో పాటించడం కష్టం.

శివలింగాన్ని ఎల్లప్పుడూ ఇంటి ఈశాన్య మూలలో (ఈశాన్య దిశ) ఏర్పాటు చేయాలి. ఇది దైవ శక్తులు సంచరించే అత్యంత పవిత్రమైన దిశ. పొరపాటున కూడా దక్షిణం లేదా పడమర దిశల్లో శివలింగాన్ని ఉంచరాదు.కేవలం శివలింగం మాత్రమే కాకుండా, పార్వతీ దేవి, గణేశుడు ,కార్తికేయుని విగ్రహాలను కూడా కలిసి ఉంచాలి. దీనివల్ల కుటుంబంలో సమతుల్యత ఏర్పడి, గొడవలు తగ్గుతాయని నమ్మకం.

ఒక ఇంట్లో ఒకటి కంటే ఎక్కువ శివలింగాలు ఉండటం వాస్తు దోషంగా పరిగణించబడుతుంది. ఇది ఇంట్లో అశాంతికి దారితీస్తుంది, కాబట్టి ఒకదాన్నే పూజించాలి.

ప్రతిరోజూ శివలింగానికి జలాభిషేకం చేయడం తప్పనిసరి. పాలు, పెరుగు, తేనె, నెయ్యి మరియు పంచదారతో పంచామృత అభిషేకం నిర్వహించవచ్చు. బిల్వ పత్రాలు (మారేడు దళాలు), తెల్ల గంధం, జిల్లేడు పువ్వులు శివునికి అత్యంత ప్రీతిపాత్రమైనవి. ఇక శివలింగ పూజలో కొన్ని వస్తువులను ఎట్టి పరిస్థితుల్లోనూ వాడకూడదు. కుంకుమ, పసుపు, తులసి ఆకులు , మొగలి పువ్వులను శివలింగానికి సమర్పించడం నిషిద్ధం. పూజ సమయంలో 'ఓం నమః శివాయ' మంత్రాన్ని జపిస్తూ ప్రశాంత చిత్తంతో ఉండాలి.