వేగంగా కదులుతున్న అర్నబ్ తుపాను.. తెల్లవారుజామున 2-4 గంటల మధ్య తీరం దాటే అవకాశం

అర్నబ్ తుపాను వేగంగా కదులుతున్నదని ఏపీ విపత్తుల నిర్వహణ సంస్థ వెల్లడించింది. తుపాను బాహ్య వలయం భూభాగాన్ని తాకుతున్నది.

తెల్లవారుజామున 2–4 గంటల మధ్య పూర్తిగా అర్నబ్ తుపాను తీరాన్ని దాటే అవకాశం ఉంది. గడిచిన 6 గంటల్లో గంటకు 18 కిమీ వేగంతో తీవ్ర తుపాన్ కదిలింది. విశాఖపట్నానికి 170కి.మీ., కాకినాడకు 90 కి.మీ., మచిలీపట్నానికి 170 కి.మీ., బాపట్లకు 240 కి.మీ దూరంలో కేంద్రీకృతమై ఉన్నది.

దీని ప్రభావంతో బుధవారం ఉదయం వరకు పలు జిల్లాల్లో భారీ నుంచి అతి భారీ వర్షాలు కురుస్తాయి. ఈరోజు ఉదయం 8.30గంటల నుంచి 28 ప్రాంతాల్లో అతిభారీ వర్షాలు కురిశాయి. 133 ప్రాంతాల్లో భారీ వర్షాలు నమోదైనట్టుగా రాష్ట్ర విపత్తుల నిర్వహణ సంస్థ ఎండీ ప్రఖర్ జైన్ తెలిపారు.

తుపాను ప్రభావంతో తూర్పుగోదావరి, పశ్చిమగోదావరి జిల్లాల్లో బుధవారం ఉదయం వరకు భారీ నుండి అతిభారీ వర్షాలు పడుతాయి. కాకినాడ, కోనసీమ, అనకాపల్లి జిల్లాల్లో కూడా ఉదయం వరకు భారీ నుండి అతిభారీ వర్షాలు కురుస్తాయని ప్రఖర్ జైన్ వెల్లడించారు.

గంటకు 100-140 కిమీ వేగంతో బలమైన ఈదురుగాలులు వీచే అవకాశం ఉంది. పూరిళ్లు, రేకుల షెడ్లలో నివసించే వారు దగ్గరలోని పునరావాస కేంద్రాలకు వెంటనే వెళ్ళాలి. మీ ప్రాంతంలోని తుపాన్ సమస్యలకు మనమిత్ర వాట్సాప్ నంబర్ 9552300009 ద్వారా వేగవంతమైన పరిష్కారం దొరుకుతుంది. అత్యవసర సహాయం కోసం విపత్తుల నిర్వహణ సంస్థ టోల్ ఫ్రీ నంబర్లు 1070, 112, 18004250101లను సంప్రదించండి.