ఫొటోలు : 'అర్నబ్' తుఫాన్ దాటికి విశాఖ, కాకినాడ విలవిల - ఉప్పెనలా అలలు, భారీగా నష్టం!

తీవ్ర రూపం దాల్చిన 'అర్నబ్' తుపాను ఉత్తరాంధ్ర, కోస్తా జిల్లాలను భయాందోళనకు గురిచేసింది. తీరం దాటే క్రమంలో విరుచుకుపడిన భయంకరమైన గాలులు, ఉప్పెనలా ఎగసిపడిన సముద్ర అలల దాటికి విశాఖపట్నం, కాకినాడ జిల్లాల్లో భారీ నష్టం వాటిల్లింది. తుపాను తీవ్రతను ప్రతిబింబించే దృశ్యాలు క్షేత్రస్థాయిలో పరిస్థితుల తీవ్రతకు అద్దం పడుతున్నాయి.

విశాఖపట్నం తీరంలో బుధవారం ఉదయం నుంచే వాతావరణం అత్యంత భయంకరంగా మారింది. గంటకు వంద కిలోమీటర్లకు పైగా వేగంతో వీచిన ఈదురుగాలులకు విశాఖ తీరానికి రాకాసి అలలు పోటెత్తాయి. గాలుల ధాటికి నగరంలో పలుచోట్ల భారీ వృక్షాలు నేలకూలాయి. నగర వీధుల్లో నిలిపి ఉంచిన పలు వాహనాలపై చెట్లు కూలిపోవడంతో అవి తీవ్రంగా ధ్వంసమయ్యాయి. విశాఖపట్నంలోని ప్రధాన రహదారులపై ట్రాఫిక్ స్తంభించిపోవడంతో సహాయక బృందాలు రంగంలోకి దిగి చెట్లను తొలగించే చర్యలు చేపట్టాయి.

కాకినాడ హార్బర్‌లో మత్స్యకారులు తమ వేట పడవలను సురక్షితంగా ఒడ్డుకు చేర్చి లంగర్లు వేసి కట్టివేశారు.

బలమైన ఈదురుగాలుల దాటికి కాకినాడ బీచ్ ప్రాంతంలో దెబ్బతిన్న రోడ్లు

సముద్రంలో చెలరేగిన తీవ్ర అలజడి కారణంగా రాకాసి అలలు ఒడ్డుకు విరుచుకుపడ్డాయి. సముద్రపు నీరు ఉప్పెనలా ముందుకు రావడంతో ప్రసిద్ధ ఉప్పాడ కోస్టల్ రహదారి తీవ్రంగా దెబ్బతిని తునాతునకలైంది. రహదారిపైకి భారీగా సముద్రపు నీరు, ఇసుక చేరడంతో కాకినాడ-ఉప్పాడ మధ్య రవాణా వ్యవస్థ పూర్తిగా నిలిచిపోయింది.

ఇవాళ తుఫాన్ తీరం దాటిన తర్వాత కాకినాడలోని పరిస్థితి

తుపాను ప్రభావం ఎక్కువగా ఉన్న లోతట్టు, తీరప్రాంత ప్రజలను ప్రభుత్వం ముందస్తుగానే సురక్షిత ప్రాంతాలకు తరలించింది. కాకినాడ పరిసర ప్రాంతాల్లోని ప్రభుత్వ పాఠశాలల్లో అత్యవసర పునరావాస కేంద్రాలను ఏర్పాటు చేశారు. ఇళ్లను వదిలి వచ్చిన బాధితులకు ఇక్కడే వసతి, భోజన సదుపాయాలు కల్పిస్తున్నారు. ఆశ్రయం పొందుతున్న బాధితులు బట్టలను ఆరబెట్టుకోవడానికి పాఠశాల గదుల లోపలే తాళ్లు కట్టుకుని గడుపుతున్న దృశ్యాలు క్షేత్రస్థాయిలోని కష్టాలను కళ్లకు కడుతున్నాయి.

బాధిత ప్రాంతాల్లో విపత్తు నిర్వహణ బృందాలు, స్థానిక అధికారులు నిరంతరం పర్యవేక్షిస్తున్నారు. "ప్రజలకు ఎలాంటి ముప్పు రాకుండా అన్ని ముందస్తు జాగ్రత్తలు తీసుకున్నాం," అని జిల్లా యంత్రాంగం స్పష్టం చేసింది. తుపాను పూర్తిగా సమసిపోయే వరకు ప్రజలు బయటకు రావద్దని అధికారులు హెచ్చరిస్తున్నారు.

(AP Photo/Mahesh Kumar A.)