దీపావళికి బాక్సులు బాక్సులు స్వీట్లు వచ్చాయా? ఏ స్వీటు ఎంత కాలం నిల్వ ఉంటుంది? FSSAI కీలక గైడ్‌లైన్స్..

దీపావళి పండుగ వచ్చిందంటే చాలు ప్రతి ఇంటా నోరూరించే రకరకాల పిండివంటలు, రంగురంగుల స్వీట్ల బాక్సులు దర్శనమిస్తాయి. బంధువులు, స్నేహితులు, ఆత్మీయులు ఇచ్చే మిఠాయిల పెట్టెలను రోజుకు కొద్దికొద్దిగా ఆస్వాదించడం మన సగటు భారతీయుల అలవాటు. అయితే ఈ స్వీట్లు ఎన్ని రోజులు పాడవ్వకుండా ఉంటాయి? ఏ మిఠాయిని ఎప్పుడు తినేయాలో చాలామందికి స్పష్టత ఉండదు. మన దగ్గర శీతాకాలం ఆరంభంలో ఉండే తేమ, వేడి వాతావరణం వల్ల పాల ఉత్పత్తులతో చేసిన స్వీట్లు త్వరగా పాడయ్యే ప్రమాదం ఉంది. ఈ నేపథ్యంలో వినియోగదారుల ఆరోగ్య రక్షణే ధ్యేయంగా భారత ఆహార భద్రత ప్రాధికార సంస్థ (ఎఫ్​ఎస్​ఎస్​ఏఐ) వివిధ రకాల మిఠాయిల నిల్వ కాలపరిమితిపై స్పష్టమైన మార్గదర్శకాలను విడుదల చేసింది.

బెంగాలీ స్వీట్లైన రసగుల్లా, రస్మలై, రాజ్‌భోగ్, చమ్‌చమ్, సందేశ్ వంటి మిఠాయిల్లో పాల శాతం, తేమ శాతం చాలా ఎక్కువ. ఇటువంటి స్వీట్లను ఎఫ్‌ఎస్‌ఎస్‌ఏఐ నిబంధనల ప్రకారం 1 నుంచి 4 డిగ్రీల సెల్సియస్ ఉష్ణోగ్రత వద్ద ఫ్రిజ్‌లోనే ఉంచాలి. తయారు చేసిన 48 గంటల్లో (రెండు రోజుల్లో) వీటిని పూర్తి చేయాలి. మూత ఉన్న శుభ్రమైన గాలి చొరబడని డబ్బాలోనే వీటిని నిల్వ చేయడం శ్రేయస్కరం.

పాలు, విరిగిపోయిన కోవాతో తయారు చేసే కళాకండ్ అత్యంత తేమ కలిగిన స్వీట్! రోజ్ కళాకండ్, చాక్లెట్ కళాకండ్ వంటి ఫ్లేవర్డ్ రకాలైనా సరే, తయారు చేసిన రోజే తినేయాలని ఎఫ్‌ఎస్‌ఎస్‌ఏఐ స్పష్టం చేస్తోంది. వీటిని ఎక్కువ సమయం బయట నిల్వ ఉంచితే బ్యాక్టీరియా వేగంగా చేరి కడుపునొప్పి, ఫుడ్ పాయిజనింగ్‌కు దారితీసే అవకాశం ఉందని హెచ్చరిస్తోంది.

కోవాతో చేసే మథుర పేడా, మిల్క్ కేక్, ప్లెయిన్ బర్ఫీ, పిస్తా బర్ఫీలతో పాటు బూందీ లడ్డూ, కొబ్బరి లడ్డూలను నాలుగు రోజుల వరకు నిల్వ ఉంచుకోవచ్చని ఎఫ్‌ఎస్‌ఎస్‌ఏఐ పేర్కొంది. అయితే ఈ నిల్వ కాలం స్వీట్ తయారీలో వాడే నెయ్యి, పాకం పద్ధతులపై కూడా ఆధారపడి ఉంటుందని చెప్పింది. వీటిని తగిన గాలి వెలుతురు ఉండే ప్రదేశంలో ఉంచాలని అంటోంది.

నెయ్యి, జీడిపప్పు, బాదం వంటి పొడి పప్పులతో చేసే స్వీట్లు ఎక్కువ రోజులు తాజాగా ఉంటాయి. కాజూ కత్లీ, డ్రై ఫ్రూట్ లడ్డూ, బాదం బర్ఫీ, అంజీర్ రోల్స్, గేవర్, బాదుషా వంటి రకాలను తయారు చేసిన నాటి నుంచి ఏడు రోజుల వరకు హ్యాపీగా తినవచ్చు! వీటిని సూర్యరశ్మి, తేమ తగలని చల్లని ప్రదేశంలో గాలి చొరబడని సీసాలో భద్రపరుచుకోవాలి.

సాంప్రదాయకంగా పొడిగా ఉండే స్వీట్లు దీర్ఘకాలం నిల్వ ఉంటాయి. శనగపిండి (బెసన్) లడ్డూలు, గోధుమపిండి (ఆటా) లడ్డూలను 15 రోజుల వరకు వాడుకోవచ్చు. శనగ బర్ఫీ, సోహన్ హల్వా వంటి పొడి పదార్థాలు గరిష్టంగా 30 రోజుల వరకు సురక్షితంగా ఉంటాయి. వీటిలో తేమ శాతం చాలా తక్కువగా ఉండటమే దీనికి ప్రధాన కారణం. పండుగ మిఠాయిలను స్వీట్ షాపుల నుంచి కొనేటప్పుడు డబ్బాపై తయారీ తేదీ, నిల్వ గడువు కచ్చితంగా పరిశీలించాలని నిపుణులు హెచ్చరిస్తున్నారు.