ఈ వస్తువులను తులసి మొక్క దగ్గర అస్సలు ఉంచవద్దు

హిందూమతంలో తులసి మొక్కకు పవిత్రమైన స్థానం ఉంది. తులసిని లక్ష్మీదేవి స్వరూపంగా పూజిస్తారు. ప్రతిరోజూ తులసిని పూజించడం వల్ల ఇంటికి శ్రేయస్సు, శాంతి లభిస్తాయని నమ్ముతారు. అయితే జ్యోతిష్య శాస్త్రం ప్రకారం, తులసి మొక్కను పెంచడం మాత్రమే సరిపోదు.. కొన్ని నియమాలను కూడా పాటించాలి. ఆ నియమాలను ఉల్లంఘిస్తే కుటుంబ కలహాలు, ఆర్థిక సమస్యలు తలెత్తవచ్చని నమ్ముతారు.

తులసి మొక్కలను ఇంట్లో ఎక్కడ పడితే అక్కడ పెట్టకూడదు. వాటిని ముఖ్యంగా దక్షిణ దిశలో ఉంచడం అశుభం, ఎందుకంటే ఆ దిశను యమధర్మరాజు దిక్కుగా భావిస్తారు. తులసి మొక్కను ఉత్తరం, తూర్పు లేదా ఈశాన్య దిశలో ఉంచడం ఉత్తమం. ఇది ఇంట్లో సానుకూల శక్తిని పెంచుతుంది.

ప్రతిరోజూ ఉదయం స్నానం చేసిన తర్వాత తులసి మొక్కకు నీరు పోయడం శుభప్రదం. అయితే ఆదివారాలు, ఏకాదశి తిథి, సూర్యగ్రహణాలు, చంద్రగ్రహణాల రోజులలో తులసికి నీరు పోయకూడదు. ఈ రోజులలో తులసి నీరు లేకుండా ఉపవాసం ఉండి విశ్రాంతి తీసుకుంటుందని పెద్దల సాంప్రదాయ నమ్మకం.

ప్రతి సాయంత్రం తులసి మొక్క దగ్గర ఆవు నెయ్యితో చేసిన దీపాన్ని వెలిగించడం శుభప్రదం. ఇలా చేయడం వల్ల లక్ష్మీదేవి సంపూర్ణ ఆశీస్సులు లభిస్తాయి. దీనివల్ల ఇంట్లో సంతోషం, ఆనందం, శ్రేయస్సు పెరుగుతాయని శాస్త్రాలు చెబుతున్నాయి. తులసి మొక్క చుట్టూ ఎల్లప్పుడూ పరిశుభ్రత పాటించడం చాలా ముఖ్యం. తులసి మొక్క దగ్గర చెత్తబుట్టలు, చీపుర్లు, చెప్పులు, బ్రహ్మజెముడు మొక్కలు, మిరియాల మొక్కలు లేదా ముళ్ల మొక్కలను ఉంచవద్దు. ఇవి తులసి మొక్క పవిత్రతను దెబ్బతీసి, ఇంట్లోకి ప్రతికూల శక్తిని తీసుకువస్తాయి.

తులసి మొక్క దగ్గర శివలింగాన్ని గానీ, శివునికి సంబంధించిన ఏ వస్తువులనూ గానీ ఉంచకూడదు. అదేవిధంగా కొన్ని ఆచారాల ప్రకారం, శివునికి తులసి ఆకులను సమర్పించడం కూడా నిషిద్ధంగా పరిగణిస్తారు. అందువల్ల తులసి పూజను, శివ పూజను విడివిడిగా చేయడం మంచిది.