Shani Trayodashi Remedies: శని ప్రభావాన్ని తగ్గించే శని త్రయోదశి, ఇలా చేస్తే బాధలన్నీ తొలగిపోతాయి!

శని త్రయోదశి: చాలా మంది శని బాధలతో సతమతమవుతూ ఉంటారు. జాతకంలో ఏలినాటి శని, అష్టమ శని లేదా అర్ధాష్టమ శనితో బాధపడుతున్న వారు ఈ శని త్రయోదశిని సరిగ్గా సద్వినియోగం చేసుకోవడం మంచిది. శని త్రయోదశి నాడు శనిదేవుని ఆరాధిస్తే శని దోష ప్రభావం తగ్గుతుంది. అలాగే వీటిని కూడా పాటించడం మంచిది.

శని త్రయోదశి తేదీ, సమయం: త్రయోదశి తిధి జనవరి 30 ఉదయం 11:09కి మొదలవుతుంది. జనవరి 31 ఉదయం 8:06తో ముగుస్తుంది. ఉదయ తిథి ప్రకారం చూసుకోవాలి కనుక శని త్రయోదశి జనవరి 31న వచ్చింది.

శని త్రయోదశి నాడు ఏం చేయాలి?

బ్రహ్మ ముహూర్తంలో నిద్ర లేవాలి: సూర్యోదయం కంటే ముందే నిద్ర లేచి స్నానం చేయాలి. శని దోష నివారణకు తలస్నానం చేసేటప్పుడు నీటిలో కొన్ని నువ్వులు వేసుకుని స్నానం చేయాలి. అలాగే నువ్వుల నూనె శరీరానికి రాసుకుని స్నానం చేస్తే కూడా మంచిది.

దీపారాధన, అభిషేకం: పూజ గదిలో వెంకటేశ్వర స్వామి లేదా శివుని ఫోటో పెట్టి దీపారాధన చేయండి. ఆలయానికి వెళ్లి తైలాభిషేకం చేయండి. దగ్గర్లో ఉన్న శివాలయం లేదా నవగ్రహాలు ఉన్న చోటికి వెళ్లి శని దేవుని విగ్రహానికి నువ్వుల నూనెతో అభిషేకం చేయాలి. ఆ తర్వాత 11 సార్లు ప్రదక్షిణలు చేయాలి.

నైవేద్యం: శని దేవుడికి ఎంతో ఇష్టమైన నల్ల నువ్వులు, బెల్లం కలిపిన పదార్థాన్ని నైవేద్యంగా పెడితే మంచిది. నువ్వుల ఉండలను కూడా నైవేద్యంగా పెట్టొచ్చు. శని త్రయోదశి నాడు నల్లటి వస్త్రాలు, ఇనుము, స్టీల్ పాత్రలు, నల్ల గొడుగు, చెప్పులు వంటివి దానం చేస్తే మంచిది. అలాగే మినప్పప్పు, నువ్వుల నూనె, నువ్వులు వంటివి కూడా దానం చేయొచ్చు.