హైదరాబాద్ : నింగిలో రంగురంగుల బెలూన్లు - అట్టహాసంగా ‘హాట్ ఎయిర్ బెలూన్ ఫెస్టివల్’ ప్రారంభం

హైదరాబాద్ లోని గోల్కొండ కోట సమీపంలోని గోల్ఫ్ క్లబ్ వేదికగా ‘హాట్ ఎయిర్ బెలూన్ ఫెస్టివల్’ ఘనంగా ప్రారంభమైంది. రాష్ట్ర పర్యాటక శాఖ మంత్రి జూపల్లి కృష్ణారావు ఈ వేడుకలను ప్రారంభించారు.

తెలంగాణ పర్యాటక అభివృద్ధి సంస్థ (TSTDC) ఆధ్వర్యంలో నిర్వహిస్తున్న ఈ ఫెస్టివల్, నగరవాసులకు మరియు పర్యాటకులకు సరికొత్త అనుభూతిని అందించనుంది.

మంత్రి జూపల్లి కృష్ణారావు స్వయంగా బెలూన్‌లో విహరించి ఈ సాహస యాత్రను ప్రారంభించారు. గగనతలంలో సుమారు 13 కిలోమీటర్ల మేర గంటన్నర పాటు ఆయన ప్రయాణించారు.

మంత్రి జూపల్లి మాట్లాడుతూ… గగనతలం నుంచి నగరాన్ని, చారిత్రక కట్టడాలను వీక్షించిన అనుభవం ఎంతో మధురంగా ఉందని కొనియాడారు. "డెస్టినేషన్ తెలంగాణ బ్రాండ్‌ను బలోపేతం చేయడంలో ఇలాంటి సాహస క్రీడలు కీలక పాత్ర పోషిస్తాయని అభిప్రాయపడ్డారు.

హైదరాబాద్ లో నిర్వహిస్తున్న ఈ హాట్ ఎయిర్ బెలూన్ ఫెస్టివల్ జనవరి 18వ తేదీతో ముగియనుంది. ఈ వేడుకలను చేసేందుకు నగర వాసులు ఆసక్తి చూపుతున్నారు.

హాట్ ఎయిర్ బెలూన్ ఫెస్టివల్‌ టికెట్‌ను ఆన్‌లైన్‌లో కొనుగోలు చేసుకునే అవకాశం ఉంది. వయస్సు, రైడ్ రకాన్ని బట్టి ధరలు రూ.500 నుంచి రూ.1500 వరకు ఉంటాయి.