Fatty liver : మీ ఫ్యాటీ లివర్ సమస్యను దూరం చేసే 21 రోజుల పక్కా ప్లాన్..

ఫ్యాటీ లివర్‌ను తగ్గించుకోవడంలో మొదటి అడుగు లిక్విడ్ షుగర్‌ను పూర్తిగా మానెయ్యడమే! మనం తాగే సాఫ్ట్ డ్రింక్స్, ప్యాక్ చేసిన ఫ్రూట్ జ్యూస్‌లు, తీపి పానీయాల వల్ల కాలేయంలో వేగంగా కొవ్వు పేరుకుపోతుంది. వీటికి బదులుగా పీచు పదార్థాలు, విటమిన్లు పుష్కలంగా లభించే ఉసిరి, జామ, బత్తాయి, బొప్పాయి వంటి తాజా పండ్లను నేరుగా తినడం అలవాటు చేసుకోవాలి. ఇవి రక్తంలో చక్కెర స్థాయిలు హఠాత్తుగా పెరగకుండా నిరోధిస్తాయి.

భోజనంలో సమతుల్యత పాటించడం చాలా ముఖ్యం. నిపుణుల ప్రకారం మీ భోజన పళ్లెంలో సగం భాగం (1/2) కూరగాయలు, ఆకుకూరలతో నింపాలి. ఒక పావు భాగం (1/4) పప్పు ధాన్యాలు, గుడ్లు లేదా మాంసకృత్తులు (ప్రోటీన్) ఉండాలి. మిగిలిన పావు భాగంలో (1/4) తృణధాన్యాలు (హోల్ గ్రెయిన్స్) ఉండేలా చూసుకోవాలి. ఈ పద్ధతి ఇన్సులిన్ సెన్సిటివిటీని పెంచి కాలేయంపై భారాన్ని తగ్గిస్తుంది.

ఆహారంలో నూనెలో వేయించిన పదార్థాలు, ప్రోసెస్ చేసిన స్నాక్స్‌ను తగ్గించాలి. వాటికి బదులుగా శరీరానికి మేలు చేసే మంచి కొవ్వులను ఎంచుకోవాలి. బాదం, వాల్‌నట్స్, అవిసె గింజలు (ఫ్లాక్స్ సీడ్స్), గుమ్మడి గింజలు మీ ఆహారంలో భాగం చేసుకోవడం వల్ల కాలేయ కణజాలం బలోపేతం అవుతుంది.

కాలేయ ఆరోగ్యాన్ని మెరుగుపరచడంలో వ్యాయామం కీలక పాత్ర పోషిస్తుంది. రోజూ వాకింగ్ చేయడంతో పాటు కండరాలను బలోపేతం చేసే వ్యాయామాలు చేయాలి. ప్లాంక్ పోజ్ వంటి ఆసనాలు క్రమం తప్పకుండా వేయడం వల్ల కాలేయం చుట్టూ ఉన్న కొవ్వు కరుగుతుంది.

మానసిక ఒత్తిడి కూడా కాలేయంపై ప్రతికూల ప్రభావం చూపుతుంది. యోగేంద్ర తాడాసనం, కోణాసనం, వక్రాసనం, పవనముక్తాసనంతో పాటు అన్యులోమ్-విలోమ్, భ్రామరి ప్రాణాయామం సాధన చేయడం వల్ల శరీరంలో ఆక్సిజన్ సరఫరా పెరిగి కాలేయ కణాలు పునరుజ్జీవనం పొందుతాయి.

పడుకునే సమయానికి కనీసం 2 నుంచి 3 గంటల ముందే రాత్రి భోజనం పూర్తి చేయాలి. ఆలస్యంగా తినడం, రాత్రి వేళల్లో స్నాక్స్ తినడం వల్ల జీర్ణక్రియ మందగించి కాలేయంపై భారం పెరుగుతుంది.

శరీరం తనను తాను బాగుచేసుకోవడానికి సరైన నిద్ర అవసరం. వేళకు పడుకోవడం, ఒత్తిడిని తగ్గించుకోవడం కాలేయ ఆరోగ్యానికి మేలు చేస్తాయి. ఆల్కహాల్ కాలేయ కణాలను తీవ్రంగా దెబ్బతీస్తుంది కాబట్టి మద్యపానానికి పూర్తిగా దూరంగా ఉండాలి.