E-Paper
Hyderabad Rain : నగరంలో కుండపోత వర్షం - ఈ ఏడాదిలోనే ఇదే అత్యధికం..!
దీర్ఘకాలిక పొడి వాతావరణం తర్వాత హైదరాబాద్ నగరంలో శుక్రవారం సాయంత్రం మోస్తరు నుంచి భారీ వర్షం కురిసింది. దీంతో ఉక్కపోత నుంచి నగరవాసులకు ఉపశమనం లభించినట్లు అయింది. మరోవైపు పలు ప్రాంతాల్లో రోడ్లపైకి నీరు చేరి ట్రాఫిక్ నిలిచిపోయింది.
హైదరాబాద్ నగరవాసులను గత కొంతకాలంగా వేధిస్తున్న పొడి వాతావరణానికి, ఉక్కపోతకు తెరపడింది. శుక్రవారం సాయంత్రం నగరంలోని పలు ప్రాంతాలలో ఒక్కసారిగా మోస్తరు నుండి భారీ వర్షం కురిసింది. సాయంత్రం వేళ అకస్మాత్తుగా వాతావరణం మారిపోయి దంచికొట్టిన ఈ వర్షం నగర ప్రజలకు, వాహనదారులకు తీవ్ర ఉపశమనాన్ని కలిగించింది.
(Mohammed Aleemuddin)
ఈ వర్షభావ ప్రభావం నగరంలోని అనేక ప్రధాన ప్రాంతాల్లో స్పష్టంగా ఉంది. ముఖ్యంగా అమీర్‌పేట్, మాదాపూర్, గచ్చిబౌలి, మెహదీపట్నం, అత్తాపూర్, రాజేంద్రనగర్, కోటి, ఆబిడ్స్ వంటి విభిన్న ప్రాంతాల్లో భారీగా వర్షపాతం నమోదైంది. ఐటీ కారిడార్‌తో పాటు పాతబస్తీ, మధ్య హైదరాబాద్ పరిధిలోని ప్రధాన వ్యాపార సముదాయాలు ఉన్న వీధులన్నీ వర్షపు నీటితో తడిసి ముద్దయ్యాయి. దీర్ఘకాలంగా సరైన వర్షాలు లేక అవస్థలు పడుతున్న ప్రజలు ఈ వానతో ఆహ్లాదకరమైన వాతావరణాన్ని ఆస్వాదించారు.
(Mohammed Aleemuddin)
ఒక్కసారిగా కురిసిన కుండపోత వర్షం కారణంగా నగరంలోని పలు లోతట్టు ప్రాంతాలు నీటమునిగాయి. నివాస గృహాల మధ్యకు, రోడ్లపైకి భారీగా వరద నీరు వచ్చి చేరింది. ముఖ్యంగా ప్రజాభవన్ పరిసర ప్రాంతాల్లో భారీ వర్షపాతం నమోదైంది. అలాగే చాదర్‌ఘాట్ ఎక్స్ రోడ్ వైపు వెళ్లే మలక్‌పేట్ రోడ్ అండర్ బ్రిడ్జ్ (RUB) సమీపంలో రహదారిపైకి భారీగా నీరు వచ్చి చేరడంతో వాటర్ లాగింగ్ సమస్య తలెత్తింది. మోకాలి లోతు నీరు నిలవడంతో ఆ మార్గంలో వాహనాలు ముందుకు సాగలేక తీవ్ర ఇబ్బందులు తలెత్తాయి.
సాయంత్రం ఆఫీసుల వేళలు ముగిసే సమయానికి వర్షం ప్రారంభం కావడంతో నగరంలో తీవ్ర ట్రాఫిక్ జామ్‌లు ఏర్పడ్డాయి. ఐటీ హబ్‌లైన గచ్చిబౌలి, మాదాపూర్‌లతో పాటు నగరంలో కీలకమైన అమీర్‌పేట్, బేగంపేట్ మరియు వాటిని ఆనుకుని ఉన్న ప్రధాన రహదారులపై కిలోమీటర్ల మేర వాహనాలు నిలిచిపోయాయి. వాహనాలు అత్యంత నెమ్మదిగా కదలడంతో ఉద్యోగులు ఇళ్లకు చేరుకోవడానికి గంటల సమయం పట్టింది.
రహదారులు జలమయం కావడం, వాన నీటి వల్ల రోడ్లు జారే ప్రమాదం ఉండటంతో వాహనదారులు అత్యంత జాగ్రత్తగా వాహనాలు నడపాలని రవాణా, ట్రాఫిక్ పోలీసులు సూచించారు. వర్షపు నీరు నిలిచిన ప్రాంతాల గుండా వెళ్లేటప్పుడు వేగం తగ్గించాలని, ట్రాఫిక్ సిబ్బంది ఇచ్చే సూచనలను కచ్చితంగా పాటించాలని అధికారులు కోరారు.
సాధారణ వర్షాకాలంలో కూడా ఈ స్థాయిలో వర్షం పడలేదు. ఈ ఏడాదిలోనే అత్యధిక సమయం పాటు నిరంతరాయంగా కురిసిన వర్షం ఇదే. ఈ వర్షాకాల సీజన్‌లో నగరంలో కేవలం ఐదు సార్లు మాత్రమే ఇలాంటి భారీ వర్షపాతం నమోదవడం గమనార్హం. రోజంతా భానుడి భగభగలతో వేడెక్కిన నగరం శుక్రవారం సాయంత్రం పడిన వానకు పూర్తిగా తడిసి ముద్దయింది. ఎల్ నినో ఎఫెక్ట్ నేపథ్యంలో నగరంలోని చాలా ప్రాంతాల్లో నీటి ఎద్దడి ఉంది. ట్యాంకర్లకు కూడా చాలా డిమాండ్ ఉంటోంది. ఇలాంటి పరిస్థితుల నేపథ్యంలో ఈస్థాయి వర్షం పడటం నగరవాసులకు ఉపశమనంగా మారనుంది.
